2 Saray Awaran 26 - Maung A Balita Biblia

Si Ari Uzias na Juda

¹ Pinili na amin a totood Juda so lakin anak nen Amasias a si Uzias ya onsalat ed kinen ama to a manari. Labinanem so taon to nen pinili ra. (

² Abawi nen Uzias so siudad na Elat tan pinasimbalo ton impaalagey kayari na impatey nen Amasias.)

³ Nagmaliw ya ari si Uzias nen mantaon na labinanem tan nanoley ed Jerusalem na limamplo tan duay taon. Si Jecolia a taga Jerusalem so ina to.

⁴ Ginagawa toy makapaliket ed Katawan tan inalig toy ginagawa nen ama to.

⁵ Legan a mabilay si Zacarias, a sumisimbawa ton nipaakar ed itatakot ed Dios, matoor ton nilingkuran so Katawan, kanyan pinaaligwas na Dios.

⁶ Akibakal si Uzias ed saray Filisteo. Inggeba to ray padir na saray siudad na Gat, Jabnia, tan Asdod, tan nampapaalagey na saray aliber na padir a siudad diad asingger ed Asdod tan saray arum a pasen ed Filistia.

⁷ Tinulongan na Dios ed impanalo tod saray Filisteo, saray Arabe a manaayam ed Gurbaal, tan saray Meunita.

⁸ Angiter na saray rigalo iray Ammonita ed kinen Uzias. Nagmaliw a mapalaloy pakayari to kanyan kinmayat ya anggan diad Egipto so inkabantug to.

⁹ Pinabiskeg nen Uzias so padir na Jerusalem diad impamaalagey to na saray tori ed Puritay Sokung, Puirtay Patar, tan diad saray nilikuan na padir.

¹⁰ Nampapaalagey met na saray aliber na padir a tori diad kaalogan, tan nampapakotkot na amayamay a bobun, lapud amayamay iray ayayep to ed saray alusadsar tan saray patar ed bokig. Lapud maliket ed panagtanaman, tinanggoyur to ray totoon mantanem ira na ubas tan saray arum nin tanaman diad saray kapokdulan tan diad saray mataban dalin.

¹¹ Amayamay iray sondalo ton akaparaan a mibakal. Di Jeiel tan Maasias so makaoley ed saray isusulat a nipaakar ed saray sondalo, diad panangiwanwan nen Ananias ya opisyal na ari.

¹² Duan libo tan anem a lasus iray opisyal na sondalo.

¹³ Talon lasus tan piton libo tan liman lasus a sondalo so ipapangulo na sarayan opisyal; marunong ira yan mibakal ed saray kalaban diad pangyagel dad ari.

¹⁴ Initdan nen Uzias ira yan sondalo na saray samper, pika, hilmit, kawes a para bakal, pana, tan saray baton para bansut.

¹⁵ Diad Jerusalem, saray marunong a kumikimey to et nanggawa ra na saray kagawaan a pangibansut na saray ankakabaleg a bato tan pana, manlapud saray tori tan saray sokung na padir na siudad. Kinmayat ed anggan iner a pasen so inkabantug nen Uzias, tan mapalaloy pakayari to lapud saray nidoma-doman tulong a nanaawat tod Dios.

Adusa si Uzias Lapud Panagpaatagey to

¹⁶ Balet nagmaliw a mapaatagey si Ari Uzias nen pinmalaloy pakayari to; sikato yay makasengeg na inkaderal to. Nileglemew to so Katawan a Dios to nen linmad Timplo a nampool na insinso ed tapew na altar a panagpoolay insinso.

¹⁷ Si Azarias a pari, a kaiba to ray walomplon papari a mabiskeg tan makpel so linawa ra, et tinombuk day ari

¹⁸ ta banoen da. Inkuandad sikato, “Uzias! Anggapoy kanepegan mon mamool na insinso ed Katawan. Saray papari labat a say sengeg da et si Aaron so nisaklang a manggawad saya. Taynan mo yan masanton pasen. Mankakasalanan kad Katawan a Dios, kanyan ag to panliketan itay gagawaen mo.”

¹⁹ Si Uzias manalalagey diman ed Timplo diad abay na altar a panagpoolay insinso, tan sankabembenan toy pananginay insinso. Akapasnuk ed saramay papari, et tampol ya akating so muling to.

²⁰ Ataktakot si Azarias tan saramay arum a papari diad impakanengneng dad muling na ari. Insan da pinasoot a taynan to so Timplo. Nangganat a pinmaway, lapud dinusa na Katawan.

²¹ Nanlapud saman ag la inmabig imay kating nen Uzias ya anggad ag to impatey. Lapud sikatoy aliwan malinis onung ed ganggan, ag lan balut akaloob ed Timplo, no ag ta nanayam la ed nibiig ya abung. Nakal ed sikatoy amin a kimey na ari tan si Jotam a lakin anak to so nanoley ed bansa.

²² Inkorit nen propita Isaias a lakin anak nen Amoz iray arum a ginagawa nen Ari Uzias legan na impanoley to.

²³ Inatey si Uzias tan nipompon ed alog a panangipomponan ed saray arari; ag nipompon ed saray pantion na arari lapud samay sakit to. Si Jotam a lakin anak to so sinmalat ed sikaton nanari.