2 Saray Arari 10 - Maung A Balita Biblia

Apatey iray Kabyangay Boleg nen Acab

¹ Wala ray pitomplon kabyangay boleg nen Acab a manaayam ed siudad na Samaria. Nansulat si Jehu tan impawitan toy kopia iray manoley ed siudad, saray manonan ombaley, tan saray manaasikasod saray kabyangay boleg nen Acab. Onyay tanul na sulat:

² “Sikayoy makaoley ed saray kabyangay boleg na ari, tan walad sikayo ray karwahi, kabayo, armas, tan saray alibir na padir a siudad. Kanyan kapangawat yod sayan sulat,

³ nakaukolan a mamili kayoy sankaabigan a kabyangan na boleg na ari, gawa yon ari, insan kayo milaban a mangyagel ed sikato.”

⁴ Ataktakot iray manoley ed Samaria. “Panon tayon labanay Jehu,” kuanda, “anta ag alabanan di Ari Joram tan Ari Ahazia?”

⁵ Angipawit na sulat a para Jehu iray opisyal a makaoley ed palasio tan saray opisyal a makaoley ed siudad, pati saray manonan ombaley tan saray managasikasod saray kabyangay boleg nen Acab. Onyay tanul na sulat da: “Aripen mo kami, tan sipaparaan kamin manggawa na antokaman a labay mo. Balet ag mi gawaen ya ari so siopaman; gawam so isisipen mon sankaabigan.”

⁶ Sinulat to ra lamet nen Jehu: “No migampi kayod siak, tan sipaparaan kayon mangonur ed saray ganggan ko, iyakar yod siak diad Jezreel, diad onyan oras nabwas, iray olo na saray kabyangay boleg nen Ari Acab.” Aasikasoen tan papabalegen na saray manonan ombaley na Samaria ira may pitomplon kabyangay boleg nen Ari Acab.

⁷ Nen naawat da may sulat, pinatey na saray pangulo na Samaria ira may pitomplon kabyangay boleg nen Acab, inyan dad saray baskit iray olo ra, insan da ra impawit ed kinen Jehu diad Jezreel.

⁸ Nen nibagad kinen Jehu a niakar la ra may olo na saray kabyangay boleg nen Acab, ingganggan ton igaton da ra a duaran bontun diad puirta na siudad tan itilak da rad man ya anggad kabwasan.

⁹ Kasabiy kabwasan, linmad puirta si Jehu tan inkuantod saray totoon wadman, “Siak so nanlipot a linmaban ed kinen Ari Joram tan pinatey ko; anggapoy kasalanan yod saman ya agawa. Balet siopay amatey ed saraya?

¹⁰ Saya so mamaneknek ya ontuan amin iray imbagay Katawan nipaakar ed saray kabyangay boleg nen Acab. Sinumpal na Katawan so insipan to diad panamegley nen propita ton Elias.”

¹¹ Insan pinatey nen Jehu iray amin a manaayam ed Jezreel a kakanayon nen Acab tan saray amin ya opisyal to, saray malet a kakaaro to, tan saray papari to; anggapod sikaray atilak a mabilay.

Apatey iray Kakanayon nen Ari Ahazia

¹² Tinaynan nen Jehu so Jezreel, ta onlad Samaria. Diad dalan, diad pasen a tatawagen na “Kampo da ray Pumapastol,”

¹³ nabet to ray pigaran kakanayon nen Ahazia a nanari ed Juda tan tinepet tod sikara, “Siopa kayo?” “Kakanayon kami nen Ahazia,” ebat da. “Onla kamid Jezreel, ta bisitaen mi ray anak nen Riyna Jezebel tan saramay arum a kabyangay pamilya na ari.”

¹⁴ Ingganggan nen Jehu ray totoo to, “Ala yo ran mabilay!” Inerel da ra, insan da ra pinatey ed abay na aralem ya abut diman. Apataplo tan dua ran amin; anggapoy anggan sakey ed sikaray atilak a mabilay.

Apatey ya Amin iray Atilak a Kakanayon nen Acab

¹⁵ Intuloy nen Jehu so panaakar to, tan diad dalan nabet nen Jonadab a lakin anak nen Recab. Imbano nen Jehu tan kuanto, “Sika tan siak et namparay kanunotan ta. Antoy kuanmo, tulongan mo ak?” “On, tulongan ta ka,” ebat nen Jonadab. “Iderew mod siak sirin so limam,” ebat nen Jehu. Nambenbenan iray lima, insan tinulongan nen Jehu ed inlogan tod karwahi,

¹⁶ tan kuanto, “Mila kad siak, ta nengneng moy inkatoor kod Katawan.” Nanloganan iran dua ya anggad Samaria.

