2 Saray Arari 11 - Maung A Balita Biblia

Si Riyna Atalia na Juda

¹ Kadngel nen Atalia ya ina nen Ari Ahazia ed impamatey ed anak to, impapatey ton amin iray kabyangay pamilya na ari.

² Bukbukor nen Joas a lakin anak nen Ahazia so akabatik. Kaiba la lawari na saray arum a napatey, balet inyagel na panginaen ton si Josaba ya anak nen Ari Jehoram tan agi nen Ahazia ed ama. Inyakar tod kuarton ogipan ed dalem na Timplo si Joas tan say kumokomis ed sikato, ta inyamut tod kinen Atalia, kanyan ag apatey.

³ Kinomisan nen Josaba ya anem taon imay ogaw tan inyaamut tod dalem na Timplo, legan na impanoley nen Atalia a riyna.

⁴ Balet nen kumapiton taon, si Joiada a pari impatawag tod Timplo iray opisyal a makaoley ed saray umaantabay na ari tan saray bantay na palasio. Diad dalem na Timplo impansamba to ran onabubon ed gawaen to. Impanengneng tod sikaray Joas a lakin anak nen Ari Ahazia,

⁵ insan to ingganggan ed sikara: “No mankimey kayo no Agew na Panagpainawa, kakatlod sikayoy mangguardia na palasio;

⁶ say kakatlo mangguardia ed Puirta na Sur, tan say kakatlo mangguardia ed puirta a kaiba da ray arum a guardia.

⁷ Mangguardia ed Timplo iray duaran kakatlo ed sikayon ag mankimey no Agew na Panagpainawa, ta guardiaan day ari.

⁸ Akaoyus so ispada yon mangguardia ed Ari Joas, tan olup yo ed inermay laen to. Patey yo so siopaman ya onsingger ed sikayo.”

⁹ Inonur na saramay opisyal ira may ganggan nen Joiada, tan inyakar dad sikato ray totoo ra—saray ag mangguardia no Agew na Panagpainawa tan saray mangguardia.

¹⁰ Inter tod saramay opisyal iray pika tan saray samper a kayaryan nen Ari David a nisinup irad dalem na Timplo.

¹¹ Impasen to rad kaliber-liber na arap na Timplo, ta iyagel day ari; akaoyus so ispada ray nangguardia.

¹² Insan impaway nen Joiada si Joas, kinoronaan to tan inter tod sikato ray ganggan a nipaakar ed panari. Alanaan tan nibawag a manari si Joas. Nantitipak iray totoo tan ineeyag da, “Andokey komun so bilay na ari!”

¹³ Nadngel nen Riyna Atalia so ingal da ray guardia tan saray totoo, kanyan nangganat a linmad Timplo a dimay nantitiponan na saray totoo.

¹⁴ Anengneng tod man so balon ari a manalalagey ed abay na lusek ed lolooban na Timplo, onung na naogaliyan. Aliber na saray opisyal tan saray managtrumpita so ari, tan malikeliket a maneeyag tan mampapaknul na trumpita iray totoo. Diad inkagunigon to ginebyas toy kawes to tan ineyag to, “Sumlang ya ed pakaoley! Sumlang ya ed pakaoley!”

¹⁵ Ag labay nen Joiada a napatey ed solar na Timplo si Atalia, kanyan ingganggan tod saray opisyal na sondalo: “Ipaway yon idalan ed leet na saray dasig da ray sondalo, tan patey yoy siopaman a mangyagel ed sikato.”

¹⁶ Siningkat da, inyakar dad palasio, insan da pinatey ed Puirtay Kabayo.

Saray Pasimbalon Ginagawa nen Joiada

¹⁷ Si Joiada impisipanan tod Katawan so ari tan saray totoo a sikaray totoo na Katawan; impansipanan to met so ari tan saray totoo.

¹⁸ Linmad timplo nen Baal iray totoo, insan da inggeba; minekmek da ray altar tan saray wadman a talintaoy diriyos, tan pinatey dad arap na saray altar si Matan a pari nen Baal. Wala ray impanbantay nen Joiada ed Timplo,

¹⁹ insan sikato, saray opisyal, saray umaantabay na ari, tan saray guardiay palasio et inolup day ari manlapud Timplo ya anggad palasio; tinmombuk ed sikara iray amin a totoo. Dinmalan ed Puirta na Guardia so ari, insan inmirung ed trono.

²⁰ Akaliket ya amin iray totoo, tan dinmeen so siudad, natan ta apatey lad palasio si Atalia.

²¹ Nagmaliw ya ari na Juda si Joas nen mantaon na pitora.