2 Saray Arari 18 - Maung A Balita Biblia

Si Ari Ezekias na Juda

¹ Nen kumatlon taon na panaarid Israel nen Oseas a lakin anak nen Elas, nagmaliw ya arid Juda si Ezekias a lakin anak nen Acaz.

² Ginmapon nanoley nen mantaon na duamplo tan lima, tan nanayam ed Jerusalem legan ton nanoley na duamplo tan siam a taon. Si Abia ya anak nen Zacarias so ina to.

³ Ginagawa toy makapaliket ed Katawan, ta inalig to ray ginagawa nen laki ton David.

⁴ Dineral to ray paganon pasen a panangigalangan, inggeba to ray lusek a bato tan saray talintao nen diosan Asera. Minekmek to met imay ginawa nen Moises a gansan oleg ya atawag na Nehustan, ta anggad saman a panaon nampopool ni ray Israelita na insinso a pamagalang dad samay gansan oleg.

⁵ Nanmatalek ed Katawan a Dios na Israel si Ezekias; say Juda ag awalaan na arin singa sikato, anggan saray ararin akaona o tinmombuk ed sikato.

⁶ Matoor ed Katawan, ag ton balut sinumlang, no ag ingen inapiapiger ton inonur ya amin iray ganggan ya inter na Katawan ed kinen Moises.

⁷ Kanyan walad sikatoy Katawan, tan inmaligwas ed antokaman a ginawa to. Nilabanan toy impirador na Asiria tan ag sinmuko ed sikato.

⁸ Tinalo to ray Filisteo tan nilooban ton amin iray kawalaan da manlapud sankamelagan a bario ya anggad sankabalgan a siudad, pati say Gaza tan saray kaliber-liber to ran lugar.

⁹ Diad kumapat a taon na panooley nen Ezekias—a sikatoy kumapiton taon na panooley nen Ari Oseas ed Israel—nilabanan nen Impirador Salmaneser na Asiria so Israel tan nilakob toy Samaria.

¹⁰ Adakep so Samaria nen kumatlon taon na inkalakob to; sikato yay kumanem a taon na panooley nen Ezekias tan kumasyam a taon na panooley nen Oseas.

¹¹ Say impirador na Asiria inawit tod Asiria iray Israelitan adakep, insan impanayam to ray arum ed siudad na Hala, saray arum diad Ilog na Habor ed distrito na Gozan, tan saray arum diad saray siudad na Media.

¹² Ataloy Samaria, ta ag inonur na saray totood Israel so Katawan a Dios da; ag da sinumpal so impisipanan tod sikara. Ag da tinoluk ya amin iray ganggan ya inter nen Moises ya aripen na Katawan. Ag ira dinmengel odino tinmoluk.

Tinaktakot na saray taga Asiria iray taga Jerusalem

¹³ Nen kumalabinapat a taon na panooley nen Ari Ezekias, dinogpaan nen Senakerib iray aliber na padir a siudad na Juda tan adakep to ra.

¹⁴ Angibakiy Ezekias na pigaran totoo ed kinen Senakerib a walad Lakis tan impaikuanto: “Nanggawa ak na makapoy; tondaan mo pa lay idodogpam, ta iter kod sikay anggan anton labay mo.” Imbaga nen impirador ya itdan nen Ezekias na samploran toniladan pilak tan sakey a toniladan balituk.

¹⁵ Inter sirin nen Ezekias ya amin iray pilak a walad dalem na Timplo tan saray pilak a walad pananginay kayamanan ed palasio;

¹⁶ inekal to met iray balituk a walad saray puirtay timplo, tan saray balituk ya impaipeket ton dili ed saray lusek na puirta, insan to ra inter ed kinen Senakerib.

¹⁷ Angibaki so impirador na Asiria na amayamay a sondalon nanlapud Lakis, ta dogpaan day Ezekias ed Jerusalem; saray taloran sankatageyan ya opisyal so angipangulod saray sondalo. Kasabi rad Jerusalem, nanayam irad dalan a pankikimeyan da ray managgaway abel, diad abay na banawang ya aagosay danum a manlalapud dipositoway danum a walad tagey.

¹⁸ Insan impaawit day Ari Ezekias, tan inabet ira na taloran opisyal to: si Eliakim a lakin anak nen Helcias tan makaoley ed palasio; si Sebna a sikritario na palasio; tan si Joas a lakin anak nen Asaf tan makaoley ed saray nepeg ya isulat.

