2 Saray Awaran 3 - Maung A Balita Biblia

¹ Inggapo nen Ari Solomon ya impaalagey so Timplo na Katawan ed Jerusalem diad tapew na Palandey na Moria, a diay pinayawaran na Katawan ed kinen Ari David ya ama nen Solomon. Imparaan la ya nen David a pasen, a sikato ya may kawalaan na panagilikan nen Arauna a Jebuseo.

² Ginmapo so impangipaalagey nen kumadwan bulan na kumapat a taon na panaari nen Solomon.

³ Say Timplon impaalagey nen Ari Solomon et talomplon mitro so karokey to tan samploran mitro so kaawang to.

⁴ Say kuarton lolooban et samploran mitro a kaparay kaawang na Timplo, tan anemaplon mitro so kaatagey to. Inokupan na puron balituk so dalem na kuarto.

⁵ Say manonan kuarto et adingdingan na tablan sidro tan inokupan na puron balituk. Nikorti dia ray kiew a palmira tan saray golunggolung.

⁶ Dinikoraan na ari so Timplo na mararakep iran alahas tan balituk a sinasaliw ed dalin na Parvaim.

⁷ Inookup to so balituk ed saray dingding na Timplo, saray pagsen, saray lolooban, tan saray puirta. Saray kumikimey inkokorti rad dingding iray kirubin.

⁸ Say bandad dalem a kuarto, a tatawagey Sankasantosan a Pasen, et samploran mitro so karokey to tan samploran mitro so kaawang to a kaparay kaawang na Timplo. Duamplo tan liman tonilada a balituk so nikanan impanookup ed saray dingding na Sankasantosan a Pasen:

⁹ duamplon onsan balituk so nikana ed impanggawa na saray pasak. Inokupan met na balituk iray dingding na saray kuarton walad tagey.

¹⁰ Nanggawa met so ari na duaran kirubin a mital, inokupan to ra na balituk, insan to ra inyan ed Sankasantosan a Pasen,

^11-13 a diman ira nanampar ya akaalagey a sankaarap day lolooban. Sanderwa ray payak a duaran mitroy karokey so balang sakey. Akaonat iray payak da; nandiwitan irad pegley na kuarto tan sinmabi ra ya anggad nantopag a dingding, kanyan binenlagan day samploran mitro a sikatoy kaawang na kuarto.

¹⁴ Nanggawa met so ari na kurtinan para Sankasantosan a Pasen; ginawad pinon linen tan abel iran asul, purpura, tan ambalanga tan binordaan na indengan na saray kirubin.

Saray Duaran Gansan Lusek

¹⁵ Nanggawa so ari na duaran lusek a labinanem a mitro so kaatagey na balang sakey, insan to ra inyan ed arap na Timplo. Balang sakey walay olo to a duaran mitroy kaatagey to.

¹⁶ Nanggawa na saray golunggolung tan insabit to ran singa kadina ed toktok da ra may lusek. Nanggawa met na sanlasus a gansan granada tan insasabit to rad saramay golunggolung.

¹⁷ Nipaalagey ed duaran dapag na lolooban na Timplo: samay walad abalaten angaranan na Jakin, tan samay walad baybay angaranan na Booz.