2 Saray Arari 17 - Maung A Balita Biblia

Si Ari Oseas na Israel

¹ Diad kumalabinduan taon na panooley nen Ari Acaz ed Juda, nagmaliw ya ari na Israel si Oseas a lakin anak nen Elas, tan nanayam ed Samaria legan ton nanoley a siam taon.

² Nanggaway kaogsan ed arap na Katawan, balet aliwan singa kaogsan da ray akaona nen say sikaton nanoley ed Israel.

³ Akibakal ed sikatoy Impirador Salmaneser na Asiria; sinmukoy Oseas ed kinen Salmaneser, kanyan tinaon a nambabayar na buis ed sikato.

⁴ Balet aminsan a taon si Oseas angibakid Ari So na Egipto na pigaran totoo to tan patulongan, tan tinondaan toy nambayar na tinaon buis ed Asiria. Nen akabatan ya nen Salmaneser, impaerel toy Oseas, insan to impaipriso.

Say Inkataloy Samaria

⁵ Insan dinogpaan nen Salmaneser so Israel tan nilakob toy Samaria. Diad kumatlon taon na impanlakob to,

⁶ a sikatoy kumasyam a taon na panooley nen Oseas, adakep na impirador na Asiria so Samaria; inawit tod Asiria iray Israelitan adakep to, insan impanayam to ray arum ed siudad na Hala, saray arum diad asingger ed Ilog na Habor diad distrito na Gozan, tan saray arum diad saray siudad na Media.

⁷ Ataloy Samaria, ta nankasalanan iray Israelita ed Katawan a Dios da ya angyagel ed sikarad ari na Egipto tan angipaway ed sikarad Egipto. Angigalang irad saray arum a diriyos,

⁸ inalig da ray ogali na saray totoon pinataynan na Katawan legan dan mankukurang, tan tinombuk da ray ogalin inggapo na saray arari na Israel.

⁹ Ginagawa na saray Israelita iray bengatlan ag labay na Katawan. Nanggagawa ray paganon pasen a panangigalangan diad amin a baley da, manlapud sankamelagan a bario ya anggad sankabalgan a siudad.

¹⁰ Diad amin a toktok na pokdul tan diad silong na balang masalumpapak a kiew, angyan ira na saray lusek a bato tan saray talintao nen diosan Asera.

¹¹ Nampopool met iray insinso ed saray paganon altar diad impangalig dad saray ogali na saray totoon pinataynan na Katawan ed dalin a sinakop da. Impanpasnuk day Katawan, lapud saray maoges a gawgawa ra,

¹² tan ag da inonur so ganggan na Katawan ya ag ira mangigalang ed saray talintaoy diriyos.

¹³ Angibakiy Katawan na saray managpulong tan saray propita to a mamasakbay ed Israel tan Juda. Onyay impaikuantod sikara: “Ikaindan yo ray maoges a kagagawa yo tan onur yo ray bilin kon walad Ganggan ya inter kod saray lalaki yo tan impasabik ed sikayo diad panamegley na saray aripen kon propita.”

¹⁴ Balet ag ira tinmoluk; anawet so olo ra, a singa saray lalaki ran ag nanmatalek ed Katawan a Dios da.

¹⁵ Ag da nilabay ya onuren iray bilin to, ag da sinumpal so impisipanan tod saray lalaki ra, tan ag da inkabkabilangan iray pasakbay to. Inggalang day andi-kakanaan iran talintaoy diriyos tan nagmaliw iran andi-kakanaan met, tan inalig da ray ogali na kaliber-liber iran bansa. Ag da sirin tinoluk so ganggan na Katawan ya ag da aligen iray pagano.

¹⁶ Ag da inonur ya amin iray ganggan na Katawan a Dios da tan nanggawa ray galangen da a duaran mital a bakan kalakyan; nanggawa ra met na sakey a talintao nen diosan Asera, inggalang da ray bitewen, tan nanlingkur irad dios a Baal.

¹⁷ Insaklang dan bagat a popoolan ed saray paganon diriyos iray anak dan lalaki tan bibii; angipanonan da ray manangipanon ed saray ispiritu na inatey tan saray managparles, tan sigput dan ginawa ray maoges ed arap na Katawan, kanyan impanpasnuk da.

¹⁸ Mapalalo sirin so pasnuk na Katawan ed saray Israelita, kanyan pinataynan to rad arap to tan intilak to labat so nanarian na Juda.

¹⁹ Balet ag met inonur na saray totood Juda iray ganggan na Katawan a Dios da; inalig da ray ogalin inalig na saray totood Israel.

