2 Saray Arari 21 - Maung A Balita Biblia

Si Ari Manases na Juda

¹ Labinduay taon nen Manases nen nagmaliw ya ari ed Juda, tan nanoley ed Jerusalem na limamplo tan limay taon. Si Hefziba so ina to.

² Nanggagawa na kaogsan ed arap na Katawan, ta inalig to ray makapaingungot ya ogali da ray pinapataynan na Katawan legan a mankukurang iray totoo to.

³ Pinasimbalo ton impaalagey iray paganon pasen a panangigalangan a dinederal nen Ezekias ya ama to; nanggagawa na saray altar a panangigalangan ed Baal, tan nanggawa na talintao nen Asera, a singa samay ginawa nen Ari Acab na Israel. Inggalang met nen Manases iray bitewen.

⁴ Nanggawad dalem na Timplo na saray altar a panangigalangan na saray pagano, anta say Timplo so pasen ya imbaga na Katawan a pangigalangan ed sikato.

⁵ Diad duaran patio na Timplo nanggawa na saray altar a pangigalangan ed saray bitewen.

⁶ Insaklang ton bagat a popoolan so lakin anak to. Nambubuyon tan nampaparles tan nampapanon ed saray panagpalar tan saray manangipanon ed saray ispiritu na inaatey. Mapalaloy impankasalanan tod Katawan, kanyan impanpasnuk to.

⁷ Inyan tod dalem na Timplo so talintao nen diosan Asera. Onya so inkuan na Katawan ed kinen David tan si Solomon a lakin anak to nipaakar ed sayan Timplo: “Diad Jerusalem ed sayan Timplo so pasen a pinilik ed amin da ray lugar na labinduan tribu na Israel a pangigalangan ed siak.

⁸ No onuren na saray totood Israel iray amin a bilibilin ko tan sumpalen day intiron Ganggan ya inter ed sikara nen Moises ya aripen ko, ag ko ra abuloyan a napataynan ed dalin ya inter kod saray lalaki ra.”

⁹ Balet ag inonur na saray totood Juda so Katawan, tan inlagyat nen Manases iran nankasalanan na ambelat ni nen saray kasalanan a ginagawa da ray totoon pinapataynan na Katawan legan a mankukurang iray totoo to.

¹⁰ Inkuan na Katawan ed panamegley na saray aripen ton propita,

¹¹ “Ginagawa nen Manases ira yan makapaingungot a bengatlan maoges ni nen saray ginagawa da ray Cananeo; tan diad panamegley na saray talintaoy diriyos to inlagyat ton nankasalanan iray totood Juda.

¹² Kanyan siak, say Dios na Israel, so mangyakar na ontan lan deral ed Jerusalem tan Juda, et onkelaw so balang sakey a makadngel ed agawa.

¹³ Dusaen koy Jerusalem a singa ginawak ed Samaria, a singa ginawak ed kinen Ari Acab na Israel tan saray kabyangay boleg to. Pataynanen ko ray totood Jerusalem, et magmaliw a malinis a singa platon pinonasan tan impatikleb.

¹⁴ Ikaindan ko ray totoon nakdaan a mabilay, insan iyawat ko rad saray kalaban dan manakep ed sikara tan maneral ed dalin da.

¹⁵ Gawaen ko yad saray totook, ta nankasalanan irad siak tan impanpasnuk da ak, nanlapu lad panaon a pinmaway ed Egipto iray lalaki ra ya anggad natan.”

¹⁶ Pinatey nen Manases iray amayamay a totoon anggapoy kasalanan, kanyan adelap na dala so daladalan na Jerusalem; sayan ginagawa to et kaaruman na samay impangilagyat ton angigalang ed saray talintao iray totood Juda, kanyan impankasalanan to rad Katawan.

¹⁷ Nisulat ed libron Say Awaran na saray Ararid Juda iray arum nin ginagawa nen Manases, pati saray ginagawa ton kasalanan.

¹⁸ Inatey si Manases, nipompon ed tanamanan ed palasio, say tanamanan na Uza, insan sinmalat ed sikaton nanari si Amon a lakin anak to.

Si Ari Amon na Juda

¹⁹ Duamplo tan duay taon nen Amon nen nagmaliw ya ari na Juda, tan nanoley ed Jerusalem na duay taon. Si Mesulemet ya anak nen Haruz a taga baley na Jotba so ina to.

²⁰ Nanggagaway kaogsan ed arap na Katawan a singa si ama ton Manases;

²¹ inalig toy ginagawa nen ama to, tan inggalang to ray talintaoy diriyos ya inggalang nen ama to.

²² Impolisay toy Katawan, say Dios na saray lalaki to, tan ag to inonur iray ganggan na Katawan.

²³ Nankokomplut iray opisyal nen Amon sumpad sikato, insan da pinatey ed palasio.

²⁴ Pinatey na saray totood Juda ira may amatey ed kinen Amon tan ginawa ran ari si Josias a lakin anak to.

²⁵ Nisulat ed libron Say Awaran da ray Ararid Juda iray arum nin ginagawa nen Amon.

²⁶ Nipompon si Amon ed lobuk diad tanamanan na Uza, insan sinmalat ed sikaton nanari si Josias a lakin anak to.