2 Saray Awaran 35 - Maung A Balita Biblia

Sinilibraan nen Josias so Paskua

¹ Sinilibraan nen Josias ed Jerusalem so Paskua ya impamagalang tod Katawan; nen kumalabinapat agew na ononan bulan pinatey da ray ayayep a para pista.

² Inter tod saray papari iray nepeg dan gawaen ed Timplo tan binilin to ran apigeren dan gawaen iray kimey da.

³ Binilin to met iray Levita a bumabangat na Israel a nisaklang iran manlingkur ed Katawan. Inkuantod sikara, “Iyan yoy masanton Kaban na Sipanan ed Timplo ya impaalagey nen Ari Solomon a lakin anak nen David. Ag yo la natan saksakbaten ya iyalis-alis, no ag ta panlingkuran yoy Katawan a Dios yo tan saray totoo ton Israel.

⁴ Laka yod Timplo tan manayam kayod pasen a niganad boleg a nanlapwan yo, onung ed saray kimey ya impapabetang ed sikayo nen Ari David tan si Ari Solomon a lakin anak to.

⁵ Apiger yon togyupen so sikayon dili pian wala ray pigarad sikayon makatulong ed balang pamilya na saray totood Israel.

⁶ Sikayo ray mamatey ed saray kordiro tan saray kanding a para Paskua. Linisan yo lay sikayon dili onung ed ganggan tan iparaan yo ray bagat, pian saray kapara yon Israelita et onuren da ray bilin ya inter na Katawan ed panamegley nen Moises.”

⁷ Angiter si Ari Josias na talomplon libon karniro, kordiro, tan malangwer a kanding tan talon libon bakan kalakyan ya ikana na saray totoo no Paskua; dilin ayayep to ra ya.

⁸ Angiter met iray opisyal to na ikana na saray totoo, saray papari, tan saray Levita. Insan saray opisyal na Timplo a di Hilcias, Zacarias, tan Jehiel, initdan da ray papari na duanlibo tan anem a lasus a kordiro tan malangwer a kanding, tan talon lasus a bakan kalakyan ya ibagat no pista.

⁹ Saray pangulo na saray Levita a di Conanias, Semaya tan say agi ton laki a si Natanael, Hasabias, Jeiel, tan Jozabad et angiter ira na liman libon kordiro tan malangwer a kanding, tan liman lasus a bakan kalakyan ya ibagat na saray Levita no Paskua.

¹⁰ Nen niparaan lan amiy nakaukolan ed Paskua, saray papari tan saray Levita linma rad pasen da onung na ingganggan na ari.

¹¹ Kayarin apatey ira may kordiro tan saramay kanding, kinatat ira na saray Levita, balet inwawalsik na saray papari ed tapew na altar so dala.

¹² Insan da inapag-apag ed saray totoo, onung na saray grupo na pamilya, ira may karni na ayayep a para bagat a popoolan, pian nibagat da onung na saray bilin a walad Ganggan nen Moises.

¹³ Inkakalut na saray Levita iray bagat a para Paskua, onung ed saray totontonen. Inlalambung dad saray banga, kaldiro, tan saray kawali iray masanton bagat, insan masiglat dan imbubunog so karni ed saray totoo.

¹⁴ Kayari to ya, saray Levita imparaanan da na karni so sikaran dili tan saray paparin kabyangay boleg nen Aaron, lapud saray papari et ag ira akatonda ya anggad labi iray papari a nampopool na saray bagat a popoolan tan say taba na saray imbagat.

¹⁵ Saray tumutogtog tan saray kumakanta a kabyangan ira na boleg nen Asaf et wala rad saray pasen ya impabetang ed sikara nen Ari David: Asaf, Heman, tan Jedutun a propita na ari. Ag kinaukolan na saray guardiad saray puirta na Timplo ya ontaynan irad saray pasen da, lapud saray Levita et imparaanan da la ra na Paskua.

¹⁶ Kanyan lapud ganggan nen Ari Josias, niparaan ed saman ya agew iray amin a nakaukolan ed pangigalang ed Katawan, pampistay Paskua, tan pangisaklang na saray bagat a popoolan ed tapew na altar.

¹⁷ Pitoy agew a sinilibraan na amin a totood Israel a wala rad Jerusalem so Paskua tan say Pista na Tinapay ya Anggapoy Libadura.

¹⁸ Nanlapu lad samay panaon nen propita Samuel, anggapo niy singa onyan impansilibra na Paskua. Anggapoy arum ya arin nansilibra na Paskua a singa sayan impansilibra di Ari Josias, saray papari, saray Levita tan saray totood Juda, Israel, tan Jerusalem,

¹⁹ nen kumalabinwalon taon na panooley nen Josias.

Say Samput na Impanoley nen Josias

²⁰ Kayari na saray amin a ginagawa nen Ari Josias para Timplo, impangulo nen Ari Neco na Egipto iray sondalo to a mibakal ed Carkemis diad gilig na Ilog na Eufrates. Nilabanan nen Josias si Neco,

²¹ balet angibakiy Neco na saray totoo tan impaikuanto, “Sayan pibabakal ko et anggapoy pibabalim, Ari na Juda. Ag ak dia linman mibakal ed sika, no ag ingen diad saray kalaban ko tan imbaga na Dios a mangganat ak. Kaibak so Dios, kanyan ag mo lalabanan, ta no ipasoot mo pateyen to ka.”

²² Balet ag sinmener si Josias. Ag to dinengel so ibabaga na Dios diad panamegley nen Ari Neco, kanyan ag nampabirbir a linman akibakal ed patar na Megido.

²³ Legan na bakal, apana na saray Egipsio si Ari Josias, kanyan ingganggan tod saray katulong to, “Iyarawi yo ak ta mapalaloy inkasugat ko.”

²⁴ Inekal dad karwahi to, inkarga rad sananey a karwahi ton wadman, insan da inyakar ed Jerusalem. Inatey diman tan nipompon ed kamposanto da ray arari. Nanermen ya amin iray totood Juda tan Jerusalem lapud impatey to.

²⁵ Nanggaway propita Jeremias na kantan panermen ed kinen Ari Josias, tan nagmaliw ed Israel a kantaen ya na saray lalaki tan bibii no manermen irad sikato. Narumog yan kanta ed tipon na saray kantan panermen.

²⁶ Saray arum a ginagawa nen Ari Josias, say panangaro tod Katawan, say panangonur tod Ganggan,

²⁷ tan say impanbilay to manlapud gapo ya anggad samput et nikorit ira ed Say Awaran da ray Ararid Israel tan Juda.