2 Saray Awaran 32 - Maung A Balita Biblia

Tinaktakot na saray taga Asiria iray taga Jerusalem

¹ Kayari na sarayan agawgawa, say matoor ya impanlilingkur nen Ari Ezekias ed Katawan, nilooban nen Ari Senakerib na Asiria so Juda. Nilakob to ray siudad ya aliber na padir, tan inganggan tod saray sondalo to ya igeba da ray padir pian makaloob ira.

² Nen anengneng nen Ezekias a dogpaan met nen Senakerib so Jerusalem,

^3-4 ginetma to tan saray opisyal to a patondaen day danum ed paway na siudad, pian anggapoy danum da ray taga Asiria no kaasingger dad Jerusalem. Impangulo na saray opisyal iray amayamay a totoon pinmaway ed siudad tan sinaraan da ray amin a sobul, pian anggapoy ompaway a danum.

⁵ Pinabiskeg na ari so siudad diad impangapiger tod padir, impamaalagey tod saray tori ed tapew na padir, tan impamaalagey to na kumadwan padir ed bandad paway. Inapiger to met imay pasen a tinabonan diad nibokig na daan a parti na Jerusalem, tan nampapagawa na amayamay a pika tan samper.

⁶ Impasen na ari iray amin a lalaki ed siudad diad silong na panangipangulo na saray opisyal na sondalo, insan to ra impantitipon ed plasa diad puirta na siudad. Inkuantod sikara,

⁷ “Mampabiskeg kayo tan ag yo patatalawey linawa yo; ag yo tatakotan so impirador na Asiria odino saray sondalon ipapangulo to. Mabiskeg niy pakayarin walad sikatayo nen say pakayarin walad sikato.

⁸ Walad sikatoy pakayari na too, balet walad sikatayoy Katawan a Dios tayo ya ontulong ed sikatayo tan milaban ed saray pibakalan tayo.” Apabiskeg so linawa da ray totoo lapud sarayan balikas na ari ra.

⁹ Ag abayag, nen wala nid Lakis si Senakerib tan saray sondalo to, angibaki na saray totoo to ed kinen Ezekias tan saray totood Juda a kaiba tod Jerusalem tan impaikuanto:

¹⁰ “Siak, Senakerib, say Impirador na Asiria, tetepeten kod sikayo ran totoo no antoy panmamatalkan yod pansiasiansia yod Jerusalem, anta nalalakob la?

¹¹ Ibabagad sikayo nen Ezekias a say Katawan a Dios yo so mangyagel ed sikayo ed pakayari mi, balet titilaan to kayo; paolyan to kayon ompatey ed eras tan inkapgaan.

¹² Sikatoy nandederal ed saray pasen a panangigalangan tan saray altar, insan to imbagad saray totood Juda tan Jerusalem a mangigalang tan mampool ira na insinso ed saksakey ya altar labat.

¹³ Ag yo ta amta so ginagawa na saray lalakik tan siak ed saray totoo na arum a bansa? Ayarian ta na saray diriyos na arum a bansa ya inyagel ed impirador na Asiria so totoo ra?

¹⁴ Ayarian ta na saray diriyos na arum a bansa ya inyagel ed sikami so bansa ra? Anto sirin so ipapangaya yon niagel kayo na dios yo?

¹⁵ Ag kayo la sirin patitilaan odino papaibalang ed kinen Ezekias. Ag yo sisigsiaen! Anggapoy dios na anggan anton bansa ya akayarin angyagel ed saray totoo to ed pakayari na siopaman ya impirador na Asiria. Kanyan andi-duaruwan ag kayo niagel na satay dios yo!”

¹⁶ Saray opisyal na saray taga Asiria et mapalalo niy imbabaga ran pamaoges ed Katawan a Dios tan si Ezekias ya aripen na Katawan.

¹⁷ Diad samay sulat nen impirador na Asiria nileglemew ton mapalalo so Katawan a Dios na Israel. Inkuantod samay sulat, “Saray diriyos na saray bansa et ag da ayarian ya inyagel iray totoo ra ed pakayarik. Ontan met say dios nen Ezekias et ag to niagel ed pakayarik iray totoo to.”

