2 Saray Arari 12 - Maung A Balita Biblia

Si Ari Joas na Juda

¹ Nen kumapiton taon na panooley nen Ari Jehu ed Israel, nagmaliw ya ari na Juda si Joas, tan nanayam ed Jerusalem legan ton nanoley ya apataploy taon. Si Zibia a taga siudad na Beer-seba so ina to.

² Legay impanbilay nen Joas ginagawa to ray makapaliket ed Katawan lapud binabangatan nen Joiada a pari.

³ Balet ag aderal iray pasen a panagpikasian na saray pagano, kanyan intuloy na saray totoo so nambagat tan nampool na insinso ed saraman a pasen.

⁴ Tinawag nen Joas iray papari, insan to ra ingganggan ya isinup da ray kuartan nibabayar nipaakar ed saray bagat diad Timplo—saray inagew-agew a napapasegep nipaakar ed saray bagat, tan saray kuartan mabolus a niiter.

⁵ Makaoley so balang pari ed kuartan iiter na saray panlilingkuran to, tan onung na pankaukolan nikana so kuarta ed pampaapiger na Timplo.

⁶ Balet diad loob na duamplo tan taloy taon na panooley nen Joas, ag ni nampaapiger na Timplo iray papari.

⁷ Kanyan tinawag toy Joiada tan saray arum a papari tan tinepet tod sikara, “Akin et ag yo aapigeren so Timplo? Manlapud natan aliwa lan sikayoy mangisinup na kuartan awaten yo; nepeg yo lan ipalima, pian napaapiger so Timplo.”

⁸ Inmabubon iray papari ed saya tan inmabubon met iran aliwan sikaray mamaapiger na Timplo.

⁹ Insan angala na kahon si Joiada, binotawan tod tapew, tan inyan tod abay na altar, diad nikawanan no kaloob ed Timplo. Saray paparin nipasen ed lolooban na Timplo ipelag dad kahon iray amin a kuartan inter na saray manangigalang.

¹⁰ No dakel lay kuartad kahon, dagoen la na sikritario na ari tan say Pangulon Pari, bilangen day kuarta, ikarga rad saray supot, insan da ra berberen.

¹¹ Kayarin nisulat so dugan bilang na kuarta, ipalima ra may pilak ed saray totoon makaoley ed kimey na Timplo; insan sarayan totoo bayaran da ray karpintiro, saray managpaalagey,

¹² saray kantiro, tan saray managtabas na bato, manaliw iray tabla tan saray baton ikana ed pampaapiger, tan bayaran da ray amin nin nakaukolan a panggastosan.

¹³ Anggapo balet ed samay kuarta so inkanan pambayar ed panggawa na saray pilak a kupa, palanggana, trumpita, odino saray katli na pabiloy lamparaan, odino antokaman a kagawaan a pilak o balituk.

¹⁴ Inkanan amin imay kuarta ed impanbayar ed saray nankikimey tan diad impansaliw na saray inkana ed pangapiger.

¹⁵ Tuan napanmatalkan iray totoon makaoley ed kimey, kanyan ag la kinaukolan a sokayan so listaan day kuarta.

¹⁶ Saray napapasegep a kuartan innunot a para saray bagat a pangipulang na kasalanan tan saray kuartan napapasegep diad pangisaklang na saray bagat a para kasalanan et ag ipepelag ed kahon; kayaryan ira na papari.

¹⁷ Diad saman a panaon, dinogpaan nen Ari Hazael na Siria so siudad na Gat tan adakep to; insan ginetma ton dogpaan so Jerusalem.

¹⁸ Inala nen Ari Joas na Juda iray amin a bagat ya insaklang ed Katawan na saray akaonan nanoley nen say sikato a di Ari Josafat, Jehoram, tan Ahazia. Inyarum to ra ed saray dilin bagat to, tan saray amin a balituk a walad saray pananginay kayamanan ed Timplo tan palasio, insan to ra inter a rigalo ed kinen Ari Hazael. Kanyan tinaynan nen Hazael tan saray sondalo to so Jerusalem.

¹⁹ Nisulat ed libron Say Awaran da ray Ararid Juda iray arum nin ginagawa nen Ari Joas.

^20-21 Si Ari Joas nankokomplutan a nilabanan na saray opisyal to; duarad sikara, si Josacar a lakin anak nen Simeat tan si Jozabad a lakin anak nen Somer, so amatey ed sikato diad abung a nipaalagey ed pasen a tinabunan diad bokig na Jerusalem tan walad dalan a mamaarap ed Sila. Nipompon si Joas ed kamposanto da ray arari diad Siudad nen David, insan sinmalat a nanari si Amasias a lakin anak to.