2 Saray Awaran 17 - Maung A Balita Biblia

Nagmaliw ya Ari si Josafat

¹ Si Josafat a lakin anak nen Asa so sinmalat a nanari. Pinabiskeg nen Josafat so kipapasen to sumpad Israel.

² Angipasen na saray sondalo ed saray aliber na padir a siudad na Juda, diad saray bario na Juda, tan diad saray siudad ya adakep nen Asa ed dalin na Efraim.

³ Binindisionan na Katawan si Josafat, lapud inalig toy akaonan impanbilay nen ama to, tan ag to angigalang ed Baal.

⁴ Nanlingkuran toy Dios nen ama to, inonur to ray ganggan na Dios, tan ag to nambilay na singa impanbibilay na saray ararid Israel.

⁵ Pinabiskeg na Katawan so panooley nen Josafat ed nanarian na Juda, kanyan inyaakaran na saray totoo na saray rigalo. Minmayaman a mapalalo sirin tan daydayewen na saray totoo.

⁶ Inkinon to so panaglingkur tod Katawan tan dinederal to ray paganon pasen a panangigalangan tan saray tanda na diosan Asera.

⁷ Nen kumatlon taon na panooley nen Josafat, imbaki to ray onggendan ya opisyal, ta nambabangat irad saray siudad na Juda: Ben-hayil, Obadias, Zacarias, Natanael, tan Micaya.

⁸ Inolup ira na saray onggendan a siamiran Levita: Semaias, Netanias, Zebadias, Asael, Semiramot, Jonatan, Adonias, Tobias, tan Tobadonias, tan saray duaran pari a di Elisama tan Joram.

⁹ Inala ray libro na Ganggan na Katawan tan imbabangat da ray totoo ed amin a baley na Juda.

Say Inkatalonggaring nen Josafat

¹⁰ Say Katawan pinatakot ton mibakal ed kinen Josafat ya amin iray nanarian a walad kaliber-liber na Juda.

¹¹ Pigaran Filisteo so angyakar ed kinen Josafat na dakel a pilak tan arum iran rigalo. Pigara met ya Arabe so angyakar ed sikato na piton libo tan piton lasus a karniro tan piton libo tan piton lasus a kanding.

¹² Kanyan pinmalalo lan pinmalalo so pakayari nen Josafat. Diad intiron Juda nampapaalagey na saray ankakabaleg a tirinsira tan saray siudad

¹³ a panangisempenan na saray amayamay ya abasto. Angipasen ed Jerusalem si Josafat na saray matalonan opisyal.

¹⁴ Impasen to ra onung na saray nanlapwan dan tribu. Si Adna so pangulo na saray sondalon nanlapud saray boleg nen Juda; talon lasus libo iray sondalon walad pakaoley to.

¹⁵ Si Johanan so onkumadwad pakaoley; duan lasus walomplon libo iray sondalon walad pakaoley to.

¹⁶ Say onkumatlo si Amasias a lakin anak nen Zicri; duan lasus libo iray sondalon walad pakaoley to. (Pinalapu nen Amasias ed linawa to so impanlingkur tod Katawan.)

¹⁷ Si Eliada, a matalonan sondalo, so pangulo na saray sondalon nanlapud saray boleg nen Benjamin; walad pakaoley to so duanlasus libon sondalo a samper tan pana ray armas da.

¹⁸ Si Jozabad so onkumadwad pakaoley; walad pakaoley to so sanlasus tan walomplon libon sondalo a dugay armas dan para bakal.

¹⁹ Sikara yay lalakin nanlingkur ed ari tan kaaruman ira na saray sondalon impasen tod saray arum a pinadir a siudad na Juda.