Deuteronomio 5 - Maung A Balita Biblia

Saray Samploran Ganggan

¹ Impantitipon nen Moises iray amin a totood Israel tan kuantod sikara, “Totood Israel, dengel yo ray amin a ganggan ya iter kod sikayo ed sayan agew. Aral yo ra tan pampelengan yo ran onuren.

² Diad Palandey na Sinai akisipanan so Katawan a Dios tayo,

³ aliwan diad saray atateng tayo labat, no ag ingen pati diad sikatayon amin a mabilay natan.

⁴ Manlapud apoy diad toktok na palandey say Katawan akisalitan lupa-lupaan ed sikayo.

⁵ Diad saman nanalagey ak ed nampegleyan yo tan say Katawan pian nibagak ed sikayo so imbaga to, lapud antakot kayod samay apoy tan ag kayo kinmalab ed palandey. “Say Katawan kuanto,

⁶ ‘Siak so Katawan a Dios yo ya angipaway ed sikayod Egipto ya akaaripenan yo.

⁷ “Ag mo igagalang iray arum a diriyos; siak labat so igalang mo.

⁸ “Ag mo igagawaay sikan dili na talintao odino antokaman a kaolibay na bengatlan walad tawen odino walad tapew na dalin odino bengatlan walad danum ed dalem na dalin.

⁹ Ag ka ondadakmomo, ni mangigagalang ed saraya, ta siak, say Katawan a Dios mo et maimon ak. Dusaen ko ray mamosul ed siak tan saray kabyangay boleg da ya anggad kumatlo tan kumapat a kailalakan.

¹⁰ Balet aroen ko ray nilibon kailalakan na saray mangarod siak tan mangonur na saray ganggan ko.

¹¹ “Ag mo ikakanad maoges iran getma so ngaran ko a Yahweh, a Dios mo, ta dusaen koy siopaman a mangikanad ngaran ko diad andi-kakanaan a pamaakaran.

¹² “Ngilinan moy Agew na Panagpainawa tan ipasen mon masanto, onung na ingganggan ko, siak a Katawan a Dios mo, ed sika.

¹³ Anem agew a makapankimey ka,

¹⁴ balet say kumapiton agew et sikatoy agew na panagpainawa a nisaklang ed siak. Diad sayan agew anggapoy toon mankimey: sika, saray anak mo, saray aripen mo, saray ayep mo, odino saray sangkailin manaayam ed bansam. Nepeg a mampainawa iray aripen mo a singa pampainawam.

¹⁵ Nunot mo ya aripen ka nen saman ed Egipto, tan siak a Katawan a Dios mo et impaway ta kad man diad panamegley na baleg a pakayarik tan biskeg ko. Kanyan igaganggan ta kan ngilinan mo so Agew na Panagpainawa.

¹⁶ “‘Igalang moy amam tan say inam, onung na ingganggan ko, siak a Katawan a Dios mo, ed sika, pian maung lawas so kipapasen mo tan andokey so pambilay mo ed dalin ya iter kod sika.

¹⁷ “‘Ag ka mamapatey.

¹⁸ “‘Ag ka mikakaloguran.

¹⁹ “‘Ag ka mantatakew.

²⁰ “‘Ag ka mantitila no mantasi ka sumpad kaparam a too.

²¹ “‘Ag mo iibegan so asawa na kaparam a too; ag mo iibegan so abung to, say dalin to, saray aripen to, saray baka to, saray asno to, odino antokaman a kayaryan to.’

²² “Sikara yay ganggan ya inter ed sikayo na Katawan nen nantitipon kayo ed palandey. Nen nansalitad sikayo diad panamegley na makapanyarin bosis a nanlapud apoy tan nanlapud makapal a lorem, inter to ra yan ganggan tan anggapo lay arum. Insan to ra intatak ed duaran tapiak a bato tan inter to rad siak.

Say Takot na saray Totoo

²³ “Nen napopoolan imay intiron palandey tan nadngel yoy bosis a nanlapud kabilongetan, dinmagod siak iray pangulo na saray tribu yo tan saray mamatakken yo

²⁴ tan kuanda, ‘Say Katawan a Dios tayo et impanengneng tod sikatayo so pakapanyari tan kagalangan to nen nadngel min nansalita a nanlapud apoy! Anengneng mi la natan a siansian mambilay so sakey a too, anggaman ya akisalitad sikato so Dios.

²⁵ Balet akin et iposta mi lamet so bilay mi? Pateyen to kami man ya apoy. Andi-duaruwan ompatey kami no narengel min mansalita lamet so Katawan a Dios tayo.

²⁶ Wala tay toon nambilay kayari ton nadngel a nansalitan nanlapud apoy so mabilay a Dios?

²⁷ Pawil ka, Moises, ta dengel moy amin ya ibaga na Katawan a Dios tayo. Insan ka ompawil dia, ta ibagam ed sikami so imbaga to. Ondengel tan ononur kami.’

²⁸ “Nen nadngel ya na Katawan, inkuantod siak, ‘Nadngel koy imbaga na sarayan totoo, et tuay imbaga ra.

²⁹ Oy la komun ta ontan lawas so liknaan da! Oy la komun ta igalang da ak lawas tan onuren da ray amin a ganggan ko, pian maung lawas so kipapasen tan saray kabyangay boleg da ed anggad angga.

³⁰ Laka, ta ibagam ed sikara ya ompawil la rad katuldaan da.

³¹ Balet sika, Moises, tilak ka ni dia, ta iter kod sika ray amin a ganggan tan bilin ko. Ibangat mod saray totoo, pian naonur da ra no wala la rad dalin ya iter kod sikara.’

³² “Sikayo ran totood Israel pampelengan yon sumpalen iray amin ya ingganggan na Katawan a Dios yo. Ag yo susumlangen so anggan dinan a ganggan to.

³³ Onur yo ran amin, pian maung lawas so kipapasen yo tan mansiansia kayon mambilay ed dalin a panayaman yo.