2 Saray Arari 7 - Maung A Balita Biblia

¹ Inmebat si Eliseo, “Dengel moy ibabaga na Katawan. Diad onyan oras nabwas nilakod sakey a pilak diad tindaan na Samaria so taloran kilon sankaabigan a trigo odino anemiran kilon sibada.”

² Say opisyal ya angolup ed ari kuantod kinen Eliseo, “Ag itan nagawa—anggan mangipelag na oran a tampol so Katawan!” “Nanengneng mon nagawa, balet ag mo natawayan yan tagano,” ebat nen Eliseo.

Tinmaynan iray Sondalo na Siria

³ Walay apatiran lalakin akating a wala rad paway na saray puirta na siudad, tan kuandad sakey tan sakey, “Akin et manalagar tayo dia ya anggad ag tayo ipatey?

⁴ No onloob tayod siudad, ompatey tayod eras labat, ta anggapod may naakan. Balet no manayam tayo dia, ompatey tayo met ni lamlamang. Kanyan onla tayod kampo da ray Siriano; no ag da itayo diwiten mambilay tayo, balet no pateyen da tayo andi bali ta ompatey tayo met ni lamlamang.”

⁵ Kanyan kasakbayay imbilonget to, linma rad kampo da ray Siriano, balet kasabi rad man anggapoy wadman ya anggan sakey a too.

⁶ Imparengel na Katawan ed saray Siriano so tanul na idodogpa na saray dakerakel a sondalon akakabayo tan akakarwahi, kanyan abaloan na saray Siriano ya impaibaan so ari na Israel ed saray Heteo tan saray Egipsio tan saray arari ra ya ondogpad sikara.

⁷ Kanyan diad pangyagel na saray Siriano ed bilay da, batik irad saman a labi; tinaynan da ray tulda ra, saray kabayo ra tan saray asno ra; tinaynan day kampo ed kipapasen ton gendat.

⁸ Kasabi na saramay apatiran akating ed gilig na kampo, linmoob irad sakey a tulda, angan tan inminom iray nakan tan nainom a wadman, inaakokus day pilak, balituk, tan kawes a nalmo ra, insan ira pinmaway, ta iyamut da ra; pinmawil iran linmoob ed sakey nin tulda tan ginawa ra lamet imay ginawa ra la nen inmona.

⁹ Balet inkuandad balang sakey, “Ag tayo ya nepeg a gawaen! Walad sikatayoy maung a balita; ag tayo nepeg a pokuken ed sikatayon dili. No dia nid kabwasan so pangibalita tayo, andi-saew a nadusa itayo. Ompawil tayo la sirin natan, ta ibaga tayod saray opisyal na ari!”

¹⁰ Kanyan tinaynan day kampo da ray Siriano, linma rad siudad, insan tinawag da ray guardia na saray puirta tan kuandad sikara: “Linma kamid kampo da ray Siriano, et anggapoy toon anengneng o alikas min wadman; ag naokbaran iray kabayo tan saray asno, tan singa kipapasen dan gendat iray tulda.”

¹¹ Imbawag na saray guardia so balita, insan nipasabi ed palasio.

¹² Labi ni, balet binmangon lay ari tan kuantod saray opisyal to, “Ibagak ed sikayoy implano na saray Siriano! Amta ray nagagawan eras dia, kanyan tinaynan day kampo ra, ta inmaamut irad gilig na kaalogan. Abaloan dan ompaway tayon mananap na nakan, insan da itayod satan dakepen a mabilay tan looban day siudad.”

¹³ Inkuan na sakey ed saray opisyal to, “Ompatey met lamlamang iray totoo diad siudad a singa saramay inaatey la. Kanyan magmaung no mangibaki tayoy pigarad sikara, pian naamtaan tayo no antoy tuan agawa. Paikana ti la ra may limara ed saray nakdaan a kabayo.”

¹⁴ Amili ra sirin na pigaran lalaki, pinalogan da rad duaran karwahi, insan ira la imbaki na ari kayari to ran binilin a nengnengen da no antoy agawa ed saray sondalo na Siria.

¹⁵ Linma ra ya anggad Jordan, tan diad dalan anengneng da ray kawes tan saray kagawaan ya intitilak na saray Siriano diad imbatik da. Insan ira pinmawil tan imbaga rad ari so agawa.

¹⁶ Nanlulumbaan a pinmaway iray totood Samaria tan inaakokus day antokaman a walad kampo. Onung na imbagay Katawan, nilako na sakey a pilak so taloran kilon sankaabigan a trigo odino anemiran kilon sibada.

¹⁷ Nibana a say ari impasen ton makaoley ed saray bantay na puirtay siudad imay opisyal ya angolup ed sikato. Agatin-gatinan na saray totoo imay opisyal, kanyan inatey, onung na impasakbay nen Eliseo nen nila na ari.

¹⁸ Imbagad saman nen Eliseo ed ari a diad singa onyan oras nabwas nilako na sakey a pilak diad tindaan na Samaria so taloran kilon sankaabigan a trigo odino anemiran kilon sibada.

¹⁹ Onya balet so ebat na samay opisyal, “Ag itan nagawa—anggan mangipelag na oran a tampol so Katawan!” Inebatan balet nen Eliseo, “Nanengneng mon nagawa, balet ag mo natawayan yan tagano.”

²⁰ Kanyan sikato yay agawad sikato—inatey, ta agatin-gatinan na saray totoo diad puirtay siudad.