2 Saray Arari 3 - Maung A Balita Biblia

Say Impanbakal na Israel tan say Moab

¹ Diad kumalabinwalon taon na panooley nen Ari Josafat na Juda, nagmaliw ya ari na Israel si Joram a lakin anak nen Acab, tan nanayam ed Samaria legan ton nanoley a labinduay taon.

² Nankasalanan ed Katawan, balet aliwan singa inkaoges nen ama to odino si ina ton Jezebel so inkaoges to; inggeba toy impaalagey nen ama to a baton lusek a panangigalangan ed Baal.

³ Balet ag to tinondaan a nilagyat a mankasalanan iray Israelita, a singa ginawa nen Ari Jeroboam a lakin anak nen Nebat.

⁴ Amayamay so karniro nen Ari Mesa na Moab, tan tinaon a mangiiter ed ari na Israel na buis ton sanlasus libon kordiro, tan say bago na sanlasus libon karniro.

⁵ Balet nen inatey lay Ari Acab na Israel, linmaban ed Israel si Mesa.

⁶ Tinaynan a tampol nen Ari Joram so Samaria, tan tinipon ton amin iray sondalo to.

⁷ Impaibaga to ed kinen Ari Josafat na Juda: “Onlalaban ed siak so ari na Moab; labay mon ibaan ak a mibakal ed sikato?” “Labay ko,” ebat nen Josafat. “No akaparaan kayo, akaparaan kami met, siak, saray sondalok tan saray kabayok.

⁸ Dinay dalanen tayon ondogpa?” “Ondalan tayod kalawakan na Edom,” ebat nen Joram.

⁹ Kanyan linman mibakal si Ari Joram, say ari na Juda, tan say ari na Edom. Kayariy pitoy agew a pankukurang da, naoputan iray danum; anggapoy nakdaan a para saray totoo tan saray ayayep.

¹⁰ “Agayla yan inkagawa!” eyag nen Ari Joram. “Say Katawan impanoolup to tayon talo ya ipalimad ari na Moab!”

¹¹ Tinepet nen Ari Josafat, “Wala diay propita a diad panamegley to et makapangipanon tayod Katawan?” Inmebat so sakey ya opisyal na saray sondalo nen Joram, “Wadyay Eliseo a lakin anak nen Safat. Katulongan nen Elias nen saman.”

¹² “Tua man a propita,” inkuanen Josafat. Kanyan linma ra may taloran arari.

¹³ “Akin et tulongan ta ka?” inkuanen Eliseo ed ari na Israel. “Lakan mangipanon ed saray propitan angipanonan di amam tan inam.” “Andi!” ebat nen Joram. “Say Katawan so nantipon ed sikamin taloran arari, pian napadakep to kami ed ari na Moab.”

¹⁴ Inmebat si Eliseo, “Diad ngaran na mabilay a Katawan a panlilingkuran ko, no ag say panamablik ed Ari Josafat na Juda a kagampim, ag ta kan balut komun tulongan.

¹⁵ Iyakaran mo ak dia sirin natan na managtogtog.” Legan a totogtogen toy arpa to may managtogtog, niwalay pakayari na Katawan ed kinen Eliseo,

¹⁶ tan kuanto, “Onyay ibabaga na Katawan: ‘Gawaen kon dipositoy danum yan nakatan a kolus.

¹⁷ Anggaman ya anggapoy nanengneng yon oran odino mabiskeg a dagem, napanoy danum yan kolus, pian nawalaay daakan ya inomen yo, saray baka yo, tan saray arum ya ayayep yo.’”

¹⁸ Intuloy nen Eliseo ya inkuan, “Mainomay na Katawan a gawaen ya; panaloen to kayo met ed saray Moabita.

¹⁹ Nadakep yo ray amin a mararakep tan aliber na padir a siudad da; batangen yo ray amin a kakiewan dan mambubungay prutas, patondaen yo ray amin a sobul da, tan deralen yo ray amin a mataban kaalogan da diad panabun yoy bato.”

²⁰ Diad ontombuk a kabwasan ed oras na panagbagat, inmagos so danum a nanlapud bandad Edom tan nilanayapan toy dalin.

²¹ Nen nadngelan na saray Moabita a sinmabi ray taloran ararin ondogpad sikara, atawag tan nipasen ed ketegan iray amin a lalakin makabemben lay armas, manlapud sankalangweran ya anggad sankatakkenan.

²² Kabangon dad ontombuk a kabwasan, nasisinagan na agew so danum, kanyan ambalbalangan singa dala so nengneng to.

²³ “Dala,” kuanda. “Nanlalaban tan nampapateyan angangko ira may taloran arari! Tila, ta alaen tayo ray antokaman a walad kampo ra!”

²⁴ Balet kasabi rad kampo, dinogpaan iray Israelita tan pinasener da ra. Inosilan na saray Israelita iray Moabita, pinapatey da ra

²⁵ tan dinederal da ray siudad da. Kapetek na saray Israelita ed balang mataban alog, tinutupak da na bato anggad atabunan ya amin iray kaalogan. Pinopoletan da ray sobul tan binabatang da ray kakiewan. Diad kaonuran, say manonan siudad na Kir Hares labat so atilak ya ag aderal. Niliktub na saray Israelita, insan dinogpaan da.

²⁶ Nen anengneng na ari na Moab a natatalo, anipon na piton lasus a sondalon ispaday bebembenan da tan sinali toy onselak ed saray kalaban, pian makabatik ed ari na Siria, balet ag to ayarian.

²⁷ Kanyan inala toy sankapangulowanan a lakin anak ton onsalat ed sikaton manari, tan imbagat tod dios na Moab diad tapew na padir na siudad. Ataktakot iray Israelita, kanyan sinmoner ira tan amawil la rad dilin bansa ra.