2 Saray Awaran 24 - Maung A Balita Biblia

Si Ari Joas na Juda

¹ Nagmaliw ya ari na Juda si Joas nen mantaon na pitora, tan nanoley ed Jerusalem na apataploy taon. Si Zibia a taga siudad na Beer-seba so ina to.

² Legay impanbilay nen Joiada a pari, ginagawa nen Joas iray makapaliket ed Katawan.

³ Amiliy Joiada na duaran bibii ya impaasawa tod Ari Joas, et nanilalak na lalaki tan bibii.

⁴ Ag abayag ginetma nen Ari Joas ya apigeren so Timplo na Katawan.

⁵ Ingganggan to ray papari tan saray Levita ya onla rad saray siudad na Juda, ta mankolikta rad saray totoo na kuarta a para samay tinaon a pamaapiger ed Timplo. Imbaga tod sikaran ganatan da yan gawaen, balet nantayam-tayam ira may Levita.

⁶ Impatawag to sirin si Joiada a pangulo ra, tan tinepet to, “Akin et ag mo ni impakolikta ed saray Levita so buis da ray taga Juda tan Jerusalem, a si Moises ya aripen na Katawan et ingganggan tod saray totoo a bayaran da para Tuldan Ayamay Katawan?” (

⁷ Saray mananombuk nen Atalia, samay maoges a bii, et dineral day Timplo tan inkakana rad panangigalang ed Baal iray amayamay a masanton kagawaan.)

⁸ Ingganggan na ari iray Levita a manggawa ray kahon a pananginay tulong tan iyan dad puirta na Timplo.

⁹ Impaibaga rad intiron Jerusalem tan Juda a balang sakey et nepeg ya iyakar tod Katawan imay buis ya ononan kinoliktad kalawakan nen Moises ya aripen na Dios.

¹⁰ Akaliketan ya na saray totoo tan saray pangulo ra, kanyan inyaakar da may kuarta ran para buis tan pinapano ra may kahon.

¹¹ Inagew-agew saray Levita iyakar da may kahon ed opisyal na ari a makaoley. No napno la, ondago so sikritario na ari tan say opisyal na Pangulon Pari, alaen day kuarta, insan da ipawil imay kahon ed pasen to. Kanyan amayamay so akolikta ran kuarta.

¹² Insan ipalima na ari tan si Joiada imay kuarta ed saray makaoley ed panagapiger na Timplo, a nanuupa ra na saray manapiger a kantiro, karpintiro, tan platiro.

¹³ Pinasiay impankimey da ra may nanapiger, kanyan nipawil dad gendat a kipapasen ton mabisbiskeg imay Timplo.

¹⁴ Nen asumpal so impangapiger, niiter ed ari tan si Joiada iray soluk a balituk tan pilak. Inkana da ra ya ed panggawa na saray yaung tan arum ni ran kagawaan na Timplo. Legan a mabilay si Joiada, ag tinmonda so pangisasaklang na saray bagat ed Timplo.

Naoman iray Pananontonan ya Impaakseb nen Joiada

¹⁵ Masikesiken lay Joiada nen inatey, sanlasus tan talomplo so taon to.

¹⁶ Impompon da ed saray pantion da ray arari diad Siudad nen David, lapud impamirbir da ed impanlilingkur tod saray totood Israel, diad Dios, tan diad Timplo.

¹⁷ Balet kapatey nen Joiada, tinanggoyur na saray pangulo na Juda si Ari Joas ya ondengel ed sikara.

¹⁸ Tinondaan na saray totoo so mangigalang ed Timplo na Katawan, say Dios na saray lalaki ra, tan angigalang irad saray talintaoy diriyos tan saray talintaoy diosan Asera. Lapud sayan kasalanan na saray totood Juda tan Jerusalem, akapasnuk so Katawan ed sikara.

¹⁹ Angibaki so Katawan na saray propita a mamasakbay ed sikara pian makapawil irad Katawan, balet ag da ra dinengel.

²⁰ Insan say ispiritu na Dios linmoob ed kinen Zacarias a lakin anak nen Joiada a pari. Nanalagey ed sakey a pasen a nanengneng na saray totoo tan inkulyaot to, “Tetepeten ed sikayo na Katawan a Dios no akin et sinumlang yo ray ganggan to tan ipepelag yod sikayon dili so deral! Inkaindan yoy Katawan kanyan inkaindan to kayo!”

²¹ Akikomplut si Ari Joas ed saray totoo sumpad kinen Zacarias, et nen ingganggan to tinupak dad patio si Zacarias.

²² Alingwanan na ari so matoor ya impanlingkur ed sikato nen Joiada ya ama nen Zacarias, kanyan impapatey toy Zacarias. Nen ompapatey si Zacarias, inmeyag, “Nanengneng komun na Katawan so gagawaen yo tan dusaen to kayo!”

Say Samput na Impanoley nen Joas

²³ Nen magano lan mansamput iman a taon, dinogpaan na saray sondalon Siriano so Juda tan Jerusalem, pinatey da ray amin a pangulo, tan amayamay so asamsam dan insempet ed Damasco.

²⁴ Daiset iray Sirianon sondalo, balet impatalo na Katawan iray amayamay a Judion sondalo lapud inkaindan na totoo so Katawan a Dios na lalaki ra. Onya so impakadusa nen Ari Joas.

²⁵ Mapalaloy inkasugat nen Joas, et nen tinmaynan la ra may kalaban da, nankomplut so duaran opisyal to tan pinatey da ed katri to, pian makabales irad samay impamatey ed anak nen Joiada a pari. Nipompon ed Siudad nen David, balet aliwan diad kamposanto da ray arari. (

²⁶ Saramay nankomplut ya amatey ed sikato et si Zabad lakin anak na Ammonitan bii a manngaray Simeat, tan si Jozabad a lakin anak na Moabitan bii a manngaray Simrit.)

²⁷ Nikorit ed Say Komintario ed Libro da ray Arari so istoria na saray lalakin anak nen Joas, saray propisiyan asalita sumpad sikato, tan say impamaapiger tod Timplo. Si Amasias a lakin anak to so sinmalat ed sikaton nanari.