Amos 7 - Maung A Balita Biblia

Say Nipasingayew iran Dorun

¹ Walay impasingayew ed siak na Katawan a Dios. Diad sayan pasingayew anengneng koy Dios ya amalsa na amayamay a dorun sanen kakkapanggapas ed saray trigon kayaryan na ari tan sanen ontutubo lamet iray dika.

² Anengneng kon inaakan na saray dorun iray amin a dikan tinmutubo ed dalin. Insan inkuanko, “Katawan a Dios, pirdonam pa ray totoom! Panoy kilaban da? Makapoy tan daiset ira!”

³ Inoman na Katawan so kanunotan to kanyan inkuanto, “Ag nagawa so anengneng mo.”

Say Nipasingayew a Pool

⁴ Walay sananey ya impasingayew ed siak na Katawan a Dios. Diad sayan pasingayew anengneng koy Dios a mampaparaan a dusaen tod pool iray totoo to. Pinoolan la na apoy so baleg a dayat ed dalem na dalin tan ginapwan to lan poolan so dalin.

⁵ Insan inkuanko, “Patondam pa, Katawan a Dios! Panoy kilaban da ray totoom? Makapoy tan daiset iran tuloy!”

⁶ Inoman lamet na Katawan so kanunotan to, kanyan kuanto, “Ag met ya nagawa!”

Say Nipasingayew a Patawin

⁷ Walay sananey ya impasingayew na Katawan ed siak. Diad sayan pasingayew anengneng koy Katawan a manalalagey ed abay na padir a pinatawinan nen impaalagey, tan sankabembenan toy sakey a patawin.

⁸ Tinepet tod siak, “Amos, antoy sankanengneng mo?” “Sakey a patawin,” ebat ko. Insan inkuantod siak, “Ikakanak yan patawin ta labay kon ipanengneng ed saray totook a singa ra sakey a padir ya aliway patawin to. Ag ko la omanen lamet so kanunotan ko diad panusak ed sikara.

⁹ Naderal iray pasen a pangigagalangan na saray kabyangay boleg nen Isaac. Nataynan ya aderal-deral iray masanton pasen na Israel. Panganggaen kon manari iray kabyangay boleg nen Ari Jeroboam.”

Di Amos tan Amasias

¹⁰ Diad saman say pari ed Betel, a si Amasias, kuantod kinen Ari Jeroboam na Israel: “Kokompluten nen Amos iray totoo ya onsumpad sika. Naderal so bansa lapud saray ipupulong to.

¹¹ Saya so kuanto: ‘Ompatey ed bakal si Jeroboam, tan saray totood Israel naala rad dilin bansa ra tan nibantak irad arum a bansa.’”

¹² Insan inkuanen Amasias ed kinen Amos, “Tonda ka la, propita! Pawil ka lad Juda tan diman ka la mampulong. Pabayaran kad sikarad man ed pampulong mo.

¹³ Ag ka la dia mampropropisiya ed Betel. Sikato yay pasen a panangigalangan na ari, say timplo ed intiron bansa.”

¹⁴ Inmebat si Amos, “Aliwa ak a propita odino anak na propita. Managkomponi ak na saray karniro, tan managasikasod ak na kakiewan na igos.

¹⁵ Balet say Katawan inekal to ak ed kimey kon pumapastol tan ingganggan to ya onla ak a mampropisiya ed saray totoo ton Israel.

¹⁶ Kanyan dengel ka natan ed ibabagay Katawan. Ibabagam ya ontonda ak a mampropisiya, ya ontonda ak a mampulong sumpad saray totood Israel.

¹⁷ Lapud saya, Amasia, say Katawan kuantod sika. ‘Magmaliw a marotak a bii ed siudad so asawam tan napatey ed bakal iray anak mo. Naapag-apag so dalin mo tan niiter irad saray arum a totoo, tan napatey kad bansa da ray pagano. Andi-saew a saray totood Israel et naala rad dilin bansa ra tan nibantak irad arum a bansa.’”