2 Saray Awaran 34 - Maung A Balita Biblia

Si Ari Josias na Juda

¹ Waloy taon nen Josias nen nagmaliw ya ari ed Juda, tan nanoley ed Jerusalem na talomplo tan sakey taon.

² Ginagawa toy makapaliket ed Katawan; inalig to ray ginagawa nen laki ton Ari David, ta mapeget ton inonur ya amin iray ganggan na Dios.

Pinatonda nen Josias so Paganon Panangigalang

³ Nen kumawalon taon na panooley nen Ari Josias, nen ogaogaw ni, ginapwan to lan inggalang so Dios na laki ton Ari David. Kayariy apat taon ginapwan ton dinederal iray pasen a panangigalangan na saray pagano, saray tanda na diosan Asera, tan saray arum nin talintaoy diriyos.

⁴ Diad panangiwanwan to dinederal na saray totoo to iray altar a panangigalangan ed kinen Baal, inggegeba da ray kaabay dan altar a panagpoolan na insinso. Minemekmek da ya anggad dinmabuk iray talintao nen Asera tan saray arum a talintaoy diriyos, insan intatayak day dabuk ed saray lobuk da ray totoon nambabagat ed sarayan diriyos.

⁵ Pinoolan to ray pokel da ray paganon papari diad tapew na saray altar ya angigalangan da. Diad impanggagawa tod sarayan amin impagmaliw ton malinis lamet onung ed ganggan so Juda tan say Jerusalem.

⁶ Onya met so ginawa tod saray siudad tan saray aderal a lugar na Manases, Efraim, tan Simeon tan anggad Neftali diad baybay.

⁷ Diad intiron Nanarian ed Baybay, dinederal to ray altar tan saray tanda na Asera, minemekmek to ya anggad dinmabuk iray talintaoy diriyos, tan tinetemek ton amin iray altar a panagpoolan na insinso. Insan pinmawil ed Jerusalem.

Say Impakarumog ed Libro na Ganggan

⁸ Nen kumalabinwalon taon na panooley nen Ari Josias, kayari ton nilinisan onung ed ganggan so bansa tan say Timplo, imbaki ton manapiger na Timplo na Katawan a Dios to si Safan a lakin anak nen Azalia, si Maasias, say gobirnador na Jerusalem, tan si Joas a lakin anak nen Joakaz, sakey ya atagey ya opisyal.

⁹ Nipalima ed kinen Hilcias a Pangulon Pari so kuarta ya akoliktad Timplo na saray Levitan guardia. (Sayan kolikta et iniiter na saray taga Efraim, Manases, tan saray arum nin pasen ed Nanarian ed Baybay tan saray taga Juda, Benjamin, tan Jerusalem.)

¹⁰ Insan nipalima yan kuarta ed saramay makaoley ed panaapiger na Timplo, insan da inter ed

¹¹ saray karpintiro tan saray managpaalagey, ta isaliw da na saray bato tan saray tablan ikana ed panaapiger ed saray paalagey a pinaolyan na saray ararid Juda a naboluk.

¹² Napanmatalkan a sigput iray nankimey. Saray angipangulod sikara et si Jahat tan si Obadias a kabyangan iray Levitan boleg nen Merari, tan si Zacarias tan si Mesullam a kabyangan iray Levitan boleg na Coat. (Marunong ed musika iray amin a Levita.)

¹³ Saray arum a Levita et sikaray angipangulo ed panagsakbat na saray ikakana tan sikaray kapatas ed saray totoon walad nandoroman kimey. Sikritario odino guardia na Timplo iray arum a Levita.

¹⁴ Nen ipapaway da ra may kuarta ed kuarton panagsinupan, nalmo nen Hilcias so libro na Ganggan na Katawan, samay Ganggan ya inter na Dios ed kinen Moises.

¹⁵ Inkuantod kinen Safan, “Nalmok diad Timplo so libro na Ganggan.” Inter tod Safan imay libro,

¹⁶ insan inyakar nen Safan ed ari. Inkuanto, “Sinumpal mi ray amin ya ingganggan mo.

