Deuteronomio 4 - Maung A Balita Biblia

Imporek nen Moises ed saray Israelita ya Ontoluk ira

¹ Insan inkuanen Moises ed saray totoo, “Onur yo ray amin a ganggan ya ibabangat kod sikayo, et mansiansia kayon mambilay tan sakopen yo so dalin ya iter ed sikayo na Katawan a Dios na saray lalaki yo.

² Ag yo aaruman so igaganggan kod sikayo, tan ag yo babawasan. Onur yo ray ganggan na Katawan a Dios yo, saray ganggan ya inter kod sikayo.

³ Anengneng yon dili so ginawa na Katawan diad Palandey na Peor. Pinatey toy balang sakey a toon angigalang diman ed Baal,

⁴ balet sikayon matoor ed Katawan a Dios yo et mabilay ki ni ya anggad natan.

⁵ “Imbangat kod sikayo ray amin a ganggan onung na imbagad siak na Katawan a Dios ko. Onur yo ra ed dalin a ngalngali yo la looban tan panayaman.

⁶ Pampelengan yo ran onuren, ta sikatoy pakabirbiran na saray totood saray arum a bansa a makabat kayo. No narengelan da ra yan amin a ganggan ikuanda, ‘Agay lay kakabatan tan pakatalus na saray totood sayan makapanyarin bansa!’

⁷ “Anggapoy arum a bansa, anggan anto lay pakapanyari to, ya asingsingger ed sikato so dios to no nakaukolan to, a singa kinaasingger ed sikato na Katawan a Dios tayo. Eebatan to itayo kapag onkerew tayoy tulong to.

⁸ Anggapoy arum a bansa, anggan anto lay pakapanyari to, a walaan na saray ganggan a matonung a singa saray ganggan ya imbangat ko natan ed sikayo.

⁹ Manalwar kayo! Ag yon balut lilingwanan, legay bilay yo, imay anengneng na dilin mata yo. Ibaga yod saray anak yo tan saray apo yo

¹⁰ so nipaakar ed samay agew na impanalagey yo ed arap na Katawan a Dios yo diad Palandey na Sinai nen inkuantod siak, ‘Tipon mo ray totoo. Labay kon narengel day labay kon ibaga, pian naaralan day ontoluk ed siak legay pambilay da tan nibangat dan ontoluk met ed siak iray anak da.’

¹¹ “Ibaga yod saray anak yo no panoy inyakar tan impanalagey yo ed alusadsar na palandey ya akobutan na makapal a lorem a makapal ya asewek tan apoy a manliub ya anggad tawen.

¹² Ibaga yod sikara no panoy impisalitay Katawan ed sikayo manlapud apoy, no panoy impakadngel yon nansalita balet ag yon balut anengneng.

¹³ Imbaga tod sikayo so nepeg yon gawaen pian nasumpal yo so impisipanan tod sikayo—nepeg yon onuren so Samploran Ganggan ya insulat tod duaran tapyak a bato.

¹⁴ Imbagad siak na Katawan ya ibangat kod sikayo ray amin a ganggan a nepeg yon onuren ed dalin a ngalngali yo la looban tan panayaman.

Say Pasakbay a Sumpad Panangigalang ed Talintaoy Dios

¹⁵ “Anggapon balut so anengneng yo nen say Katawan et akisalitad sikayo manlapud apoy diad Palandey na Sinai. Kanyan manalwar kayo,

¹⁶ ompan mankasalanan kayo diad panggawa yoy talintaon kaparpara na antokaman, laki man o bii,

¹⁷ ayep odino manok ed tagey,

¹⁸ ayep man a korung-korung odino sira.

¹⁹ Ag kayo patutukso a mangigalang tan manlingkur ed antokaman a nanengneng yod tawen say agew, bulan, tan saray bitewen. Say Katawan a Dios yo et inter ton igalang ira ya na amin da ray arum a totoo.

²⁰ Balet sikayo ray totoon inyagel tod Egipto ya aliling toy manliub a palbaan. Impaway to kayod man pian pagmaliwen to kayon dilin totoo to a sikatoy kipapasen yo natan.

²¹ Lapud sikayo akapasnuk ed siak so Katawan a Dios yo tan imbagabaga ton ag ak makabaliw ed Ilog na Jordan ya onloob ed mataban dalin ya iter tod sikayo.

²² Siak ompatey ak ed sayan dalin tan ag kon balut nabaliw so ilog, balet sikayo ngalngali yo la nabaliw tan napanayaman iman a mataban dalin.

²³ Manalwar kayo ta ompan nalingoanan yo so impisipanan ed sikayo na Katawan a Dios yo. Onur yoy ganggan to ya ag kayo manggagawa na antokaman a talintaoy dios,

²⁴ lapud maimon tan singa manliub ya apoy so Katawan a Dios yo.

²⁵ “Anggan abaybayag kayo lan manaayam ed saman a dalin tan awalaan kayo la na saray anak tan apo, ag kayo mankakasalanan diad panggawa yoy antokaman a talintaoy dios. Maoges ya ed arap na Katawan, tan sikatoy makasengeg na pampasnuk to.

