2 Saray Arari 16 - Maung A Balita Biblia

Si Ari Acaz na Juda

¹ Diad kumalabimpiton taon na panaarid Israel nen Pekas a lakin anak nen Remalias, nagmaliw ya ari na Juda si Acaz a lakin anak nen Jotam.

² Ginmapon nanoley nen mantaon na duamplo, tan nanayam ed Jerusalem legan ton nanoley na labinanem taon. Ag to inalig iray maung a ginagawa nen laki ton David; ginagawa to ingen so aliwan makapaliket ed Katawan a Dios to,

³ ta inalig to ray ginagawa na saray ararid Israel. Insaklang ton bagat a popoolan ed saray talintaoy diriyos so anggan say dilin anak ton laki, ta inalig toy makapaingungot a kaogaliyan na saray totoon pinataynan na Katawan legan a mankukurang iray Israelita.

⁴ Nambabagat tan nampopool na insinso si Acaz diad saray paganon pasen a panangigalangan, diad saray pokdul, tan diad silong na balang masalumpapak a kiew.

⁵ Di Ari Rezin na Siria tan Ari Pekas na Israel et dinogpaan tan nilooban day Jerusalem, balet ag da natalo si Acaz. (

⁶ Legan to yan panaon, abawi na ari na Edom so siudad na Elat tan pinataynan da ray taga Juda a manaayam diman. Nanayam diman iray taga Edom tan wadman ni ra ya anggad natan.)

⁷ Angibakiy Acaz na totoo ed kinen Tiglat-pileser ya impirador na Asiria, tan impaikuanto: “Siak so matoor ya aripen mo. Dago mo ak pa, ta iyagel mo ak ed saray ararid Siria tan Israel ya ondodogpad siak.”

⁸ Inala nen Acaz iray pilak tan balituk ed Timplo tan diad pananginay kayamanan ed palasio, insan to ra impairigalod impirador.

⁹ Inmabubon si Tiglat-pileser ed kerew nen Acaz. Dinogpaan to tan saray sondalo to so Damasco, adakep da, pinatey day Ari Rezin, tan inawit dad Kir iray totoon adakep da.

¹⁰ Nen linmad Damasco si Ari Acaz, ta abeten toy Impirador Tiglat-pileser, anengneng tod may altar. Impawit tod kinen Urias a pari so kinon altar a kaparpara tod amiamin imay altar ed Damasco.

¹¹ Kanyan angipaalagey si Urias na altar a kaparpara to may altar ed Damasco tan sinumpal to kasakbayay impawil nen Acaz.

¹² Kapawil nen Acaz a nanlapud Damasco, anengneng ton asumpal la may altar,

¹³ kanyan nampoolan to na saray imbabagat ya ayayep tan saray trigo. Inibungan to met na bagat ya alak tan say dala na bagat a para kareenan.

¹⁴ Walad leet na balon altar tan Timplo so gansan altar a nisaklang ed Katawan, kanyan impaiyalis nen Acaz ed baybay na balon altar.

¹⁵ Insan ingganggan tod kinen Urias, “Diad tapew na sayan baleg ya altar ko isaklang yo ray bagat a popoolan no kabwasan, balet no labi saray bagat a trigo, saray bagat a popoolan, tan saray bagat a trigo a sikaray bagat na ari tan saray totoo, tan say alak a bagat met na saray totoo. Ibung mod saman ya altar so dala na amin ya ayayep a nibagat. Balet ag mo ikakana may gansan altar, ta ikanak no walay labay kon amtaen.”

¹⁶ Sinumpal nen Urias so ingganggan na ari.

¹⁷ Ginaygay nen Ari Acaz iray gansan kariton ya inkanad dalem na Timplo tan inekal to ray kawa ya akatapew ed saramay kariton. Inala to met so gansan dipositoway danum ya akatapew ed beneg na saramay labinduan gansan bakan kalakyan, insan to ra intapew ed baton pundasion.

¹⁸ Pian napaliket nen Acaz so impirador na Asiria, inekal to met ed Timplo so pasen a kawalaay trono na ari tan sinaraan toy lolooban na ari ed Timplo.

¹⁹ Nisulat ed libron Say Awaran da ray Ararid Juda iray arum nin ginagawa nen Ari Acaz.

²⁰ Inatey si Acaz, nipompon ed kamposanto da ray arari diad Siudad nen David, insan sinmalat ed sikaton nanari si Ezekias a lakin anak to.