Deuteronomio 23 - Maung A Balita Biblia

Say Ag Pakapikasakey ed saray Totoo na Katawan

¹ “Ag nayarin mikasakey ed saray totoo na Katawan so siopaman a lakin kapon odino apotut so kayaryan to.

² “Ag nayarin mikasakey ed saray totoo na Katawan so siopaman ya anak ed paway odino saray anak tan apo to ya anggad kumaplon kailalakan.

³ “Ag nayarin mikasakey ed saray totoo na Katawan so siopaman ya Ammonita odino Moabita odino siopaman a kabyangan na boleg da ya anggad kumaplon kailalakan.

⁴ Ag da kayo initdan na kanen tan inomen nen mankukurang kayo a nanlapud Egipto, tan inupaan day Balaam a lakin anak nen Beor, tan taga siudad na Petor na Mesopotamia, ya isamba to kayo.

⁵ Balet say Katawan a Dios yo et ag to dinengel si Balaam; impagmaliw to ni ingen a bindision imay samba, lapud inaro to kayo.

⁶ Legan a sakey kayon bansa, ag yon balut tutulongan ira man a bansa o papaaligwasen ira.

⁷ “Ag yo bobosulen iray Edomita, ta kakanayon yo ra. Ag yo met bobosulen iray Egipsio, ta nanayam kayod man nen saman ed dalin da.

⁸ Saray kabyangay boleg da ed kumatlon kailalakan tan mantombuk iran kailalakan et nayarin mikasakey ed saray totoo na Katawan.

Say Panlinis ed Kampo da ray Sondalo

⁹ “No wala kayo ed kampo no panaoy bakal, paliisan yoy antokaman a makadotak ed sikayo onung ed ganggan.

¹⁰ No nagmaliw a marotak a sakey a laki lapud nampaterak ed kogip tod labi, nepeg ya ompaway ed kampo tan manayam ed paway.

¹¹ No onlalabi la nepeg a manames, tan diad kaselek na agew nayarian to lay ompawil ed kampo.

¹² “Nakaukolan a walay pasen a panagbawasan ed paway na kampo.

¹³ Say sakey ed saray awit yon kagawaan et say baston a kiew, pian no mambawas kayo makakotkot kayoy abut insan natabunan yo so bawas yo.

¹⁴ Pansiansia yon malinis onung ed ganggan so kampo yo, ta manaayam ed kampo yo so Katawan a Dios yo a mangyagel ed sikayo tan mangiter ed sikayo na pananalo ed saray kalaban yo. Ag kayo manggagawa na antokaman a mabanday a pangibenegan na Katawan ed sikayo.

Saray Nandoroman Ganggan

¹⁵ “No imbatikan na sakey ya aripen so amo to tan linmad sikayon paiyagel, ag yo papapawilen.

¹⁶ Nayarin manayam ed anggan dinan a baley a pilien to ed saray baley yo, tan nepeg ya ag yo pairapen.

¹⁷ “Sebel ed siopaman ya Israelita, bii may laki, so magmaliw a babayaran a too ed timplo.

¹⁸ Ontan met, say kuartan nalmoan ed onyan marotak a kagagawa et ag nayarin iyakar ya ibagat ed Timplo na Katawan a Dios yo diad panumpal na sakey a sinambaan a sipan. Sebel so onya, lapud kabosul na Katawan iray marotak a babayaran a totoo ed Timplo.

¹⁹ “No mangipabayes kayo na kuarta odino kakanen odino antokaman ed kapara yon Israelita, ag yo papaabangan.

²⁰ Nayarin paabangan yo so ipautang yo ed siopaman a sangkaili, balet aleg ed kapara yon Israelita. Tombuk yo yan ganggan, et say Katawan a Dios yo bindisionan toy antokaman a gawaen yo no wala kayo lad dalin a panayaman yo.

²¹ “No manggawa kayoy sinambaan a sipan ed Katawan a Dios yo, sumpal yon sumpal; say Katawan anapen tod sikayo so insipan yo, tan kasalanan yo no ag yo iter so insipan yo.

²² Aliwan kasalanan so ag pansipan a sinambaan ed Katawan

²³ balet no mabolbolus kayon mangisipan, sumpal yon andi-saew.

²⁴ “No manakar kayod basbas na kaubasan na siopaman, nayarian yoy mangan na labalabay yon bunga, balet ag nepeg a mangikarga kayod pananginan insan yo awiten.

²⁵ No manakar kayod basbas na katrigowan na siopaman, nayarian yoy mangan na anggan anton karakel na naalay lima yo, balet ag nepeg a manggapas kayo.