¹⁹ Imbaga ed sikara na sakey ed saramay opisyal na Asiria a labay ya amtaen na impirador no antoy makasengeg na pambabaleg-balegan nen Ari Ezekias.

²⁰ Inkuanto, “Abaloan yo amon naala na saray salita so pasen na talonggaring tan biskeg na saray sondalo? Siopay ilaloan yon ontulong ed sikad ilaban yod Asiria?

²¹ Iilaloan yoy Egipto ya ontulong ed sikayo, balet satan a paniilalo yo et singa labat pangibabaston na bulawit—napoter tan nasakitan niy lima yo. Onyay kapara na Ari ed Egipto no walay siopaman a manmatalek ed sikato.”

²² Insan inkuan ni na samay sakey ya opisyal na Asiria, “Nayarin ibaga yod siak a manmamatalek kayod Katawan a Dios yo. Balet ag ta dineral nen Ezekias iray altar na Katawan tan saray pasen a panangigalangan ed sikato, insan imbaga tod saray totood Juda tan Jerusalem a diad altar ed Jerusalem labat so pangigalangan da?

²³ On, sigi, diad ngaran na impirador palugaran ta kayo. Itdan ta kayoy duan libon kabayo no makalmo kayoy lalakin onkabayod sikara!

²⁴ Ag kayo makasimbang ed anggan sankaabebaan lan opisyal na Asiria, balet iilaloan yo a saray taga Egipto et itdan da kayo na saray karwahi tan saray sondalon kumakabayo!

²⁵ Abaloan yo amon ag ak tinulongan na Katawan ed indogpak ed bansa yo tan dineral ko? Say dilin Katawan so angibagad siak a dogpaan koy bansa yo tan deralen ko.”

²⁶ Insan inkuan di Eliakim, Sebna, tan Joas ed samay opisyal, “Mansalita kad sikamiy Aramaica, ta natalusan mi. Ag ka mansasalitay Hebreo, ta ondedengel iray totoon walad tapew na padir.”

²⁷ Inmebat imay opisyal, “Abaloan yo amon sikayo tan say ari labat so angibakian na impirador ed siak a pangibagaan kod sayan amin a bengatla? Andi, mitotongtong ak met ed saray totoon manyodyorung ed tapew na padir, a kapara yo ran mangan na dilin tai ra tan oninom na dilin sirit da.”

²⁸ Insan imalagey tan ineyag tod salitay Hebreo, “Dengel yoy ibabagad sikayo na impirador na Asiria!

²⁹ Ipapasakbay tod sikayon ag yo aabuloyan a palikdoen kayo nen Ezekias, ta ag to kayo lamlamang niagel.

³⁰ Ag yo aabuloyan a tangoyuren to kayon manmatalek ed Katawan. Ag yo komun nununoten ya iyagel kayo na Katawan tan ag to abuloyan a dakepen na saray sondalo na Asiria so siudad yo.

³¹ Ag yo dedengeley Ezekias. Igaganggan na impirador na Asiria a paway kayod siudad tan suko ki la. Naabuloyan kayon mangan na ubas ed dilin kaubasan yo, mangan na igos ed dilin kaigosan yo, tan oninom na danum ed dilin bobun yo—

³² anggad panayamen kayo na impirador ed sakey a bansa a singa met lamlamang say bansa yo a wala ray kaubasan a mangiter na ubas tan wala ray trigo a gawaen a tinapay; sakey a dalin a wala ray kiew na oliba, larak na oliba, tan say dilo. No onuren yo ray ganggan to ag kayo ompatey, no ag ta mambilay kayo. Ag yo dedengeley Ezekias no ibaga tod sikayon iyagel kayoy Katawan, ta papalikdoen to kayo labat.

³³ Wala siriy dios na dinanman a bansa ya inyagel tod impirador na Asiria so dalin to?

³⁴ Iner la natan so kawalaan da ray diriyos na Hamat tan Arpad? Iner so kawalaan da ray diriyos na Sefarvaim, Hena, tan Iva? Wala sirin ed sikaray angyagel ed Samaria?

³⁵ Siopad sarayan diriyos na sarayan bansa so angyagel ed impirador na dalin da? Panon sirin so pannununot yoy iyagel na Katawan so Jerusalem?”

³⁶ Ag inmeseesel iray totoo, onung na ingganggan ed sikara nen Ari Ezekias; ag met ira anggan inmebat.

³⁷ Kanyan diad ermen di Eliakim, Sebna, tan Joas, pinilat day kawes da, linma la ra, insan imbalita rad ari so imbaga na samay opisyal na Asiria.