¹⁷ Inala mi ray kuartan nisinup ed Timplo insan mi ra inter ed saray kumikimey tan saray kapatas da.”

¹⁸ Insan to inyarum ya inkuan, “Niay libron inter ed siak nen Hilcias.” Insan maksil ton imbasa imay libro ed ari.

¹⁹ Nen nadngel na ari so impangibasad libro, ginebyas toy kawes to lapud ermen to.

²⁰ Ingganggan to ra di Hilcias, Ahicam a lakin anak nen Safan, Abdon a lakin anak nen Mica, Safan a sikritario na korti, tan si Asaya a mananulong na ari:

²¹ “Lakayo ta ipanonan yo ak ed Katawan tan amin iray totoon atilak nin manaayam ed Juda tan Israel. Amtaen yo so nipaakar ed saray bangat na sayan libro. Mamapasnuk so Katawan ed sikatayo, lapud ag inonur na saray lalaki tayo so salita na Katawan tan ag da ginawa so ibabaga na sayan libro.”

²² Lapud ganggan na ari, si Hilcias tan saray arum et linma ran angipanon ed sakey a biin manngaran na Hulda, sakey a propita a manaayam ed balo nin kabyangan na Jerusalem. (Say asawa to yan bii a si Sallum ya anak nen Tocat tan apo nen Hasra et sikatoy makaoley ed saray kawes ya isosolung na saray papari no manlingkur irad Timplo.) Imbaga rad kinen Hulda iray agawa,

²³ insan to impaikuan ed ari

²⁴ ira yan salita na Katawan: “Dusaen koy Jerusalem tan amin da ray totoo to onung ed saray samban nisulat ed samay libron nibasa ed ari.

²⁵ Impolisay da ak tan nambabagat irad saray arum a diriyos, kanyan impanpasnuk da ak lapud amin a ginagawa ra. Pinmetang so olok ed Jerusalem, et ag ombetel.

²⁶ No nipaakar ed ari, siak, say Katawan a Dios na Israel, kuanko: Dinengel moy nisulat ed samay libro,

²⁷ nampatauli ka tan nampaabeba kad siak; ginebyas moy kawes mo tan manakakis ka nen nadngelan mo no panoy panusak ed Jerusalem tan saray totoon manaayam diman. Nadngel koy pikakasim,

²⁸ kanyan no inatey ka la so panusak ed Jerusalem. Iyabuloy kon mareen so ipatey mo.” Pinmawil ed kinen Ari Josias ira may totoo tan imbaga ra yan salita.

Akisipanan si Josias ya Onuren toy Katawan

²⁹ Impaawit nen Josias iray amin a pangulo na Juda tan Jerusalem,

³⁰ insan ira nambabansag a linmad Timplo, a kaolup da ray papari tan saray propita, tan amin da ray arum a totoon manaayam ed Jerusalem, mayaman may mairap-bilay. Imbasa na ari diad arap dan amin so intiron libro na sipanan ya arumog ed Timplo.

³¹ Nanalagey si Josias ed abay na lusek a para ari, insan akisipanan ed Katawan ya onuren toy Katawan, sumpalen to diad intiron puso tan kamarerwa to iray ganggan tan bilin to, tan gawaen to iray kakaukolan na sipanan onung na nisulat ed samay libro.

³² Impaisipan tod saray totood Benjamin tan amin da ray wadwad Jerusalem a sumpalen da so sipanan. Kanyan sinumpal na saray totood Jerusalem so nepeg dan gawaen lapud impisipanan dad Dios na saray lalaki ra.

³³ Dinederal nen Ari Josias iray amin a makapaingungot a talintaon walad dalin a kayaryan na saray totood Israel. Legan na impanbilay to, pinatoluk to ray totoo a manlingkur ed Katawan a Dios na saray lalaki ra.