2 Saray Awaran 31 - Maung A Balita Biblia

Pinasimbalo nen Ezekias so Maispiritun Bilay da ray Totoo

¹ Kayari na pista, amin da ray totood Israel linma rad balang siudad na Juda tan minemekmek da ray baton lusek, binabatang da ray tanda na diosan Asera, tan dinederal da ray altar tan saray paganon pasen a panangigalangan. Onya met so ginagawa ra ed arum a pasen na Juda tan diad saray dalin na Benjamin, Efraim, tan Manases, insan la ra sinmempet.

² Pinasimbalo nen Ari Ezekias so togyup da ray papari tan saray Levita. Diad sayan togyup da niiter ed balang sakey so kanepegan ton kimeyan. Saraya so kimey da: say pangisaklang na bagat a popoolan tan say bagat a para kareenan, say pibiang ed panangigalang ed Dios diad Timplo, tan say pangiter na dayew tan pisasalamat diad nandoroman pasen na Timplo.

³ Naniiter so ari na dilin ayayep to ya isaklang a bagat a popoolan kapag kabwasan tan labi, tan saray ibagat no Agew na Panagpainawa, Pistay Balon Bulan, tan arum ni ran pista onung na nisulat ed Ganggan na Katawan.

⁴ Ingganggan ni na ari a mangyakar iray totood Jerusalem na saray bagat a nepeg ya iter ed saray papari tan saray Levita, pian niiter day arum a panaon da ed panumpal day Ganggan na Katawan.

⁵ Kapangipaakseb ed ganggan na ari, angyaakar iray totood Israel na saray rigalo ran sankaabigan a trigo, alak, larak na oliba, dilo, tan arum ni ran bungay dalin. Inyaakar da met iray kakaplo na antokaman a kayaryan da.

⁶ Inyaakar na amin da ray totoon manaayam ed saray siudad na Juda so kakaplo na saray baka tan saray karniro ra. Inyaakar da met iray amayamay a rigalo ran isaklang dad Katawan a Dios da.

⁷ Diad kumatlon bulan so inggapo na isabi na saray rigalo tan nansiansian apat bulan.

⁸ Nen anengneng nen Ari Ezekias tan saray opisyal to so karakel na niiter, inggalang day Katawan tan intanduro da ray totoo ton Israelita.

⁹ Akisalitay ari ed saray papari tan saray Levita nipaakar ed sarayan rigalo.

¹⁰ Si Azarias a Pangulon Pari tan kabyangay boleg nen Sadoc kuantod kinen Ezekias, “Nanlapu lad samay panaon a saray totoo et inyaakar dad Timplo iray rigalo ra, duga so kakanen; dakerakel ni ingen so soluk mi. Binindisionan na Katawan iray totoo to kanyan wala ra yan amin ed sikami.”

¹¹ Onung ed ganggan na ari, angiparaan ira na saray kuarton panagsinupan ed solar na Timplo,

¹² insan da insinup iray amin a rigalo tan saray kakaplo pian anggapoy nabalang. Anoro ra na sakey a Levitan si Conanias a sikatoy makaoley ed saramay kuarto tan tinoro ran katulong to si agi ton laki a si Simei.

¹³ Samploran Levita iray atoron mankimey diad panangiwanwan da; di Jehiel, Azazias, Nahat, Asael, Jerimot, Josabad, Eliel, Ismakias, Mahat, tan Benaya. Saray anoro ed saraya et si Ari Ezekias tan si Azarias a Pangulon Pari.

¹⁴ Si Core a lakin anak nen Imna tan sakey a Levita a pangulo da ray guardia ed Puirtay Bokig na Timplo, so makaoley a manawat tan mangibunog na saray rigalon nisaklang ed Katawan.

¹⁵ Diad arum iran siudad a panaayaman na saray papari, matoor a tinmulong ed sikato ira yan Levita: Eden, Minyamin, Jesua, Semaya, Amarias, tan Secanias. Nambubunog ira na kakanen da ray kapara ran Levita onung ed saray kimey da,

¹⁶ aliwan onung ed nanlapwan dan boleg. Inyapag da so balang sakey a lakin mantaon na talomplo a mampaatagey a walay inagew-agew a kimey to ed Timplo onung na bebembenan ton betang.

¹⁷ Niiter ed saray papari iray kimey da onung na saray nanlapwan dan boleg, balet saray Levitan mantaon na duamplo a mampaatagey onung ed grupon kawalaan da.

¹⁸ Nipalista ran amin a pati saray kaasawaan da, saray anak da, tan saray arum a manaayam ed sikara, ta nakaukolan a sipaparaan ira lawas a manumpal na saray masanton kimey da.

¹⁹ Diad saray paparin manaayam ed saray siudad a nipabetang ed saray kabyangay boleg nen Aaron, odino diad saray panagpastolan a sakop na sarayan siudad, wala ray napampiaan a lalakin mangibunog na kakanen ed amin a lalakin kabyangay pamilya na pari tan diad balang sakey a walad listaan na saray boleg na Levita.

²⁰ Ginagawa nen Ari Ezekias ed intiron Juda so matunong tan say makapaliket ed Katawan a Dios to.

²¹ Maaligwas si Ezekias, lapud antokaman a ginagawa to nipaakar ed Timplo odino pangonur tod Ganggan, ginagawa to lapud masimoon ya inkatoor tan panangaro tod Dios to.