Deuteronomio 26 - Maung A Balita Biblia

Saray Ibagat a Naani

¹ “No alooban yo lay dalin ya iiter ed sikayo na Katawan a Dios yo, tan panaayaman yo la,

² balang sakey ed sikayo et nepeg a mangikargad sakey a baskit na onona ran naani yo a bunga na saray tanaman yo, insan yo iyakar ed samay pasen a panangigalangan.

³ Laka yod pari a peles ton manlilingkur ed satan a panaon tan ikuanyo, ‘Birbiren ko natan ed Katawan a Dios ko ya akaloob ak la ed dalin ya insipan tod saray lalaki mi ya iter ed sikami.’

⁴ “Samay pari alaen to may baskit ed sikayo insan to igaton ed arap na altar na Katawan a Dios yo.

⁵ Insan diad arap na Katawan ibitla yo ra yan salita: ‘Say lakik et sakey ya akar-akar ya Arameo, ya inawit ton nanayam ed Egipto so pamilya to. Nen linma rad Egipto dagdaiset ira, balet nagmaliw iran baleg tan makapanyarin bansa.

⁶ Pinairap kami na saray Egipsio tan pinasoot da kamin nankimey ta aripen da kami.

⁷ Insan kinmerew kami na tulong ed Katawan a Dios na saray lalaki mi. Nadngel to kami tan anengneng toy irap mi, segsegang mi, tan say pangaskasiyan a kipapasen mi.

⁸ Diad panamegley na baleg a pakayari tan biskeg to inyagel to kamid Egipto. Nanggagawa na saray milagro tan pakelaw, tan saray makapataktakot a bengatla.

⁹ Inyakar to kami diad tan inter tod sikami yan mayaman tan mataban dalin.

¹⁰ Kanyan natan iyakar kod Katawan so sayan ononan naani ya inter tod siak.’ “Insan iyepas yon ilira ed arap na Katawan imay baskit tan mangigalang kayod man.

¹¹ Misalamat kayo lapud saray maabig a bengatla ya inter na Katawan a Dios yo ed sikayo tan say pamilya yo; insan pinabang yod liket yo iray Levita tan saray sangkaili a manaayam ed kawalaan yo.

¹² “Kapag kumatlon taon iter yod saray Levita, saray sangkaili, saray olila, tan saray bibiin balo, so kakaplon bunga na saray tanaman yo, pian iner man a baley walay napambilay da. No agawaan yo la ya,

¹³ ikuanyod Katawan, ‘Diad abung ko anggapoy atilak a masanton kakaplo; inter ko lad saray Levita, saray sangkaili, saray olila, tan saray bibiin balo, onung na ingganggan mod siak. Ag ko sinumlang o nilingwanan so dinan man a ganggan mon nipaakar ed kakaplo.

¹⁴ Ag ak amawas na kinan ko ed kakaplo nen maneermen ak; ag ak angipaway ed abung ko na parti na kakaplok nen marotak ak onung ed ganggan, tan ag ak balut angalad kakaplo na inter kon limos a para inatey. Inonur ta ka, O Katawan; ginawak ya amin so ingganggan mo nipaakar ed kakaplo.

¹⁵ Manlapud tad masanton pasen ed tawen osdungan mo pa ray totoom ya Israelita tan bindisionan mo ra; bindisionan mo pa met so mayaman tan mataban dalin ya inter mod sikami onung na insipan mod saray lalaki mi.’

Saray Dilin Totoo na Katawan

¹⁶ “Natad sayan agew say Katawan a Dios yo igaganggan to kayon mangonur ed amin da ray ganggan to; sumpal yo ra ed intiron puso yo tan kamarerwa yo.

¹⁷ Natad sayan agew binirbir yo a Dios yo so Katawan; insipan yo ya onuren yo, sumpalen iray amin a ganggan to, tan tombuken yo ray amin a bilin to.

¹⁸ Natad sayan agew say Katawan inawat to kayo a dilin totoo to onung na insipan to; tan ingganggan to kayon onuren yo ray amin a ganggan to.

¹⁹ Pagmaliwen to kayon matalonggaring nen saray arum a bansa ya inletneg to, tan sikayoy mangiter na dayew tan kagalangan ed ngaran to. Sikayoy magmaliw a dilin totoo to onung na insipan to.”