3 Juan 1 - Maung A Balita Biblia

¹ Sayan sulat nanlapud Masiken— Diad sika, pinablin Gayo a petepeteg kon inararo.

² Pinablin kaaro, pikakasik a diad amin a bengatla wala ka komun ed maung a kipapasen tan mabiskeg komun so laman mo—a singa say amtak a kinabiskeg na maispiritun bilay mo.

³ Malikeliket ak nen sinmabi ray pigaran agagin angibalita a matoor kad katwaan tan mambibilay kad katwaan.

⁴ Anggapo lay makapaliket ed siak nen say pakarengel koy balitan mambibilay ed katwaan iray anak ko.

Adayew si Gayo

⁵ Pinablin kaaro, talagan matoor kad panaglingkur mod saray agagi, anggaman ya ag mo ra kabat.

⁶ Impaamta rad iglisia dia so panangarom. Lalon maabig no tulongan mo ra ed pambiabiahi ra, onung na makapaliket ed Dios.

⁷ Ta linma ran manlingkur ed Cristo, tan ag ira mangaawat na antokaman a tulong a manlapud saray Hintil.

⁸ Nepeg ti ran tulongan ira yan totoo sirin, pian makapinabang tayod kimey dan pangikayat na katwaan.

Si Diotrefes tan si Demetrio

⁹ Nansulat ak ed iglisia; balet si Diotrefes, a labay toy magmaliw a pangulo ra, et ag to inawat iray ibabagak.

¹⁰ Kanyan no onla ak ditan, tawagen koy imano to nipaakar ed saray ginagawa to: saray maoges a salitan impantatalobutob tod sikami. Ag ni apera ed sayan ginagawa to. Anta ag to la awaten iray agagin onsabi, sesebelan to ray malabay a mangawat ed sikara tan papaekalen to ni ra ed iglisia!

¹¹ Pinablin kaarok, ag mo aaligen so maoges a kagagawa; say maung so alig mo. Say toon manggagaway kamaungan et kayaryan na Dios, balet say toon manggagaway kaogsan et ag to anengneng so Dios.

¹² Maung so pantatasi na balang sakey nipaakar ed kinen Demetrio; say katwaan so dilin mantatasi. Tasian mi met, tan amtam a katwaan so ibabaga mi.

Saray Kaonuran a Pabano

¹³ Amayamay ni ray labay kon ibagad sika, balet aliwa lan diad panamegley na sulat.

¹⁴ Iilaloan kon magano lay pakapannengneng tan pakapantongtong ta.

¹⁵ Nawalaan ka komuy kareenan. Ibabano da ka ray kakaaro ta dia. Ibanoan mo ak pad saray wadtan a kakaaro ta—balang sakey ed sikara.