2 Saray Arari 8 - Maung A Balita Biblia

Pinmawil imay Biin taga Sunem

¹ Inkuanen Eliseo ed samay biin taga Sunem, a say anak ton laki et pinabilay to, “Manayam kad arum a lugar, sika tan say pamilyam, ta say Katawan padalanen tod dalin na Israel so eras tan mansiansian pitoy taon.”

² Inmonur imay bii ed kinen Eliseo, kanyan sikato tan say pamilya to et nanayam irad Filistia na pitoy taon.

³ Kayariy pitoy taon samay bii pinmawil ed Israel, insan linmad ari, ta kerewen ton nipawil ed sikatoy abung to tan say dalin to.

⁴ Asabi toy ari a mitotongtong ed kinen Giezi ya aripen nen Eliseo, ta labay na arin amtaen iray milagron gagawaen nen Eliseo.

⁵ Nen totongtongen nen Giezi so impamabilay nen Eliseo ed sakey ya ogaw, nibambanan inmapireng imay bii. Inkuanen Giezi ed ari, “Kagalang ya Ari, nia may bii tan samay anak ton pinabilay nen Eliseo!”

⁶ Nen inmebat imay bii ed tepet na ari, pinaletan to may tongtong nen Giezi, kanyan anawag na sakey ya opisyal imay ari tan kuantod sikato, “Ibagam ya ipawil dad sayan bii iray kayaryan to, pati say bili na amin a naanid kaalogan to legan na pitoy taon ya inkaandi to.”

Si Eliseo tan si Ari Ben-hadad na Siria

⁷ Linmad Damasco si Eliseo nen mansasakit si Ari Ben-hadad na Siria. Nen nibagad ari a wadmay Eliseo,

⁸ inkuantod Hazael a sakey ed saray opisyal to, “Iyawitan moy rigalo may propita, kerew mod sikaton amtaen tod Katawan no onabig ak nikasid sayan sakit ko odino andi la.”

⁹ Kanyan pinano nen Hazael na amin a klasiy sankaabigan a bengatlan narumog ed Damasco so beneg na apataplon kamilyo, insan linmad kinen Eliseo. Nen apiarapan nen Hazael si Eliseo, inkuantod sikato, “Imbaki ak dia na managlingkur mon Ari Ben-hadad, ta patetepet tod sika no onabig nikasid sakit to odino andi la.”

¹⁰ Inmebat si Eliseo, “Ibagam ed sikaton onabig ni; balet impaamtad siak na Katawan ya ompatey met lamlamang.”

¹¹ Insan ninengneng a maung nen Eliseo ya anggad binmaing si Hazael. Kabebekta inmakis si Eliseo.

¹² “Akin et manakis ka?” tepet nen Hazael. Inmebat si Eliseo, “Lapud amtak so gawaen mon kaogsan ed saray totood Israel. Poolan mo ray tirinsira ra, pateyen mod panamegley na ispada ray babalolaki ra, ibakbak mod dalin ya anggad ompatey iray anak da, tan butyakan mo ray malokun da.”

¹³ “Panon kon nagawaan ira tan a makapasinagem a bengatla, anta sakey ak labat a mugmon too?” tepet nen Hazael. “Impaamtad siak na Katawan a magmaliw kan ari na Siria,” ebat nen Eliseo.

¹⁴ Pinmawil ed kinen Ben-hadad si Hazael, tan tinepet tod sikato, “Antoy kuanen Eliseo?” “Imbaga tod siak ya onabig ka,” ebat nen Hazael.

¹⁵ Balet diad kaimbuas angalay oles si Hazael, imbasa to, insan to inkobut ed olo na ari ya anggad inatey. Si Hazael sinalatan ton nanarid Siria si Ben-hadad.

Si Ari Jehoram na Juda

¹⁶ Nen kumaliman taon na panooley ed Israel nen Ari Joram a lakin anak nen Acab, nagmaliw ya ari na Juda si Jehoram a lakin anak nen Josafat.

¹⁷ Mantaon na talomplo tan dua nen ginmapon manari, tan nanoley ed Jerusalem na waloy taon.

¹⁸ Say anak nen Acab so asawa to; inalig toy maoges a panagbilay na saray ararid Israel a singa say pamilya nen Acab. Nankasalanan ed Katawan,

¹⁹ balet ag labay na Katawan a deralen so Juda, tan insipan tod aripen ton David a saray kabyangay boleg nen David so manoley ya anggad angga.

²⁰ Legan na panooley nen Jehoram, linmaban ed Juda so Edom, tan nagmaliw a walay dilin ari na Edom.

²¹ Kanyan linmad Zair si Jehoram ya awit ton amin iray karwahi to. Balet nilakob irad man na saray sondalo na Edom. Diad labi ayarian day sinmelak di Jehoram tan saray pangulo na saray karwahi, et akabatik ira, balet nagsisempet met iray sondalo to.

²² Nanlapud saman andi lad silong na pakaoley na Juda so Edom. Diad saman met a panaon, linmaban met ed Juda so siudad na Libna.

²³ Nisulat ed libron Say Awaran da ray Ararid Juda iray arum nin ginagawa nen Jehoram.

²⁴ Inatey si Jehoram tan nipompon ed kamposanto da ray arari diad Siudad nen David, insan sinmalat ed sikaton manari si Ahazia a lakin anak to.

Si Ari Ahazia na Juda

²⁵ Nen kumalabinduan taon na panooley ed Israel nen Joram a lakin anak nen Acab, nagmaliw ya ari na Juda si Ahazia a lakin anak nen Jehoram.

²⁶ Ginmapon nanari nen mantaon na duamplo tan dua, tan nanayam ed Jerusalem legan ton nanoley na sakey taon. Si Atalia ya apo nen Ari Omri na Israel so ina to.

²⁷ Lapud kanayon tod asawa si Ari Acab, nankasalanan ed Katawan, a singa ginagawa na saray kabyangay pamilya nen Acab.

²⁸ Akigampiy Ari Ahazia ed kinen Ari Joram na Israel diad impibakal dad Ari Hazael na Siria. Diad Ramot-galaad so nambabakalan da. Asugatan si Joram ed sayan bakal.

²⁹ Pinmawil ed siudad na Jezreel ta mampaabig ed sugat to, tan binisitad man nen Ahazia.