¹⁸ Ineyag na saramay opisyal yan balikas diad salitay Hebreo, pian nataktakot tan napabetel so linawa da ray totood Jerusalem a wala rad tapew na padir na siudad, et diad ontan mainomay a nadakep so siudad.

¹⁹ Diad panagsalita ra impara ray Dios na Jerusalem ed saray diriyos na arum a totoo, saray talintaoy diriyos a ginagawa na limay too.

²⁰ Insan si Ari Ezekias tan si propita Isaias a lakin anak nen Amoz nampikasi rad Dios tan kinmerew iray tulong to.

²¹ Say Katawan angibaki na sakey ya anghil ya amatey ed saray masesebeg a sondalo tan saray opisyal na saray sondalo na Asiria. Naplag ed kababaingan a pinmawil ed Asiria so impirador. Aminsan ya agew nen sikatoy walad timplo na dios to, pinatey na pigaran anak ton lalaki diad panamegley na ispada.

²² Onya so impangyagel na Katawan ed kinen Ari Ezekias tan saray totood Jerusalem ed pakayari nen Senakerib ya impirador na Asiria, tan dia met ed pakayari na arum a kalaban da. Impanari na Katawan so kareenan ed amin a pasen.

²³ Amayamay iray totoon linmad Jerusalem a sankaawit da ray bagat dad Katawan tan saray rigalo rad kinen Ezekias; kanyan nanlapud saman ya agawa, igagalang na amin a totood arum a bansa si Ezekias.

Say Sakit tan say Panagpaatagey nen Ezekias

²⁴ Diad sayan panaon, nansakit si Ezekias tan ngalngali inatey. Nampikasid Katawan, et say Katawan initdan to na sakey a tanda ya onabig.

²⁵ Balet ontan lay impanpaatagey nen Ezekias ta ag to anggan impanengneng so pisasalamat tod Katawan ya amaabig ed sikato. Lapud saya nanliknay kairapan iray totood Juda tan Jerusalem.

²⁶ Diad kaonuran balet, nampaabeba si Ezekias tan saray totood Jerusalem, kanyan ag dinusa na Katawan iray totoo legan na impanbilay nen Ezekias.

Say Kayamanan nen Ezekias tan say Kagalangan to

²⁷ Nagmaliw a mayamyaman si Ezekias, tan igagalang na balang sakey a too. Nanggawa na saray kuarton panagsinupan na saray balituk, pilak, mabmabli ran bato, rikado, samper tan saray arum ni ran mabmablin kayaryan to.

²⁸ Angipaalagey met na saray panagsinupan na trigo, alak, tan larak na oliba; angipaalagey met na saray koral da ray baka tan saray karniro to.

²⁹ Likud nid saraya, say Dios initdan to na saray karniro tan saray baka tan ontan lan karakel na arum nin kayamanan, kanyan angipaalagey na amayamay a siudad.

³⁰ Si Ari Ezekias so anara na papawayan na Sobul na Gihon, insan to impaarap ya onagos ya anggad sakey a pasen ed dalem na saray padir na Jerusalem. Inmaligwas si Ezekias ed amin da ray ginagawa to.

³¹ Kanyan anggan nen sinmabi ray taga Babilonia a nibakin manosisad nidoma-doman agawa ed bansa to, inabuloyan na Dios si Ezekias a gawaen toy labay ton dili pian nasubok so petepeteg ya inkatoo to.

Say Samput na Impanoley nen Ezekias

³² Saray arum a ginagawa nen Ari Ezekias tan say panangaro tod Katawan, et nikorit ira ed Say Pasingayew ed kinen Propita Isaias a Lakin Anak nen Amoz tan diad Say Awaran da ray Ararid Juda tan Israel.

³³ Inatey si Ezekias tan nipompon ed niatagey a parti na kamposanto da ray arari. Pinagalangan na amin da ray totood Juda tan Jerusalem si Ezekias diad impatey to. Si Manases a lakin anak to so sinmalat ed sikaton nanari.