Daniel 6 - Maung A Balita Biblia

Si Daniel ed Abut a Kawalaan da ray Lion

¹ Kinaliktan nen Dario so impanoro to na sanlasus tan duamplon gobirnador ed intiron impirio to.

² Pinili to si Daniel tan duaran lalaki a mangasikaso ed saray gobirnador tan mangimano na pankaabigan na ari.

³ Ag abayag impanengneng nen Daniel so inkatalona tod kimey ed saramay duaran kapara ton opisyal tan saramay gobirnador. Lapud inkatalona ton tuloy ed panagkimey, ginetma na ari ya ipasen ton makaoley ed intiron nanarian.

⁴ Lapud saya saramay duaran mangaasikaso ed saray opisyal tan saramay gobirnador et nananap iray kasalanan nen Daniel a nipaakar ed panangikurang tod impirio pian nidalem da, balet anggapoy narumog da, lapud matoor si Daniel ed kimey to tan ag to manggagaway antokaman a makapoy odino kasaolan.

⁵ Inkuanda sirin ed sakey tan sakey, “Ag itayon tua makarumog na antokaman a pakapangidaleman tayod Daniel, no ag ingen dia labat ed panumpal toy ganggan na Dios to.”

⁶ Kanyan linma rad ari tan inkuanda, “Mambilay komun ya anggad angga so Kagalang ya Ari Dario!

⁷ Sikami ran mangikukurang na oley ed impiriom—saray makaoley, saray gobirnador, saray sumisimbawa, tan saray arum nin opisyal—et nampapaknaan mi a say Kagalang ya Ari et mangipaakseb komun na ganggan tan nepeg a mapeget so pamasumpal ed satan a ganggan. Iganggan mo a diad loob na talomploy agew anggapoy siopaman a naabuloyan a mikerew na antokaman a bengatla ed dinanman a dios odino siopaman a too likud labat ed Kagalang ya Ari. Siopamay onsumlang ed sayan ganggan et nepeg ya ibuntok ed maawang ya abut a kawalaan da ray amayamay a lion.

⁸ Kanyan, Kagalang ya Ari, ipaakseb mo komun yan ganggan tan pirmaan mo, et magmaliw a sakey a ganggan na saray taga Media tan Persia, tan ag balut naoman.”

⁹ Kanyan pinirmaan nen Ari Dario imay ganggan.

¹⁰ Nen naamtaan nen Daniel ya apirmaan la may ganggan, sinmempet lad abung. Diad sakey a kuartod tagey na abung to, wala ray bintana ya akaarap ed Jerusalem. Onung na gagawaen to lawas, mamitlod sanagew a tinmalimukor a nampikasi tan akisalamat ed Dios to.

¹¹ Nen anengneng na saramay kalaban nen Daniel a mampipikasid Dios to,

¹² linma ran amin ed ari ta idalem day Daniel. Inkuanda, “Kagalang ya ari, ag mo ta pinirmaan so sakey a ganggan a diad loob na talomploy agew siopamay toon onkerew na antokaman a bengatla ed dinanman a dios odino diad siopaman a too likud ed sika et nepeg ya ibuntok ed baleg ya abut a kawalaan da ray lion?” Inmebat so ari, “Tua tay kuanyo; sakey man a ganggan na saray taga Media tan Persia, tan ag balut naoman.”

¹³ Insan inkuandad ari, “Si Daniel a sakey ed saray nibantak a nanlapud Juda et ag to papagalangan so Kagalang ya Ari odino oonuren so ganggan ya impaakseb mo. Inagew-agew a mamitlon mampikasi.”

¹⁴ Nen nadngel ya na ari, mapalaloy inkagunigon to tan anggad inselek na agew ginawa toy anggaay nayarian to a mangyagel ed kinen Daniel.

¹⁵ Insan pinmawil ed sikato ra may lalaki tan kuandad sikato, “Kabat na Kagalang ya Ari ya onung ed saray ganggan na saray taga Media tan Persia, anggapoy nepeg a naoman a ganggan ya impaakseb na ari.”

¹⁶ Kanyan ingganggan na ari ya erelen si Daniel tan ibontuk ed maawang ya abut a kawalaan da ray lion. Inkuantod kinen Daniel, “Iyagel ka komun na Dios a matoor mon panlilingkuran.”

¹⁷ Niiyan ed samay sangab na abut so baleg a bato tan say ari intimbri tod samay bato so dilin timbri to tan say timbri na saramay manonan opisyal to, pian anggapoy makapangyagel ed kinen Daniel.

¹⁸ Insan pinmawil so ari ed palasio tan sanlabin ag akaogip, ag balut angan odino nanliket ed antokaman.

¹⁹ Diad palbangon binmangon imay ari tan nangganat a linmad samay abut.

²⁰ Kasabi tod samay abut, mapagpagan kinmulyaot, “Daniel ya aripen na mabilay a Dios! Ayarian kan niagel ed saray lion na Dios a matoor mon panlilingkuran?”

²¹ Inmebat si Daniel, “Mambilay komun ya anggad angga so Kagalang ya Ari!

²² Imbaki na Dios ko so anghil to ya amepet ed sangi da ray lion, pian ag da ak napasakitan. Ginawa to ya, ta amta to ya anggapoy kasalanan ko tan anggapoy maoges a ginawak ed sika, Kagalang ya Ari.”

²³ Ontan lay impakaliket na ari tan ingganggan to ya aonen ed abut si Daniel. Kanyan inaon da tan anengneng da ya ag balut asakitan, ta nanmatalek ed Dios.

²⁴ Insan ingganggan na ari ya erelen ira may lalakin angidalem ed kinen Daniel tan impaibontuk to ra, pati saray kaasawaan da tan saray anak da, ed samay abut a kawalaan da ray lion. Kasakbayan ya asabi ray kaaralman na abut, asimpayut la ra na saray lion tan tinetemek day amin a pokel da.

²⁵ Insan sinulat nen Ari Dario iray totoo ed amin a bansa, anggan antoy kolor na baog da tan salita ra: “Maabig komun so kipapasen yon amin a sabien to yan ganggan ko.

²⁶ Igaganggan ko ed intiron impiriok a nepeg a takotan tan galangen na amin a too so Dios nen Daniel. “Sikatoy mabilay a Dios, tan sikatoy manoley ed ando lan ando. Ag balut naderal so panarian to, tan ag balut mangangga so pakayari to.

²⁷ Sikato so mangilalaban tan mangyaagel; manggagawa na saray milagro tan saray pakelaw diad tawen tan diad dalin. Inyagel toy Daniel ed pamatey na saray lion.”

²⁸ Inmaligwas si Daniel legan na impanoley nen Dario tan legan na impanoley nen Ciro a taga Persia.