2 Samuel 7 - Maung A Balita Biblia

Say Balita nen Natan ed kinen David

¹ Manaayam la natan si Ari David ed palasio to, tan inyagel na Katawan ed amin da ray kalaban to.

² Insan inkuan na ari ed kinen propita Natan, “Wadya ak a manaayam ed abung a sidro, balet say Kaban na Sipanan na Dios et akasinup labat ed dalem na sakey a tulda!”

³ Inmebat si Natan, “Gawam labat so antokaman a walad kanunotan mo, ta walad sika so Katawan.”

⁴ Balet diad saman a labi inkuan na Katawan ed kinen Natan.

⁵ “Laka, ta ibagam ed aripen kon David a kuankod sikato, ‘Aliwan sikay mamaalagey na timplon panayaman ko.

⁶ Nanlapu lad impangipaway kod saray totood Israel ed Egipto ya anggad natan, ag ak balut nanayam ed dalem na timplo; diad dalem na tulday nanaayaman ko tan nanaakar-akar ak.

⁷ Diad impipilak ed saray totood Israel ag kon balut tinepet ed siopaman a pinilik a panguloy Israel no akin et ag to ak impaalageyan na timplo a sidro.’

⁸ “Kanyan ibagam ed aripen kon David a siak, say Katawan a Makapanyarin-amin, kuankod sikato, ‘Inekal ta kad panagpastol moy karniro ed kaalogan, insan ta ka ginawan manoley ed saray totook ya Israel.

⁹ Kaiba ta ka ed anggan iner a nilam, tan tinalok iray kalaban mo diad indogpam. Gawaen ta kan matalonggaring a singa saray sankatalonggaringan a pangulod intiron mundo.

^10-11 Amili ak na sakey a pasen a para saray totook ya Israel tan impanayam ko rad man ya ag la ra nasigensigen. Nanlapu lad inloob dad sayan dalin, dinodogpaan ira na maruksan totoo, balet ag la ya nagawad sikara. Isipan kon iyagel ta kad saray kalaban mo, tan parakelen ko ray kabyangay boleg mo.

¹² No ompatey ka tan nipompon kad kawalaan da ray lalakim, gawaen kon ari so sakey ed saray anak mo tan pabiskegen koy nanarian to.

¹³ Sikatoy mamaalagey na sakey a timplon para siak, tan pansiansiaen ko ya anggad angga so nanarian to.

¹⁴ Siak so ama to tan sikatoy magmaliw ya anak ko. No manggaway maoges, dusaen kon singa panusay ama ed anak to.

¹⁵ Balet ag ko ekalen so ag mangoman a panangarok ed sikato, aliwan singa ginawak ed kinen Saul.

¹⁶ Nawalaan ka lawas na saray kabyangay boleg mo, tan pansiansiaen ko ya anggad angga so nanarian mo.’”

¹⁷ Imbaga nen Natan ed kinen David iray amin ya impaamtay Dios ed sikato.

Say Pisasalamat nen David

¹⁸ Si Ari David linmoob ed Tuldan Ayamay Katawan, inmirung tan nampikasi, “Aliwak a manepeg, anggan say pamilyak, et antokaman a ginagawam lad siak, Katawan a Dios.

¹⁹ Balet natan, lalon dakel so gagawaen mo, Katawan a Dios; nansipan kay nipaakar ed saray kabyangay pamilyak diad arapen a panaon. Inyabuloy mon naamtaan ya na too, Katawan a Dios!

²⁰ Anto niy nayarian kon ibagad sika? Kabkabat mo ak, say aripen mo.

²¹ Linawam tan getmam a gawaen ya; ginawam ira yan amin a bengatla pian nibangat mo ak.

²² Agaylay inkatalonggaring mo, Sankatageyan a Katawan! Anggapoy miparad sika; amta mi lawas a bukbukor mo so Dios.

²³ Anggapoy arum a bansa diad tapew na dalin a miparad Israel. Inyagel mod inkaaripen iray Israelita tan ginawam ira a totoom. Diad panamegley na saray ankabaleg tan makapakelaw a ginagawam para sikara, kinmayat ed intiron mundo so dayew mo. Pinataynan mo ray taga arum a bansa tan saray diriyos da legan a mankukurang iray totoom, saray totoon impaway mod Egipto pian nakayaryan mo ra.

²⁴ Ginawam ya andi-anggaan a totoom so Israel tan sika, Katawan, so nagmaliw a Dios da.

²⁵ “Katawan a Dios, sumpal mo pad amin a panaon so insipan mo nipaakar ed siak tan saray kabyangay boleg ko, tan gawam pay onung na sinalitam.

²⁶ Nitanduro ka tan lawas ikuan na saray totoo, ‘Say Katawan a Makapanyarin-amin so Dios ed intiron Israel.’ Pansiansiaen moy nanarian ko,

²⁷ O Katawan a Makapanyarin-amin a Dios na Israel! Matalek kon ipikasi yad sika, ta impuyan mo yan amin ed siak ya aripen mo, tan imbagam ed siak a gawaen mon arari iray kabyangay boleg ko.

²⁸ “Katawan a Dios, sika so Dios; susumpalen mo lawas iray sipan mo, et insipan mod siak yan maung a bengatla.

²⁹ Kerewen kod sikan bindisionan mo ray kabyangay boleg ko, tan pansiansiam yan bindision ed sikara. Sika, Katawan a Dios, so angisipan ed saya; mansiansian ando lan ando ed saray kabyangay boleg mo so bindision mo.”