2 Saray Arari 13 - Maung A Balita Biblia

Si Ari Joacaz na Israel

¹ Nen kumaduamplo tan taloy taon na panaarid Juda nen Joas a lakin anak nen Ahazia, nagmaliw ya ari na Israel si Joacaz a lakin anak nen Jehu, tan nanayam ed Samaria legan ton nanoley a labinpitoy taon.

² Inalig toy Ari Jeroboam ya akaonan nanoley nen say sikato, nankasalanan ed Katawan tan inlagyat ton nankasalanan so Israel; ag to tinondaan a ginagawa so kaogsan to.

³ Lapud saya, akapasnuk ed Israel so Katawan, kanyan inabuloyan toy Hazael na Siria tan si anak ton laki a si Ben-hadad a tinalo ran amimpiga so Israel.

⁴ Insan nampikasid Katawan si Joacaz, et inebatan na Katawan so pikakasi to, lapud pakanenengneng tod ontan lan pamapairap na ari na Siria ed saray Israelita.

⁵ Angibakiy Katawan na sakey a pangulo ed Israel a sikatoy angekal ed saray Israelita ed pakaoley na saray Siriano; kanyan nagmaliw a mareen so panagbilay da a singa nen saman.

⁶ Balet ag da inkaindan iray kasalanan ya angilagyatan nen Ari Jeroboam ed Israel, no ag ta intuloy day nankakasalanan; nansiansiad Samaria so talintao nen diosan Asera.

⁷ Anggapoy nakdaan a sondalo nen Joacaz likud labat ed saray limamplon kumakabayo, samploran karwahi, tan samplon libon sondalo, ta dinederal na ari na Siria iray arum; ginagatinan da ran singa dabuk.

⁸ Nisulat ed libron Say Awaran da ray Ararid Israel iray arum nin ginagawa nen Joacaz tan saray impanatalo tod bakal.

⁹ Inatey tan nipompon ed Samaria, insan sinmalat ed sikaton nanari si Jehoas a lakin anak to.

Si Ari Jehoas na Israel

¹⁰ Nen kumatalomplo tan piton taon na panooley nen Ari Joas na Juda, nagmaliw ya ari na Israel si Jehoas a lakin anak nen Joacaz, tan nanayam ed Samaria legan ton nanoley a labinanem a taon.

¹¹ Nanggagawa met na kaogsan sumpad Katawan tan inalig to ray kasalanan ya angilagyatan nen Ari Jeroboam ed Israel.

¹² Nisulat ed libron Say Awaran da ray Ararid Israel iray arum nin ginagawa nen Ari Jehoas, pati say inkasebeg ton akibakal ed ari Amasias na Juda.

¹³ Inatey si Jehoas, nipompon ed kamposanto da ray arari diad Samaria, insan sinmalat ed sikaton nanari si Jeroboam ya anak ton laki.

Say Impatey nen Eliseo

¹⁴ Mapalaloy sakit nen Eliseo tan ipatey to la; binisita nen Ari Jehoas na Israel. Nanakis ed abay nen Eliseo tan inkuanto, “Ama, O ama! Sikay makapanyarin manangyagel na Israel!”

¹⁵ “Mangala kay bekang tan pigaran pana,” ganggan nen Eliseo ed kinen Jehoas. Angalay Jehoas,

¹⁶ insan imbaga nen Eliseo ed sikato a mamparaan a mangipana. Namparaan sirin, insan intapew nen Eliseo iray lima tod saray lima nen Jehoas.

¹⁷ Insan ingganggan nen Eliseo, “Lokasan moy bintanan akaarap ed Siria.” Nilokasan nen Ari Jehoas. “Mangipana ka!” ganggan nen Eliseo. Kapangipana to, inkuan nen Eliseo, “Sikay pana na Katawan a panalo tod Siria. Mibakal kad saray Siriano diad Afec anggad natalom ira.”

¹⁸ Insan imbaga nen Eliseo ed ari ya alaen to ray arum a pana tan itupak ton ipanek irad dalin. Amitlon angipanek, insan tinmonda.

¹⁹ Lapud saya akapasnuk si Eliseo, tan kuantod ari, “Aminlima o aminem mo komun ya intupak ya impanek, et diad ontan nagnap komuy panalom ed saray Siriano; balet natan mamitlom ira labat a taloen.”

²⁰ Inatey si Eliseo, insan nipompon. Tinaon a dodogpaan na saray olup da ray Moabita so dalin na Israel.

²¹ Aminsan ya agew, legan na sakey a tolur, sakey ed saramay olup na Moabita so anengneng, et saray mangitotolur imbantak dad lobuk nen Eliseo so bangkay, insan ira batik. Kadiwit na samay bangkay ed saray pokel nen Eliseo, abilay imay too, insan inmalagey.

Say Bakal na Israel tan Siria

²² Pinairap nen Ari Hazael iray Israelita legan na impanoley nen Joacaz,

²³ balet mapangasi tan maabagey so Katawan ed sikara. Ag to inyabuloy a naderal ira, no ag ingen tinulongan to ra, lapud impisipanan tod kindi Abraham, Isaac, tan Jacob. Ag to nilingwanan iray totoo to.

²⁴ Kapatey nen Ari Hazael na Siria, nagmaliw ya ari si Ben-hadad ya anak ton laki.

²⁵ Insan tinalo nen Ari Jehoas ya amitlo si Ben-hadad, tan abawi to ray siudad ya adakep nen Ben-hadad legan na impanoley nen Joacaz ya ama nen Jehoas.