2 Saray Arari 6 - Maung A Balita Biblia

Say Inletaw na Oloy Wasay

¹ Say grupo na saray propita ya ipapangulo nen Eliseo inkuandad sikato, “Melmelag yay panaayaman tayo!

² Abuloyan mo kamin onlad Jordan, ta mamatang kami na saray kiew, pian makapaalagey kamiy babaleg a panayaman tayo.” “On, lakayo,” ebat nen Eliseo.

³ Inkuan na sakey ed saramay propita ed kinen Eliseo, “Mila ka karid sikami.” Inmebat si Eliseo, “On, mila ak.”

⁴ Kanyan linma ran amin. Kasabi rad Jordan, inggapo ray nambatang na kiew.

⁵ Nen mamabatang so sakey ed sikara, biglan naplag ed aralem a danum so oloy wasay to. “Anto natay gawaen ko?” inkuantod kinen Eliseo. “Binayes ko pa ni met iman!”

⁶ “Naplagan to?” tepet nen Eliseo. Intoro na samay too so pasen, insan amoter si Eliseo na bislak, imbontuk tod danum imay bislak tan pinaletaw to may oloy wasay.

⁷ “Alam,” ingganggan nen Eliseo, kanyan linmasur imay too tan inala to.

Atalo ray Sondalo na Siria

⁸ Mibabakal ed Israel so ari na Siria. Kayariy impangipanon tod saray opisyal to, amiliy pasen a pankampoan to.

⁹ Balet impaibaga nen Eliseo ed ari na Israel, “Ag ka ondadalan ed saman a pasen, ta tatambangan kad man na saray Siriano.”

¹⁰ Kanyan pinasakbayan na arid Israel iray lalakin manaayam ed saman a pasen, et namparaan ira. Amimpiga yan agawa.

¹¹ Lapud saya agunigon a maung so ari na Siria; tinawag to ray opisyal to tan tinepet tod sikara, “Siopad sikayoy migagampid ari na Israel?”

¹² Inmebat so sakey ed sikara, “Ang-gapod sikami, Kagalang ya Ari. Ibabaga nen propita Eliseo ed ari na Israel so anggan say ibabagam ed dalem na dilin kuartom.”

¹³ Ingganggan na ari, “Anap yo no iner so kawalaan to, ta paerel ko.” Nen nibagad sikaton walad Dotan si Eliseo,

¹⁴ angibakid man na amayamay a sondalon akakabayo tan akakarwahi. Labiy insabi rad samay baley tan nilakob da.

¹⁵ Diad kabkabwasan na ontombuk ya agew, binmangon so aripen nen Eliseo, pinmaway ed abung, et anengneng to ray Sirianon sondalo ya akakabayo tan akakarwahi ra a linmakob ed baley. Pinmawil ed kinen Eliseo tan kuanto, “Alakob itayo! Antoy gawaen tayo?”

¹⁶ “Ag ka natatakot,” ebat nen Eliseo. “Dakel niy walad dapag tayo nen say walad sikara.”

¹⁷ Insan nampikasi, “O Katawan, lokasan mo pay mata to, pian nanengneng to!” Inebatan na Katawan so pikakasi to; ninmengneng imay aripen nen Eliseo, et anengneng toy gilig na palandey a napnoy kabayo tan karwahin apoy ya akapaliber iran amin ed kinen Eliseo.

¹⁸ Nen dinmogpa ray Siriano, nampikasiy Eliseo, “O Katawan, pikasik ed sikan bulag mo ra!” Inebatan na Katawan so pikakasi to tan binulag to ra.

¹⁹ Insan dinago to ra nen Eliseo tan kuanto, “Aliway kawalaan yon dalan; aliwan sikato yay baley ya aanapen yo. Tombuk yo ak, ta iyakar ta kayod toon aanapen yo.” Insan inyakar to rad Samaria.

²⁰ Kaloob dad siudad, nampikasiy Eliseo, “Lokasan mo pay mata ra, Katawan; ipawil mo pa lay pakanengneng da.” Inebatan na Katawan so pikakasi to; impawil toy pakanengneng da, et anengneng dan wala rad loob na Samaria.

²¹ Nen anengneng na ari ed Israel iray Siriano, tinepet tod kinen Eliseo, “Kagalang a propita, pateyen ko ra? Pateyen ko la ra?”

²² Inmebat si Eliseo, “Andi! Papateyen mo ta ray sondalon nadadakep mod bakalan? Itdan mo ray nakan tan inomen, insan mo la ra papawilen ed ari ra.”

²³ Kanyan imparaanan ira na ari ed Israel na baleg a ponsia; kayari ran angan tan inminom, imbaki to la rad ari na Siria. Nanlapu lad saman tinondaan la na saray Siriano so ondogpa ed dalin na Israel.

Alakob so Samaria

²⁴ Ag abayag, impangulo nen Ari Ben-hadad na Siria iray amin a sondalo to a mibakal ed Israel tan nilakob day siudad na Samaria.

²⁵ Lapud sayan inkagawa, mapalaloy inkulang na kanen ed siudad, kanyan mambiliy walomplon pilak so sakey ya oloy asno tan mambiliy limaran pilak so kapalduay latay limon a taiy malapati.

²⁶ Aminsan ya agew, nen manaakar ed gilig na padir so ari, ineyag na sakey a bii ed sikato, “Tulongan mo ak pa, Kagalang ya Ari!”

²⁷ Inmebat so ari, “No ag ka tulongan na Katawan, antoy niiter kod sika? Wala sirin so trigok o alak ko?

²⁸ Antoy gunigon mo?” Inmebat imay bii, “Nen sakey ya agew imbaga na sayan bii a kanen miy anak ko, insan diad ontombuk ya agew say anak to.

²⁹ Kanyan inluto miy lakin anak ko tan kinan mi. Diad ontombuk ya agew imbagak ed sikaton kanen miy lakin anak to, balet inyamut to!”

³⁰ Kadngel na arid saya, pinilat toy kawes to diad inkagunigon to, tan naimano na saray totoon walad abay na padir ya akasolung na sako diad dalem na kawes to.

³¹ Inkuanto, “Pateyen ak komun na Dios no diad sayan agew et ag napotutay olo si Eliseo!”

³² Insan angibakiy sakey a toon mangalad kinen Eliseo. Legan to ya, kaiba nen Eliseo ed abung to iray pigaran mamasiken na Israel ya ombibisitad sikato. Kasakbayay insabi na samay imbaki na ari, inkuanen Eliseo ed saramay mamasiken, “Saman a managpatey na too et angibakiy mamotul na olok! Kasabi to dia, italak yoy puirta tan ag yo palolooben. Manomtombuk ed sikato so ari.”

³³ Ag to ni asumpal so ibabaga to nen sinmabiy ari tan kuanto, “Say Katawan so angiter ed sikatayo na sayan gunigon! Akin et manalagar ak niy antokaman a gawaen to?”