2 Saray Arari 20 - Maung A Balita Biblia

Say Impansakit tan Inyabig nen Ari Ezekias

¹ Legan to met ira man ya agew, nansakit si Ari Ezekias tan ngalngali inatey. Linmad sikato si propita Isaias a lakin anak nen Amoz tan kuantod sikato, “Ibabaga na Katawan ya oksuy mo lan amiy bengatla, ta ag ka la onabig. Mamparaan kan ompatey.”

² Inyarap nen Ezekias so lupa tod padir, insan nampikasi:

³ “Nunot mo pa, Katawan, a matoor tan masimoon so impanlingkur kod sika, tan sinumpal ko lawas iray labay mon pagawad siak.” Insan inggapo toy nanakis na ampaipait.

⁴ Tinaynan nen Isaias so ari, balet kasakbayan na pakadalan tod pegley na loob na patioy palasio imbagad sikato na Katawan

⁵ ya ompawil ed kinen Ezekias, say manoley na totoo na Katawan, ta ikuantod sikato, “Say Katawan kuantod sika: Siak, say Katawan a Dios na lakim a David, et nadngel koy pikakasim tan anengneng koy interter na luam. Paabigen ta ka, tan diad kumatlon agew onla kad Timplo.

⁶ Pambilayen ta ka nin labinlimay taon. Iyagel ta ka tan sayan siudad na Jerusalem ed impirador na Asiria. Iyagel ko yan siudad lapud sikatoy pakagalangan ko tan lapud samay sipan kod aripen kon David.’”

⁷ Insan imbaga nen Isaias ed ari a tapalan toy pinitpit a bungay igos so pelsa to, pian onabig.

⁸ Tinepet nen Ari Ezekias, “Antoy pakapatnagan a paabigen ak na Katawan tan diad kumatlon agew et makakar ak ed Timplo?”

⁹ Inmebat si Isaias, “Itdan ka na Katawan na pakapatnagan a sumpalen toy sipan to. Antoy labay mo, paonaen ko na samploran balitang so anino ed takayan, odino paseneren ko na samplora?”

¹⁰ Inmebat si Ezekias, “Mainomay a paonaen na samploran balitang so anino! Paseneren na samploran balitang so labay ko.”

¹¹ Nampikasid Katawan si Isaias, tan pinasener to na samploran balitang so anino ed takayan ya inyan nen Ari Acaz.

Saray Imbakin nanlapud Babilonia

¹² Diad legan to met yan panaon, say ari na Babilonia a si Merodac-baladan a lakin anak nen Baladan, et nadngelan to a nansakit si Ari Ezekias, kanyan impawitan to na sulat tan rigalo.

¹³ Maliket si Ezekias ya angawat ed saramay imbaki tan impanengneng ton amin iray kayamanan to—saray pilak tan saray balituk to, saray rikado tan saray pabalingit to, tan amin a kagawaan na saray sondalo to. Anggapoy ag to impanengneng ed sikara a bengatlan walad saray kuarton panagsinupan odino walad anggan iner a pasen na nanarian.

¹⁴ Insan linmay propita Isaias ed kinen Ari Ezekias, tan tinepet to, “Iner so nanlapwan na sarayan totoo tan antoy kuandad sika?” Inmebat si Ezekias, “Nanlapu rad Babilonia ya arawdawin bansa.”

¹⁵ “Antoy anengneng dad palasio?” tepet nen Isaias. “Anengneng dan amin. Anggapoy ag ko impanengneng ed sikara a bengatlan walad saray kuarton panagsinupan,” ebat nen Ezekias.

¹⁶ Insan inkuanen Isaias ed ari, “Ibabaga na Katawan a makapanyarin-amin ya

¹⁷ asingger lay panaon a naawit ed Babilonia iray amin a bengatlan walad palasio tan amin a tinitipon ya anggad natan na saray lalakim. Anggapoy bengatlan nakeraan.

¹⁸ Pigarad saray kakanayon mo so naala tan magmaliw iran yunuko a manlingkur ed palasio na ari na Babilonia.”

¹⁹ Say atalusan nen Ari Ezekias a kabaliksan to ya et say kiwala na kareenan tan kaandi na kaatapan legan na pambilay to, kanyan inmebat, “Maung so imbagam ed siak a salita na Katawan.”

Say Samput na Impanoley nen Ezekias

²⁰ Nisulat ed libron Say Awaran da ray Ararid Juda iray arum nin ginagawa nen Ari Ezekias: saray impanatalo tod bakal, pati say impanggawa to na dipositoway danum tan say dalan na danum ya ompogtad siudad.

²¹ Inatey si Ezekias, tan sinmalat ed sikaton nanari si Manases a lakin anak to.