Deuteronomio 21 - Maung A Balita Biblia

Nipaakar ed Inatey ya ag Amtay Amatey ed Sikato

¹ “Anto so gawaen no wala bilang so sakey a toon arumog a pinatey ed alog, diad dalin ya iter ed sikayo na Katawan a Dios yo, tan ag yo amta no siopay amatey ed sikato?

² Nepeg a laen na saray pangulo tan saray huis yo, ta sukaten da so kaarawi manlapud pasen ya akarumogan ed sikato ya anggad saray asingger a baley.

³ Insan saray pangulo na baley a sankaasinggeran ed akarumogan na bangkay et nepeg a mamili ra na sakey a kilaw na baka ya ag nin balut nisinta.

⁴ Iyakar da ed sakey a pasen ya asingger ed kolus ya ag balut nanaekatan, tan ag nin balut abaka o ataneman so dalin a kawalaan to, insan dad man balekneen so beklew to may baka.

⁵ Onla met irad may Levitan papari, lapud sikaray manintinsia ed kason walay apasakitan odino adesiang. Say Katawan a Dios yo et pinili to ran manlingkur ed sikato tan mamindision ed ngaran to.

⁶ Insan amin da ray pangulo na baley a sankaasinggeran ed samay pasen ya akalmoan ed samay bangkay na toon pinatey orasan dad tapew na samay baka so kalimaan da

⁷ tan ikuanda, ‘Ag mi pinatey iman a too tan ag mi amta no siopay amatey ed sikato.

⁸ Katawan pirdonam pa ray totoon Israelita ya impaway mod Egipto. Pirdona mo kami pa, tan ag mo kami tetelen ed impamatey ed toon anggapoy kasalanan.’

⁹ Kanyan diad panumpal yod pagagawa na Katawan, ag kayo napakasalanan ed sayan impamatey.

Nipaakar ed Bibiin Adakep Kayariy Bakal

¹⁰ “No say Katawan a Dios yo et panaloen to kayod bakal tan wala ray totoon nadakep yo,

¹¹ nayarin makanengneng kayo na sakey a magangganan bii a labay yon asawaen.

¹² Isempet yod abung yo a diman mankiskis na olo to, mankoko,

¹³ tan mampales. Nepeg a manayam ed abung yo tan ermenan ton sakey bulan iray ateng to; kayari to ya, nayari yo lan asawaen.

¹⁴ No diad idalan na panaon et ag yo la labay, nepeg ya ibolus yo la. Bangta pinasoot yon akiakdulan, ag yo nayarin ipasen a sakey ya aripen insan yo ilako.

Nipaakar ed Tawir na Pangulowan a Laki

¹⁵ “Anto so gawaen no wala bilang so sakey a lakin duaray asawa to tan naanakan to ran dua na lalaki, balet say pangulowan et aliwan anak na biin labalabay to?

¹⁶ No sayan too et apagen to lad saray anak to so kayaryan to, ag to nepeg a palabian so anak ton laki ed samay labalabay ton asawa diad pangiter to na betang na samay pangulowan ya anak ton laki.

¹⁷ Nepeg ya iter tod samay pangulowan ya anak ton laki so duaran betang na saray kayaryan to, anggaman a sikatoy anak na samay ag to labalabay ya asawa. Nepeg a sayan too birbiren toy pangulowan ya anak ton laki tan iter tod sikato so apag a kanepegan ya awaten to.

Nipaakar ed Aliwan Matoluk ya Anak a Laki

¹⁸ “Antoy gawaen no bilang ta walay sakey a too a walay sakey ya anak ton laki ya anawet so olo to tan bangar, sakey ya anak ya ag ontoluk ed saray ateng to, anggaman a dudusaen da?

¹⁹ Saray ateng to et nepeg ya iyarap dad saray pangulo na baley a panaayaman to ta pasalaysay da.

²⁰ Saramay ateng ikuandad saramay pangulo, ‘Anawet so olo na sayan anak mi, bangar, tan ag ontoluk ed sikami; mandadarak labat na kuarta tan buanges.’

²¹ Insan saray totood siudad tupaken da may anak ya anggad ag to ipatey, et diad ontan napaandi yan kaogsan. Narengelan na amin a totood Israel so agawa et ontakot ira.

Saray Nandoroman Ganggan

²² “No pinatey so sakey a too lapud ginawa ton ambelat a kasalanan tan imbitin ed sakey a kiew so bangkay to

²³ ag nepeg a natilak diman a sanlabi. Nepeg a nipompon ed saman met lamlamang ya agew, lapud say bangkay ya akabitin ed kiew et ipelag tod dalin so samba na Dios. Ipompon yoy bangkay, pian ag yo narotakan so dalin ya iiter ed sikayo na Katawan a Dios yo.