2 Saray Awaran 33 - Maung A Balita Biblia

Si Ari Manases na Juda

¹ Labinduay taon nen Manases nen nagmaliw ya ari na Juda, tan nanoley ed Jerusalem na limamplo tan limay taon.

² Nanggagawa na kaogsan ed arap na Katawan, diad impangaalig tod saray makapaingungot ya ogali da ray totoon pinapataynan na Katawan legan a mankukurang iray totoo to.

³ Pinapasimbalo ton impaalagey iray paganon pasen a panangigalangan a dinederal nen Ezekias ya ama to. Nanggagawa na saray altar a panangigalangan ed Baal, saray talintao na diosan Asera, tan inggagalang to ray bitewen.

⁴ Nanggawad Timplo na saray altar a panangigalang na saray pagano, anta say Timplo so pasen ya imbaga na Katawan a pangigalangan ed sikato.

⁵ Diad duaran patio na Timplo nanggawa na saray altar a pangigalangan ed saray bitewen.

⁶ Insaklang ton bagat a popoolan ed Patar na Hinom iray lalakin anak to. Nambubuyon tan nansasalamangka; nampapanon ed saray managpalar tan saray manangipanon ed saray ispiritu na inaatey. Mapalaloy impankasalanan tod Katawan, kanyan impanpasnuk to.

⁷ Angyan na sakey a talintao ed Timplo. Onyay inkuan na Katawan ed kinen David tan si Solomon a lakin anak to nipaakar ed sayan Timplo: “Diad Jerusalem, diad ed sayan Timplo, so pasen a pinilik ed amin da ray lugar na labinduan tribu na Israel a pangigalangan ed siak.

⁸ No onuren na saray totood Israel ya amin iray bilin ko, tan sumpalen day intiron Ganggan ya inter ed sikara nen Moises ya aripen ko, ag ko ra abuloyan a napataynan ed dalin ya inter kod saray lalaki ra.”

⁹ Inlagyat nen Manases iray totood Juda a mankasalanan na ambelat ni nen saray kasalanan a ginagawa da ray totoon pinapataynan na Katawan legan a mankukurang iray totoo to.

Nagbabawiy Manases

¹⁰ Anggaman a pinasakbayan na Katawan si Manases tan saray totoo to, siansian ag da dinengel.

¹¹ Kanyan inabuloyan na Katawan a looban na saray pangulo da ray sondalo na Asiria so Juda. Adakep day Manases, kinawetan da, binalur da na gansan golunggolung, insan da inawit ed Babilonia.

¹² Nampaabeba nen maniirap, inmasingger ed Katawan a Dios to, insan kinmerew na tulong.

¹³ Dinengel na Dios so pikakasi nen Manases tan inebatan to diad panamegley na impangyabuloy ton makapawil ed Jerusalem tan manoley lamet. Diad saya anisiay Manases a say Katawan et Dios.

¹⁴ Kayari to ya, pinaatagey nen Manases so padir a walad bandad paway diad nibokig na Siudad nen David manlapud sakey a pasen ed patar ya asingger ed Sobul na Gihon diad baybay na Puirtay Sira tan diad Ofel a sakop na siudad. Angipasen met na opisyal na saray sondalo ed balang siudad ya aliber na padir.

¹⁵ Ineekal tod Timplo iray diriyos na arum a bansa tan samay talintaon inyan tod man nen saman. Ineekal to met iray paganon altar a walad pokdul a panalalageyan na Timplo tan diad saray arum a pasen ed Jerusalem; inyakar tod paway na siudad ira yan ineekal to, insan to ra imbabantak.

¹⁶ Inapiger to met so altar ya angigagalangan ed Katawan, insan angisaklang diman na saray bagat a para kareenan tan saray bagat a pangiter na pisasalamat. Ingganggan to ray amin a totood Juda a panlingkuran day Katawan a Dios na Israel.

¹⁷ Anggaman ya intuloy na saray totoo so nambabagat ed saray arum a pasen a panangigalangan, say Katawan labat so angibagatan da.

Say Samput na Impanoley nen Manases

¹⁸ Saray arum a ginagawa nen Manases, say pikakasi tod Dios to, tan saray sinalita na saray propitan nansalitad sikato diad ngaran na Katawan a Dios na Israel et nikorit iran amin ed Say Awaran da ray Ararid Israel.

¹⁹ Say pikakasi na ari tan say ebat na Dios ed sayan pikakasi, saray ginagawa ton kasalanan tan kaogsan kasakbayan a nagbabawi—saray ginagawa ton pasen a panangigalangan na saray pagano tan saray tanda na diosan Asera, tan saray talintaoy diriyos ya inggagalang to et nikorit iran amin ed Say Awaran da ray Propita.

²⁰ Inatey si Manases tan nipompon ed palasio, insan si Amon a lakin anak to so sinmalat ed sikaton nanari.

Si Ari Amon na Juda

²¹ Duamplo tan duay taon nen Amon nen nagmaliw ya ari na Juda, tan nanoley ed Jerusalem na duay taon.

²² Nanggagaway kaogsan ed arap na Katawan a singa si ama ton tan Manases, inggagalang to ray talintaoy diriyos ya inggalang nen ama to.

²³ Balet ag to inalig si ama ton nampaabeba tan inmasingger ed Katawan; mapalalo niy ginagawa ton kaogsan nen si ama to.

²⁴ Nankokomplut iray opisyal nen Amon sumpad sikato, insan da pinatey ed palasio.

²⁵ Pinatey na saray totood Juda ira may amatey ed kinen Amon tan ginawa ran ari si Josias a lakin anak to.