Daniel 7 - Maung A Balita Biblia

INSALAYSAY NEN DANIEL IRAY PASINGAYEW ED SIKATO (7:1–12:13) Saray Apatiran Ayep a Nipasingayew ed kinen Daniel

¹ Diad ononan taon na panaari nen Belsasar ed Babilonia, walay sakey a kogip ko tan akanengneng ak na sakey a pasingayew ed labi, tan sikato yay nisulat ko

² nipaakar ed anengneng ko ed saman a labi: Onsisiplug ed tapew na dayat so dagem a manlalapud amin a dapag.

³ Sinmakbit ed gilig na dayat so apatiran ankakabaleg ya ayayep a nandoromaan ira.

⁴ Say onona singa lion so nengneng to, balet wala ray payak to a singa saray payak na agila. Nen ombabantay ak, nakal ira may payak to. Niatagey imay ayep tan nipaalagey a singa too. Insan niiter ed sikato so kanunotan na too.

⁵ Say kumadwan ayep et singa uso ya akaalagey ed saginonur iran sali to. Sankatangal to ray taloran taglang tan walay bosis a nankuan ed sikato, “Sigi, mangan ka labat na karni ed anggaay nayarian mo!”

⁶ Nen ombabantay ak, sakey lamet ya ayep so pinmaway. Singa liopardo so nengneng to, balet walay apatiran payak ed beneg to a singa ra payak na manok, tan apatiray olo to. Niiter ed sikato so pakaoley.

⁷ Legan kon ombabantay, pinmanengneng so kumapat ya ayep; makapanyari, makapataktakot tan mabisbiskeg ya ayep. Nginasngas tod saray ankakabaleg a balatyang a ngipen to iray pinatey to, insan to ra ginatin-gatinan. Nidomad saramay talora ta walay samploran saklur to.

⁸ Nen nenengnengen ko ra may saklur to, anengneng kon ontutubod kawalaan da so sakey a melag a saklur. Binagut toy taloran saklur ed saramay wadman la. Sayan saklur wala ray mata ton matay too tan walay sangi ton mapasirayew a mansalita.

Say Pasingayew a Nipaakar ed Samay Mambibilay ya Anggad Angga

⁹ Nen onnenengneng ak, nilira iray trono. Inmirung ed sakey a trono imay mambibilay ya anggad angga. Singa poti na yilo so kawes to, tan singa puron abel a lana iray buek to. Manliub so trono ton nilirad saray apoy a dalig,

¹⁰ tan panlalapwan na managagos ya apoy. Libo-libon totooy wadman a manlilingkur ed sikato, tan manalalagey ed arap to iray milyon a totoo. Ginmapo la so bista, tan alokasan iray libro.

¹¹ Nen onnenengneng ak, sankarengel ko ni may melag a saklur a malangas tan mapasirayew a mansasalita. Nen ombabantay ak, apatey imay kumapat ya ayep, tan nibantak ed manliub ya apoy so bangkay to tan diman dinmapul.

¹² Nakal ed saramay arum ya ayep so pakayari ra, balet naabuloyan iran mambilay a walay getar.

¹³ Legan na sayan pasingayew ed labi, anengneng koy singa sakey a too. Onsisingger ed siak, ya aliber na saray lorem, tan linmad samay mambibilay ya anggad angga tan niparontal ed sikato.

¹⁴ Naitdan imay too na pakaoley, kagalangan, tan pakayari na ari, pian makapanlingkur ed sikato iray totoo ed amin a bansa ya anggan antoy kolor na baog da tan salita ra. Mansiansia so pakaoley to, tan ag mangangga so panarian to.

Nipaliwawa ray Pasingayew

¹⁵ Lapud saramay nipasingayew ed siak, apagaan tan agunigon ak.

¹⁶ Inasinggeran koy sakey ed saramay manalalagey diman tan kinerew kod sikaton ipaliwawa ton amin iray pasingayew. Kanyan imbaga tod siak so kabaliksan dan amin.

¹⁷ Inkuanto, “Saramay ankakabaleg ya ayep et apatiran impirio ya onletaw ed tapew na dalin.

¹⁸ Saray totoo na Sankatageyan a Dios et awaten da so panarian tan anggad anggan mansiansiad sikara yan panarian.”

¹⁹ Insan ko nampilalekan a naamtaan so nipaakar ed samay kumapat ya ayep a nidomad saramay arum ya ayayep—samay makapataktakot ya ayep a biningbingkas tod saray gansan koko to tan nginasngas tod saray balatyang a ngipen to iray pinatey to, insan to ra ginatin-gatinan.

²⁰ Nilabay ko met a naamtaan so nipaakar ed saramay samploran saklur ed olo to tan say saklur a tinmombuk a tinmubo tan pinapelag toy talora ed saramay saklur. Wala ray mata to tan sakey a sangi tan mapasirayew a mansasalita. Makapataktakot ni nen saramay arum.

²¹ Nen onnenengneng ak, akibakal imay saklur ed saray totooy Dios tan tinalo to ra.

²² Insan sinmabi may mambibilay ya anggad angga tan sinintinsiaan ton analo ra may totoo na Sankatageyan a Dios. Sinmabiy panaon ya awaten na saray totooy Dios so panarian.

²³ Sikato yay paliwawan niiter ed siak: “Samay kumapat ya ayep et say kumapat ya impirio ya onletaw diad tapew na dalin tan nidoma ed amin da ray arum ya impirio. Mekmeken toy intiron mundo, insan to gatin-gatinan.

²⁴ Saramay samploran saklur et saray samploran arari a manoley ed samay impirio. Insan onletaw so sakey ya ari a nidoma ed saramay akaona lan ari tan taloen toy talorad sikara.

²⁵ Mansalita na sumpad Sankatageyan a Dios tan pairapen to ray totoo na Dios. Salien ton omanen iray ganggan na rilihion da tan saray pista ra, tan oleyan ton taloy taon tan kapaldua iray totoo na Dios.

²⁶ Insan nasintinsiaan ed mangatatawen a korti, naekal so pakayari to, tan naderal a sigput.

²⁷ Niiter ed saray totoo na Sankatageyan a Dios so pakayari tan inkatalonggaring na amin a nanarian ed tapew na dalin. Ag mangangga so nanarian da; manlingkur tan ononur ed sikara iray amin a manoley diad tapew na dalin.”

²⁸ Sikato yay samput na samay inkagawa. Ataktakot ak a maung kanyan pinmotiy bosaleg ko, tan pinokuk kod siak a dili ira yan amin ya agawa.