2 Saray Awaran 28 - Maung A Balita Biblia

Si Ari Acaz na Juda

¹ Nagmaliw ya ari si Acaz nen mantaon na duamplo, tan nanoley ed Jerusalem na labinanem taon. Ag to inalig iray maung a ginagawa nen laki ton Ari David; ginagawa to ingen so aliwan makapaliket ed Katawan,

² ta inalig to ray ginagawa na saray ararid Israel. Nampagawa na saray mital a talintao nen Baal;

³ nampopool na insinso ed Patar na Hinom; tan insaklang ton bagat a popoolan ed saray talintaoy diriyos so anggan saray dilin anak ton lalaki, ta inalig toy makapaingungot a kaogaliyan na saray totoon pinataynan na Katawan legan a mankukurang iray Israelita.

⁴ Nambabagat tan nampopool na insinso si Acaz diad saray paganon pasen a panangigalangan, diad saray pokdul, tan diad silong na balang masalumpapak a kiew.

Say Impibakal na Juda ed Siria tan Israel

^5-6 Lapud nankasalanan si Ari Acaz, impatalo na Katawan a Dios to ed ari na Siria; amayamay a totoo na Juda so adakep na sayan ari tan insempet to ra ed Damasco. Si Acaz impatalo met na Katawan ed ari na Israel a si Peca a lakin anak nen Remalias; sanlasus tan duamplon libon sondalo na Juda so apatey na sayan ari ed loob na sakey agew. Say Katawan a Dios na saray lalaki ra et inyabuloy ton nagawa ya ed saray Judio, lapud inkaindan da.

⁷ Si Zicri a sondalon Israelita pinatey to ra di Maasias a lakin anak nen Acaz, Azricam a makaoley ya inkargadod palasio, tan Elcana ya opisyal ya onkumadwad ari.

⁸ Anggaman a kadalaan da ray totoo na Juda saray totoo na Israel dinakep da so duanlasus libo a bibii tan ogogaw tan insempet da ra ed Samaria, a pati amayamay a bengatlan asamsam da.

Si Propita Obed

⁹ Manaayam ed Samaria so sakey a lakin manngaran na Obed, sakey a propita na Katawan. Inabet to ra may ompapawil a sondalon Israelita ya onloloob la rad siudad tan kuanto, “Akapasnuk ed Juda so Katawan a Dios na saray lalaki yo kanyan impadakep to rad sikayo. Balet nadngelan to a lapud mapalalon petang na olo yo pinapatey yo ra

¹⁰ tan natan getma yon aripenen iray lalaki tan saray bibiin taga Jerusalem tan Juda. Ag yo ta amta a nankasalanan kayo met ed Katawan a Dios yo?

¹¹ Dengel yo ak! Agagi yo ra yay adakep yo. Papawil yo la ra, ta no andi dusaen kayo na Katawan diad pasnuk to.”

¹² Apatiran pangulon lalaki a taga ra Nanarian ed Baybay so sinmumlang met ed gagawaen na saray sondalo; sarayan apatiran lalaki et di Azarias a lakin anak nen Johanan, Berekias a lakin anak nen Mesillemot, Ezekias a lakin anak nen Sallum, tan Amasa a lakin anak nen Hadlai.

¹³ Inkuanda, “Ag yo dia aawiten ira tan a priso! Mapalalo lay impankasalanan tayod Katawan kanyan dusaen to itayo la lapud sikatoy impanpasnuk tayo. Balet natan labay yo nin aruman so kasalanan tayo.”

¹⁴ Kanyan saramay sondalo impalima rad saray totoo tan saray pangulo ra ira may priso tan saray amin a sinasamsam da.

¹⁵ Atoro ira may apatiran pangulo a mangala na saray kawes ed saramay bengatlan asamsam, insan da iter ed saramay priso. Initdan da ra may priso na isolung dan kawes tan sandalya; initdan da met ira na dugan kanen tan inomen da, tan tinatambal da na larak na oliba iray sugasugat da. Inlologan dad asno iray ag makaakar lapud kapoy da, insan saray amin a priso et inyaakar da rad Jerico, say siudad na saray kiew a palmira tan sakop na Juda. Insan pinmawil lad Samaria ira may Israelita.

Si Acaz Kinmerew na Tulong ed Asiria

^16-17 Dinogpaan lamet na saray Edomita so Juda tan adakep da ray amayamay a totoo, kanyan kinmerew na tulong si Ari Acaz ed impirador na Asiria.

¹⁸ Legan to ya, dodogpaan met na saray Filisteo iray baley ed saray alusadsar diad sagur tan diad abalaten na Juda. Adakep da ray siudad na Bet-semes, Ayalon, Gederot, Soco, Timna, tan Gimzo a pati saray bario ra, tan nanayaman da ra yan pasen.

¹⁹ Inter na Katawan ira yan segsegang ed Juda lapud pinaolyan nen Ari Acaz so pankaabigan na saray totoo to, tan sinumlang toy linawa na Katawan.

²⁰ Si Impirador Tiglat-pileser na Asiria et ag to tulongan si Ari Acaz; sinumlang to tan pinairap to ingen.

²¹ Kanyan inala nen Acaz iray kayamanan a walad Timplo, palasio, tan saray kaabungan da ray pangulo na totoo, insan to ra inter ed impirador na Asiria. Balet siansian ag to tinulongan.

Saray Kasalanan nen Acaz

²² Nen mapalalo lay segsegang nen Acaz, inaruman to niy ginawa ton kasalanan ed Katawan.

²³ Nambabagat ed diriyos na saray Siriano ya analod sikato. Inkuanto, “Saray diriyos da ray Siriano et tinulongan da ray ararid Siria, kanyan no mangibagat ak ed sikara nayarin, tulongan da ak met.” Lapud saya sinmabiy deral ed sikato tan say bansa to.

²⁴ Likud ed saya, inaala ton amin iray kagawaan na Timplo, insan to ra minemekmek. Kinaputan toy Timplo insan nanggagawa na saray altar ed amin a pasen na Jerusalem.

²⁵ Diad balang siudad tan baley na Juda, angipaalagey na saray paganon pasen a panangigalangan, a pampoolan da na insinso ed saray diriyos na arum a bansa. Lapud saya sikato lamlamang so nanlapwan na impanpasnuk ed sikato na Katawan a Dios na saray lalaki to.

²⁶ Nikorit ed Say Awaran da ray Arari na Juda tan Israel iray arum ya agawgawa legay impanoley to manlapud gapo ya anggad samput.

²⁷ Inatey si Acaz tan nipompon ed Jerusalem, balet aliwan diad pantion da ray arari. Si Ezekias a lakin anak to so sinmalat ed sikaton nanari.