2 Saray Awaran 18 - Maung A Balita Biblia

Pinasakbayan nen Propita Micaya si Acab

¹ Nen mapalalo lan mayaman tan bantug si Ari Josafat na Juda, akapankaaro ra nen Ari Acab na Israel lapud impanasawa na saray duaran kabyangay pamilya ra.

² Kayariy pigaran taon linmad Samaria si Josafat ta binisita toy Acab. Diad impamagalang nen Acab ed kinen Josafat, tan saray kakaiba to, amayamay a karniro tan baka so impapatey to ya impanangkaili to. Sinali nen Acab a tangguyoren si Josafat a mankasakey iran ondogpa ed Ramot-galaad.

³ Inkuantod kinen Josafat, “Mila ka pad sikamin mibakal ed Ramot-galaad.” Inmebat si Josafat, “No akaparaan kayo la, akaparaan ak met la tan saray sondalok. Mikasakey kamid sikayon mibakal.”

⁴ Insan inkuanto ni, “Balet ipanon tayo ni ed Katawan.”

⁵ Impantitipon sirin nen Acab iray propita, sakey ya apat a lasus ira, tan tinepet tod sikara, “Laen kon dogpaan so Ramot-galaad odino andi?” “Dogpaan mo,” ebat da. “Panaloen ka na Dios.”

⁶ Balet tinepet nen Josafat, “Anggapo ta lay sananey a propita a diad panamegley to makapangipanon tayod Katawan?”

⁷ Inmebat si Acab, “Wala niy sananey, si Micaya a lakin anak nen Imla. Balet kabosul ko, ta ag balut mampropropisiya na pankaabigan ko; pakaderalan kon amin.” “Ag mo nepeg ya ibaga tan!” ebat nen Josafat.

⁸ Tinawag sirin nen Ari Acab so sakey ya opisyal, tan imbaga tod sikato ya awiten ton tampol si Micaya.

⁹ Saramay duaran ari akasolung ira na kawes da ray arari et akayorung irad saray trono ra diad samay pasen a panagilikan ya asingger ed puirta na Samaria. Mampropropisiyad arap da ira may amin a propita.

¹⁰ Nanggawa na saray saklur a balatyang so sakey ed saray propita a si Sedekias a lakin anak nen Canaana tan kuantod kinen Acab, “Onyay inkuan na Katawan: ‘Diad panamegley na saraya, labanan yo ray Siriano, et sigput a taloen yo ra.’”

¹¹ Nampapara so imbaga na amin da ra may propita. Inkuanda, “Lakad Ramot-galaad et manalo ka. Panaloen ka na Katawan.”

¹² Legan to ya, samay opisyal a mangaawit ed kinen Micaya inkuantod sikato, “Aligwas na ari so impropisiya na amin da ray arum a propita, kanyan onya met so ipropisiyam.”

¹³ Balet inmebat si Micaya, “Diad ngaran na mabilay a Katawan, say papaibaga na Dios so ibagak!”

¹⁴ Nen pinmarontal ed arap nen Ari Acab si Micaya, tinepet na ari ed sikato, “Micaya, dogpaan mi nen Ari Josafat so Ramot-galaad odino andi?” Inmebat si Micaya, “Laka yo, ta manalo kayo. Panaloen kayo na Katawan.”

¹⁵ Balet inmebat si Acab, “Mamimpigan ibagak ed sikan say katwaan labat so ibagam ed siak diad ngaray Katawan?”

¹⁶ Inmebat si Micaya, “Anengneng kon ataytayak ed saray pokdul iray totood Israel, a singa ra karniron anggapoy pumapastol da. Insan inkuan na Katawan, ‘Anggapoy pangulo da ra yan totoo; pasempet mo la ran walay kareenan.’”

¹⁷ Inkuanen Acab ed kinen Josafat, “Imbagak ed sikan ag balut mampropropisiyay pankaabigan ko; pakaderalan kon amin!”

¹⁸ Intuloy nen Micaya ya inkuan, “Dengel yo natan so ibabagay Katawan! Anengneng koy Katawan a manyodyorung ed trono tod tawen, tan manalalagey ed diking to iray amin ya anghil.

¹⁹ Tinepet na Katawan, ‘Siopay mamalikdod kinen Acab, pian onlad Ramot-galaad tan diman napatey?’ Sananey so imbaga na saray arum ya anghil tan sananey met so imbaga na saray arum.

²⁰ Kabebekta inmasingger so sakey ya ispiritu, nanalagey ed arap na Katawan tan kuanto, ‘Siak so mamalikdo.’ ‘Panon mon palikdoen?’ tepet na Katawan.

²¹ Inmebat imay ispiritu, ‘Onla ak, ta pantilaen kon amin iray propita nen Acab.’ Inkuan na Katawan, ‘Laka, ta palikdom si Acab. Nagaway pilalek mo.’”

²² Inkuanen Micaya ed kaonuran, “Saya sirin so agawa. Impantila na Katawan ed sika ra yan propitam. Balet imbaga la na Katawan ed sika so kaogsan a nagawad sika!”

²³ Balet inasinggeran nen Sedekias si Micaya, tinampal to, tan kuanto, “Kapigan ta inmekal ed siak so ispiritu na Katawan, insan akisalita ed sika?”

²⁴ “Naamtaan mo no onla kan onamut ed kuarton walad beneg,” ebat nen Micaya.

²⁵ Insan ingganggan nen Acab so sakey ed saray opisyal to, “Singkat moy Micaya, insan mo iyakar ed kinen Amon a gobirnador na siudad, tan kinen Prinsipi Joas.

²⁶ Ibagam ed sikaran ipriso ra, tan pakanen da labat na tinapay tan itdan day danum ya anggad isabik ya anggapoy maoges ya agawad siak.”

²⁷ “No ompawil kan anggapoy maoges ya agawa,” inkuanen Micaya, “ag nansalitad panamegley ko so Katawan!” Insan to inyarum ya inkuan, “Tandaan yon amin imay imbagak!”

Say Impatey nen Acab

²⁸ Linman dinmogpad siudad na Ramot-galaad si Ari Acab na Israel tan si Ari Josafat na Juda.

²⁹ Inkuanen Acab ed kinen Josafat, “No onla itayon mibakal ag ak pabirbir, balet mansolung kay kawes na ari.” Kanyan ag nampabirbir so ari na Israel nen linman mibakal.

³⁰ Ingganggan na ari na Siria iray pangulo na saray sondalon akakarwahi ya anggapoy arum a dogpaan da no ag say ari na Israel.

³¹ Nen anengneng day Ari Josafat abaloan dan ari na Israel, kanyan dinogpaan da. Balet inmeyag si Josafat et inyagel na Katawan a Dios tan pinaarawi tod sikato ira may dinmogpa.

³² Nen saray pangulo da ray akakarwahi et abirbir da ya aliwan sikatoy ari na Israel, tinondaan dan inosilan.

³³ Balet apalaranan ya apana na sakey a sondalon Siriano si Acab diad nanleetan na kawes ton para bakal. Ineyag tod kutsiroy karwahi to, “Asugatan ak! Poliktar ka, ta onarawi ta lad bakalan.”

³⁴ Legan na pinasyan laban, nansiansian akasaral ed karwahi to si Ari Acab tan sankaarap to ray Siriano. Nen onseselek lay agew inatey.