²⁶ Nitan so tawen tan say dalin a sikara natan so mantasi sumpad sikayo a no ag yo ak onuren, ag mabayag naandipat kayod dalin. Ag kayo mambayag a manayam ed dalin ed nibaliw na Jordan a ngalngali yo la napanayaman. Sigput kayon napatey.

²⁷ Say Katawan itaytayak to kayo ed saray arum a bansa tan pigpigarad sikayo so makapaliis ed patey.

²⁸ Manlingkur kayod man ed saray diriyos a ginagawa na lima, saray diriyos a kiew tan bato, saray diriyos ya ag makanengneng o makadngel tan ag da nayariay mangan o onangub.

²⁹ Diman yo anapen so Katawan a Dios yo et no ipuspuso yon anapen, narumog yo.

³⁰ No nagugunigon kayo la tan nagagawa lad sikayo ra yan amin, ompawil kayo lamlamang ed Katawan tan onuren yo.

³¹ Sikatoy mapangasin Dios. Ag to kayo ikaindan o pateyen, tan ag to lingwanan so impisipanan tod saray lalaki yo.

³² “Osisa yo so apalabas, say panaon kasakbayan na inkianak yo, manlapud impamalsay Dios ed too diad tapew na dalin. Sukimat yo so intiron mundo. Wala la kasi so agawa nen saman a matalonggaring a singa saya? Wala la kasi so akadngel na singa onyan agawa?

³³ Wala la kasi ray totoon siansian nambilay a singa sikayo kayariy impakadngel dad dios ya akisalitad sikara manlapud apoy?

³⁴ Wala la kasi so dios a sinali toy linman angalad arum a bansa na saray totoo tan impagmaliw to ran dilin totoo to, a singa ginawad sikayod man ed Egipto na Katawan a Dios yo? Anengneng na dilin mata yo so impangipapakana tod baleg a pakayari to tan say biskeg to; impapadalan to ray salot tan bakal, nanggagawa na saray milagro, saray pakelaw, tan saray makapataktakot a bengatla.

³⁵ Say Katawan impapanengneng to ra man ed sikayo, pian napaneknekan tod sikayo a bukbukor to so Dios tan anggapo lay arum.

³⁶ Inabuloy ton narengel yo so bosis ton nanlapud tawen pian nabilin to kayo; tan diad tapew na dalin inabuloy ton nanengneng yo so masanton apoy to, tan akisalitad sikayo manlapud saman ya apoy.

³⁷ Lapud inaro to ray lalaki yo, pinili to kayo, tan lapud baleg a pakayari to sikaton diliy angipaway ed sikayo manlapud Egipto.

³⁸ Legan na impankukurang yo, pinapataynan to ray bansan baleg tan makapanyari nen say sikayo pian makaloob kayo tan niiter tod sikayo so dalin da, say dalin a kayaryan yo ni ya anggad natan.

³⁹ Kanyan natan tandaan yo tan ag yon balut lilingwanan a say Katawan et Dios ed tawen tan diad dalin. Anggapoy arum a dios.

⁴⁰ Onur yo ray amin a ganggan to ya inter kod sikayo natan, et maung ya amin so pansumpalan yo tan saray kabyangay boleg yo. Mansiansia kayon manayam ed dalin ya iter ed sikayo na Katawan a Dios yo tan kayaryan yo ed anggad angga.”

Saray Siudad a Salimbengan diad Bokig na Jordan

⁴¹ Insan angibiig si Moises na taloran siudad diad bokig na Ilog na Jordan

⁴² a nayarin batikan na sakey a toon akapatey ya ag to ginagala, na kapara ton toon ag to kalaban. Nayarian toy ombatik ed sakey ed sarayan siudad et ag la nayarin pateyen.

⁴³ Diad tribu nen Ruben say nibiig a siudad say Bezer a niatagey a patar a kalawakan; diad tribu nen Gad say Ramot a sakop na dalin na Galaad; tan diad tribu nen Manases say Golan a sakop na dalin na Basan.

Saray Balikas Kasakbayan a Niiter so Ganggan na Dios

⁴⁴ Inter nen Moises ed saray totood Israel iray ganggan tan saray bangat na Dios.

^45-46 Inter to ra yan ganggan ed sikara nen akapaway irad Egipto tan wala la rad patar a bokig na Ilog na Jordan tan kasumbaliwan na baley na Bet-peor. Sayan pasen kabyangan na dalin nen Sehon ya ari da ray Amorreo a sikatoy nanoley ed baley na Hesbon. Si Moises tan saray Israelita et tinalo ray Sehon nen pinmaway irad Egipto.

⁴⁷ Nilooban dan nanayaman so dalin to tan say dalin nen Og, say ari na Basan, tan sananey ya ari da ray Amorreo a nanayam ed bokig na Jordan.

⁴⁸ Sayan dalin et manlapud baley na Aroer diad gilig na Ilog na Arnon, tan mamaarap ed baybay ya anggad Palandey na Sirion, salanti say Palandey na Hermon.

⁴⁹ Sakop to met so intiron dalin a bokig na Ilog na Jordan ya anggad Dayat ya Inatey diad abalaten tan say alusadsar na Palandey na Pisga diad bokig.