Amos 5 - Maung A Balita Biblia

Say Tawag a Nipaakar ed Pagbabawi

¹ Dengel kayo, sikayon totood Israel, ed sayan kantan para tolur a kantaen kod sikayo:

² Atumba la so birhin ya Israel, Ag lan balut makabangon! Ataynan ed dalin, Anggapoy ontulong a mamangon ed sikato.

³ Say Katawan a Dios kuanto, “Mangibabaki na sanlibon sondalo so sakey a siudad na Israel balet sansanlasus so ompapawil ed sikara; mangibabaki na sanlasus a sondalo so sananey a siudad balet samsamploray ompapawil ed sikara.”

⁴ Say Katawan kuantod saray totood Israel, “Dago kayod siak, et mambilay kayo.

⁵ Ag kayo oonlan mangigalang ed Beer-seba. Ag yo ak aanapen ed Betel, ta anggapoy pansumpalan na Betel. Ag kayo oonlad Gilgal, ta pangaskasiyan a nibantak ed arum a bansa iray totoo to.”

⁶ Singger kayod Katawan, et mambilay kayo. No ag kayo onsingger ed Katawan, sikatoy mamalanit a singa apoy ed saray totood Israel. Poolan na apoy iray totood Betel, tan anggapoy makaerep ed pool.

⁷ Pangaskasiyan kayo la, sikayon mamipikewet ed katonungan tan manlalames ed saray totoo!

⁸ Say Katawan pinalsa to ray bitewen, say Pleiades tan Orion. Pagmamaliwen ton liwawa so bilonget tan agew so labi. Tatawagen to ray danum na dayat tan ikakalbo to rad tapew na dalin. Yahweh so ngaran to.

⁹ Dederalen to ray makapanyari tan saray tirinsira ra.

¹⁰ Sikayo ran totoo et kabosul yoy siopaman ya onsusumpa ed kaogsan tan sasalitaen tod korti so intiron katwaan.

¹¹ Pinapairap yo ray mairap-bilay tan tinatakew yo ray trigo ra. Kanyan ag kayo manayam ed saray marakep a binaton abung ya ipapaalagey yo odino oninom ed alak a manlapud saray mararakep ya ubas ya itatanem yo.

¹² Amtak iray ambelat a kasalanan yo tan saray dakerakel a ginagawa yon kaogsan. Pinapairap yo ray maung a totoo, nanaawat kayoy pasoksok, tan sinesebelan yo ray mairap-bilay diad pakagamur day katonungan ed saray korti.

¹³ Kanyan diad sarayan maoges a panaon maung lay ag oneseesel so too.

¹⁴ Pian mambilay kayo say kamaungan so pampilalekan yon gawaen, aliwan say kaogsan. Diad satan say Katawan a Dios a Makapanyarin-amin so peteg a niwalad sikayo onung na ibabaga yo.

¹⁵ Bosul yoy kaogsan, aro yoy kamaungan, et nanengneng yod satan ed saray korti ya ontalona so katonungan. Angangko kasian na Katawan iray totoon atilak nin mabilay ed sayan bansa.

¹⁶ Kanyan say Katawan a Dios a Makapanyarin-amin kuanto, “Walay nagawan panaagugolan tan panaakisan ed saray dalan. Anggan saray dumaralus natawag iran milamay a kaiba da ray inupaan a milamay.

¹⁷ Walay nagawan panaagugolan ed amin da ray kaubasan. Nagawa ra ya, ta onsabi ak a manusad sikayo.” Say Katawan so nansalita.

¹⁸ Pangaskasiyan so kipapasen yo, sikayo ran mampilalek ed isabi na agew na Katawan! Antoy kaabigan a niiter ed sikayo na saman ya agew? Para sikayo, saman ya agew et agew na kabilongetan, aliwan agew nan liwawa.

¹⁹ Saman ya agew et aliling toy toon ibabatikan toy lion balet ta nabet toy uso! Odino singa toon kasempet tod abung et inkapa tod padir so lima to, balet kinetket na oleg!

²⁰ Bilonget, aliwan liwawa, so iter na agew na Katawan; agew ya ambilbilonget, anggapon balut so liwawa.

²¹ Say Katawan kuanto, “Kabosul ko ray pista yo; ag ak manliket ed sikara!

²² No mangyakar kayod siak na saray bagat a popoolan tan saray bagat a trigo ag ko ra awaten. Ag ko awaten iray pinataba yon ayayep ya iyakar yon bagat ed siak.

²³ Tondaan yo ray maingal a kanta yo; ag ko labay a dengelen iray togtog na saray arpa yo.

²⁴ Ingen, onagos komun a singa kolus so katonungan, tan say kaptekan et singa ilog komun ya ag balut naekatan.

²⁵ “Totood Israel, diad loob na apataplon taon na impangiwanwan kod sikayo ed kalawakan, ag ko kinaukolan ed sikayon mangyapay kayod siak na saray bagat.

²⁶ Balet natan, lapud inggagalang yo ray talintao nen Sakut, say dios yon ari, tan si Kaiwan, say dios yon bitewen, nepeg yo ra yan awiten a talintao

²⁷ no awiten ta kayon ibantak ed dalin a labas na Damasco,” kuay Katawan a say ngaran to et Makapanyarin-amin a Dios.