²⁰ Impolisay na Katawan iray amin ya Israelita tan impalima to rad saray maruksan kalaban, ya anggad apataynan to ran amin ed arap to.

²¹ Kayarin impansian na Katawan so Israel tan Juda, impagmaliw na saray Israelita ya ari ra si Jeroboam a lakin anak nen Nebat. Impaikaindan nen Jeroboam ed sikara so Katawan da, insan inlagyat to ran manggaway ambelat a kasalanan.

²² Inalig day Jeroboam, tan intuloy dan ginagawa ray kasalanan to,

²³ ya anggad pinataynan na Katawan irad arap to onung na sinalita to diad panamegley na saray aripen ton propita. Kanyan niakar ya adakep ed Asiria iray Israelita, a dimay panaayaman da ni ya anggad natan.

Nanayam ed Israel iray taga Asiria

²⁴ Say impirador na Asiria angawit na saray totoon taga saray siudad na Babilonia, Cuta, Ava, Hamat, tan Sefarvaim, insan impanayam to rad saray siudad na Samaria. Sikaray kasalat na saray Israelitan niakar ed Asiria. Kinayaryan da ra yan siudad tan diman ira nanayam.

²⁵ Diad onona ran taon na impanayam dad man, ag da inggalang so Katawan, kanyan pigarad sikaray pinatey na lion ya imbaki na Katawan.

²⁶ Nibagad impirador na Asiria a saray totoon impanayam tod saray siudad na Samaria et ag da amtay ganggan na dios na saman a dalin, kanyan papateyen ira na saray lion ya imbaki na dios.

²⁷ Kanyan ingganggan na impirador: “Papawil yoy sakey ed saray paparin inawit ti dian adakep; papawil yo tan panayam yod man, pian nabangatan to ray totoo na ganggan na dios na saman a dalin.”

²⁸ Sakey sirin a parin Israelitan nanlapud Samaria so linmad Betel tan nanayam diman, insan binabangatan tod man iray totoo no panoy pangigalang ed Katawan.

²⁹ Balet intuloy na saray totoon manaayam ed Samaria so nanggawa na saray dilin talintao ra, insan da ra inyan ed saray altar a ginagawa na saray Israelita. Nanggawa so kapag olup na totoo na saray talintao ed saray siudad a panaayaman da:

³⁰ nanggawa na saray talintao nen Sucotbenot iray taga Babilonia; saray talintao nen Nergal iray taga Cuta; saray talintao nen Asima iray taga Hamat;

³¹ saray talintao nen Nibhaz tan Tartac iray taga Iva; tan saray taga Sefarvaim insasaklang dan bagat a popoolan iray anak da diad saray diriyos dan Adramelec tan Anamelec.

³² Inggalang met na sarayan totoo so Katawan tan nampili rad sikaran dili na saray nandoroman klasi na totoo a manlingkur a papari ed saray paganon pasen a panangigalangan tan mangisaklang irad man na saray bagat a para sikara.

³³ Kanyan inggalang day Katawan, balet inggalang da met iray diriyos dan dili, onung ed saray ogali na saray bansan nanlalapwan da.

³⁴ Anggad natan gagawaen da ni ray gendat ya ogali ra. Ag da gagalangen so Katawan tan ag da anggan oonuren iray ganggan tan saray bilin ya inter tod saray kabyangay boleg nen Jacob ya inngaran to na Israel.

³⁵ Akisipanan so Katawan ed saray Israelita tan ingganggan to ra: “Ag kayo mangigagalang ed saray arum a diriyos; ag kayo ondadakmomod sikara, o manlilingkur, o mangibabagat ed sikara.

³⁶ Nepeg yo ak a takotan, siak a Katawan, ya angipaway ed sikayod Egipto diad panamegley na baleg a pakayari; nepeg kayon ondakmomod siak tan mangibagat ed siak.

³⁷ Nepeg yon onuren lawas iray ganggan tan saray bilin ya insulat kon para sikayo. Ag yo nepeg a takotan iray arum a diriyos,

³⁸ tan ag yo nepeg a lingwanan so impisipanan kod sikayo.

³⁹ Nepeg a takotan yo ak, say Katawan a Dios yo, et iyagel ta kayod saray kalaban yo.”

⁴⁰ Balet ag dinmengel ira man a totoo, tan intuloy dan inonur iray gendat ya ogali ra.

⁴¹ Inggalang na saraman a totoo so Katawan, balet inggalang da met iray talintaoy diriyos da; tan anggad natan gagawaen na saray kabyangay boleg da iray singa ginagawa ra.