¹⁷ Kasabi rad man, pinatey nen Jehu ray amin a kakanayon nen Acab; anggapoy intilak to ya anggan sakey, onung na imbagay Katawan diad panamegley nen Elias.

Apatey iray Manangigalang ed Baal

¹⁸ Impantitipon nen Jehu iray amin a totood Samaria tan kuantod sikara, “Nanlingkur ed dios a Baal si Ari Acab, balet mapalalo niy panlingkur kod sikato.

¹⁹ Tawag yo sirin iray amin a propita nen Baal, amin a manangigalang ed sikato, tan amin a papari to. Anggapoy siopaman ya ag dia onla, ta mangisaklang ak na baleg a bagat ed Baal; napatey so siopaman ya andi dia.” (Impansilib ya nen Jehu, ta labay ton pateyen ya amin iray manangigalang ed Baal.)

²⁰ Insan ingganggan nen Jehu, “Mampili kayoy sakey ya agew a pangigalang ed Baal!” Nampili ra sirin,

²¹ insan to ya impaibawag ed intiron dalin na Israel. Dinmagon amin iray manangigalang ed Baal; anggapoy anggan sakey ya ag dinmago. Linma ran amin ed dalem na timplo nen Baal; napnon manlapud bandad arap ya anggad beneg.

²² Ingganggan nen Jehu may parin makaoley ed saray masanton kawes ya ipaway to ra kawes, insan to ra iter ed saray manangigalang.

²³ Kayari to ya, kaiba nen Jehu a linmoob ed timplo si Jonadab a lakin anak nen Recab, insan kuantod saray totoo, “Apiapiger yo a saray manangigalang ed Baal labat iray wadya; anggapo komuy akaloob ya anggan sakey a manangigalang ed Katawan.”

²⁴ Insan linmoob iran dua nen Jonadab ya angisaklang tan amool na saray bagat ed Baal. Balet impanbantay tod paway na timplo iray walomplon lalaki tan kuantod sikara, “Patey yo ra yan amin a totoo; siopaman ed sikayoy makapabatik, bilay toy ibayar to!”

²⁵ Kayariy impangibagat nen Jehu, inkuantod saramay guardia tan saramay opisyal, “Loob ki la, ta patey yo ran amin; ag kayo mamapabatik na anggan sakey!” Linmoob iran sankabembenan day ispada, pinatey da ran amin, insan da inggagayugoy ed paway iray bangkay. Linma rad sankadaleman na timplo,

²⁶ inala ran impaway so masanton lusek a wadman, insan da pinoolan.

²⁷ Dineral da sirin so masanton lusek tan say timplo, insan da ginawan kasilyas—a wadman ni ya anggad natan.

²⁸ Onya so impamatonda nen Jehu ed panangigalang ed Baal diad Israel.

²⁹ Balet inalig toy kasalanan nen Ari Jeroboam ya angilagyat ed saray Israelita a nankasalanan diad impangigalang dad saray balituk a bakan kalakyan ya impasen to rad Betel tan diad Dan.

³⁰ Inkuan na Katawan ed kinen Jehu, “Ginawam ed saray kabyangay boleg nen Acab iray bengatlan labay kon nagawa. Kanyan isipan kod sika a manarid Israel iray kabyangay boleg mo ya anggad kumapat a kailalakan.”

³¹ Balet aliwan masimoon so impangonur nen Jehu ed saray ganggan na Katawan, say Dios na Israel; inalig to ingen si Jeroboam ya angilagyat a nankasalanan so Israel.

Say Impatey nen Jehu

³² Diad sayan panaon pinamelag na Katawan so dalin a nasasakopan na Israel. Adakep nen Ari Hazael na Siria iray amin a dalin a sakop na Israel

³³ diad bokig na Jordan, ya anggad mampaarap ed abalaten diad baley na Aroer ya abay na Ilog na Arnon—pati dalin na Galaad tan Basan a panaayaman na saray kabyangay tribu di Gad, Ruben, tan Bokig a Manases.

³⁴ Nisulat ed libron Say Awaran da ray Ararid Israel iray arum nin ginagawa nen Jehu a pati saray impanatalo tod bakal.

³⁵ Inatey, nipompon ed Samaria, insan sinmalat ed sikaton nanari si Joacaz a lakin anak to.

³⁶ Nanayam ed Samaria si Jehu legan ton nanari ed Israel na duamplo tan waloy taon.