2 Saray Awaran 36 - Maung A Balita Biblia

Si Ari Joacas na Juda

¹ Pinili na saray totood Juda si Joacas a lakin anak nen Josias, insan da nilanaan ed Jerusalem ya onsalat ed kinen ama to.

² Duamplo tan taloy taon to nen nagmaliw ya ari na Juda, tan nanoley ed Jerusalem na taloy bulan.

³ Adakep nen Ari Neco na Egipto si Joacas tan impanbuis toy Juda na talon libo tan liman lasus a kilon pilak, tan talomplo tan liman kilon balituk.

⁴ Impasen ton ari na Juda si Eliakim a lakin agi nen Joacas tan sinalatan toy ngaran to na Joakim. Inawit nen Neco si Joacas ed Egipto.

Si Ari Joakim na Juda

⁵ Duamplo tan limay taon nen Joakim nen nagmaliw ya ari na Juda, tan nanoley ed Jerusalem na labinsakey taon. Nanggagawa na kaogsan ed arap na Katawan a Dios to.

⁶ Nilooban nen Ari Nabucodonosor na Babilonia so Juda, adakep toy Joakim, tan inawit ton agolunggolungan ed Babilonia.

⁷ Inala nen Nebucodonosor so pigaran kayamanan na Timplo, insan to ra inyan ed palasio Tod Babilonia.

⁸ Saray arum a ginagawa nen Ari Joakim ed pati saray makapaingungot a kagagawa to tan say kaogsan a ginagawa to et nikorit ira ed Say Awaran da ray Ararid Israel tan Juda. Si Joakin a lakin anak to so sinmalat ed sikaton nanari.

Si Ari Joakin na Juda

⁹ Labinwaloy taon nen Joakin nen nagmaliw ya ari na Juda, tan nanoley ed Jerusalem na taloy bulan tan samploy agew. Nanggagawa met na kaogsan ed arap na Katawan.

¹⁰ Nen sinmabiy tiagew, si Ari Nabucodonosor inawit toy Joakin a sakey a priso ed Babilonia, tan inala to ray kayamanan na palasioy ari. Insan si Nabucodonosor ginawa ton ari na Juda tan Jerusalem si Sedekias a pangamaen nen Joakin.

Si Ari Sedekias na Juda

¹¹ Duamplo tan sakey so taon nen Sedekias nen nagmaliw ya ari na Juda, tan nanoley ed Jerusalem na labinsakey taon.

¹² Nanggagawa na kaogsan ed arap na Katawan, tan ag dinmengel a sipapabeba ed kinen propita Jeremias ya angibawag na salitay Katawan.

Say Inkatalo na Jerusalem

¹³ Linmaban si Sedekias ed Ari Nabucodonosor ya amasoot ed sikaton mansamba diad ngaran na Dios a magmaliw a matoor ed ari. Anawet so puso to kanyan ag nagbabawi o pinmawil ed Katawan a Dios na Israel.

¹⁴ Ontan met, saray pangulo na Juda, saray papari, tan saray karaklan et ag da tinoor so Dios, ta inalig da ray kaogsan da ray bansan walad kaliber-liber da diad impangigalang dad saray talintaoy diriyos. Diad onya, dinotakan day Timplo a pinasanto na Katawan.

¹⁵ Intuloy na Katawan a Dios na saray lalaki ra so angibaki na saray totoon mamasakbay ed sikara, lapud labay ton niagel iray totoo to tan say Timplo to.

¹⁶ Balet niludlurey da ray totoon imbabaki na Dios, ag da dinengel iray salita to, tan inelek-elekan da ray propita to. Diad kaonuran, ontan lay pasnuk na Katawan ed sikara kanyan ag la ra makapaliis.

¹⁷ Kanyan imbaki na Katawan so ari na Babilonia ya ondogpad sikara. Pinapatey na ari iray tobun-balon lalaki a taga Juda, anggan diad Timplo. Anggapoy panangasi to ed anggan siopa, malangwer may matakken, laki may bii, mansasakit may maksil so laman. Say Dios impalima to ran amin ed sikato.

¹⁸ Say ari na Babilonia inala to ray kagawaan ed Timplo, saray kayamanan a walad panagsinupan ed Timplo, tan saray kayamanan na ari tan saray opisyal to, insan to ra inawit ya amin ed Babilonia.

¹⁹ Pinoolan toy Timplo tan say siudad, pati saray palasio to tan saray kayamanan to, insan inggeba to ray padir na siudad.

²⁰ Siopaman ya apaliisan toy patey et inawit ira nen Nabucodonosor ed Babilonia, tan diman to ra inaripen, pati saray kabyangay boleg da, ya anggad inkiletneg na Impirio na Persia.

²¹ Sikato yay impakasumpal na samay impasakbay na Katawan diad panamegley nen propita Jeremias: “Magmaliw ya andi-kabaliksan a pitomploy taon so dalin, pian nasalatan iray ag angilinan ya Agew na Panagpainawa.”

Ingganggan nen Ari Ciro ya Ompawil iray Judio

²² Nen ononan taon na panooley ed Babilonia nen Impirador Ciro na Persia, imbaga na Katawan ed sikato a mangipaakseb na sakey a ganggan, paisulat to, insan to paibasay maksil ed inerman a pasen ed impirio. Agawa ya pian napatwa so imbaga na Katawan diad panamegley nen propita Jeremias.

²³ “Sikato ya so ganggan nen Ciro ya Impirador na Persia. Say Katawan a Dios na Tawen ginawa to ak a manoley ed intiron mundo tan ingganggan to ak a mamaalagey na sakey a timplo to diad Jerusalem na Juda. Amin yo sirin a totoo na Dios, pawil kayo lad Jerusalem. Mila komun ed sikayo so Katawan a Dios yo.”