Deuteronomio 27 - Maung A Balita Biblia

Nisulat ed saray Ankakabaleg ya Bato iray Ganggan na Dios

¹ Insan si Moises, a kaiba to ray pangulo na Israel, kuantod saray totoo, “Onur yo ray amin ya ibilin kod sikayo natad sayan agew.

² Diad agew ya ibaliw yod Ilog na Jordan tan iloob yod dalin ya iiter ed sikayo na Katawan a Dios yo, mangilira kayo na saray ankakabaleg a bato, palitadaan yo ra,

³ insan yo isulat ira yan amin a ganggan tan bangat. No akaloob kayo la ed mayaman tan mataban dalin ya insipan ed sikayo na Katawan a Dios da ray lalaki yo,

⁴ tan akabaliw kayo lad Jordan, ilira yo ra yan bato ed Palandey na Ebal, onung na ibibilin kod sikayo natad sayan agew, tan palitadaan yo ra.

⁵ Manggawa kayod man na sakey ya altar a bato, balet ag kayo mangikakana na balatyang a kagawaan,

⁶ lapud saray baton ag tinabas labat so nepeg ya ikana yod amin ya altar a gawaen yo para Katawan a Dios yo. Diman kayo mangisaklang na saray bagat a popoolan,

⁷ tan diman kayo mangisaklang tan mangan na saray bagat a para kareenan, tan manliket kayod arap na Katawan a Dios yo.

⁸ Diad tapew na saray apalitadaan a bato, isulat yon malinlinew so balang salita na saray ganggan na Dios.”

⁹ Insan si Moises a kaiba to ray Levitan pari, kuantod amin a totood Israel, “Mandeen kayo tan dengel yo ak, sikayon totood Israel. Natad sayan agew nagmaliw kayon totoo na Katawan a Dios yo;

¹⁰ kanyan onur yo tan sumpal yo ray amin a ganggan to ya iiter kod sikayo natad sayan agew.”

Saray Samba a para saray Mananumlang

¹¹ Insan inkuanen Moises ed saray totood Israel,

¹² “No akabaliw kayo lad Ilog na Jordan, saray onggendan a tribu et manalagey ira ed Palandey na Gerizim tan ibawag day bindision ed saray totoo: Simeon, Levi, Juda, Isacar, Jose tan Benjamin.

¹³ Saray onggendan a tribu et manalagey ira ed Palandey na Ebal tan ibawag day samba: Ruben, Gad, Aser, Zabulon, Dan, tan Neftali.

¹⁴ Saray Levita ikolyaot da ra yan salita:

¹⁵ “‘Napelag komun so samba na Dios ed siopaman a manggawa na talintaon bato, kiew, odino mital insan to galangen ed maamut; kabosul na Katawan so pangigalangan ed saray talintaoy diriyos.’ “Insan onebat iray amin a totoo, ‘Amen!’

¹⁶ “‘Napelag komun so samba na Dios ed siopaman ya ag to igalang so ama odino ina to.’ “Insan onebat iray amin a totoo, ‘Amen!’

¹⁷ “‘Napelag komun so samba na Dios ed siopaman a mangyalis na mohun na dalin na kaabay to.’ “Insan onebat iray amin a totoo, ‘Amen!’

¹⁸ “‘Napelag komun so samba na Dios ed siopaman a mangibalang na bulag ed dalan.’ “Insan onebat iray amin a totoo, ‘Amen!’

¹⁹ “‘Napelag komun so samba na Dios ed siopaman ya ag mangiter na kanepegan da ray sangkaili, saray olila, tan saray bibiin balo.’ “Insan onebat iray amin a totoo, ‘Amen!’

²⁰ “‘Napelag komun so samba na Dios ed siopaman a mangipelag na ama to ed kababaingan diad pangakdul tod sakey ed saray asawa nen ama to.’ “Insan onebat iray amin a totoo, ‘Amen!’

²¹ “‘Napelag komun so samba na Dios ed siopaman a sipingan toy ayep.’ “Insan onebat iray amin a totoo, ‘Amen!’

²² “‘Napelag komun so samba na Dios ed siopaman ya akdulan toy biin agi to odino agi tod ama o ina.’ “Insan onebat iray amin a totoo, ‘Amen!’

²³ “‘Napelag komun so samba na Dios ed siopaman ya akdulan toy katolangan ton bii.’ “Insan onebat iray amin a totoo, ‘Amen!’

²⁴ “‘Napelag komun so samba na Dios ed siopaman a maamut a mamatey na too.’ “Insan onebat iray amin a totoo, ‘Amen!’

²⁵ “‘Napelag komun so samba na Dios ed siopaman a mangawat na kuarta a bayar na pamatey tod toon anggapoy kasalanan.’ “Insan onebat iray amin a totoo, ‘Amen!’

²⁶ “‘Napelag komun so samba na Dios ed siopaman ya ag mangonur ed amin a ganggan tan bangat na Dios.’ “Insan onebat iray amin a totoo, ‘Amen!’