2 Samuel 20 - Maung A Balita Biblia

Linmaban si Seba

¹ Nibanan wadman ed Gilgal so sakey a toon andi-kakanaan a si Seba a lakin anak nen Bicri, tan kabyangan na tribu nen Benjamin. Pinaknul toy trumpita tan ineyag to, “Anggapoy pibabali mid kinen David ya anak nen Jesse. Ag kami ontombuk ed sikato! Lalakin taga Israel, onsempet ti la!”

² Kanyan tinaynan na saray Israelita si David tan akila rad kinen Seba, balet nansiansian matoor ed kinen David iray lalakin taga Juda, kanyan inolup da manlapud Jordan ya anggad Jerusalem.

³ Kasabi nen David ed palasio tod Jerusalem, inala to ra may samploran iyaamung ton bibii ya intilak to ran manasikasoy palasio, insan to ra impabantayan. Initdan to ray pambilay da, balet ag to la ran balut inakdulan. Apokuk ira legan na impanbilay da; nambilay iran singa saray balo.

⁴ Inkuan na ari ed kinen Amasa, “Pantitipon mo ray amin a lalakin taga Juda, insan nabwas a sakey pawil ka dia a kaibam ira.”

⁵ Linman mantipon ed sikara, balet ag pinmawil ed samay agew ya imbaga na ari.

⁶ Kanyan inkuan na ari ed kinen Abisai, “Mapalalo nin gunigon so iter nen Seba nen si Absalom. Alam iray totook ta osilan yo, ta no andi onloob ed pigaran baley ya aliber na padir insan to tayo la ibatikan.”

⁷ Kanyan saray totoo nen Joab, saray bantay na ari, tan amin iray arum a sondalo tinaynan day Jerusalem a kaiba ray Abisai, ta osilan day Seba.

⁸ Kasabi rad baleg a bato diad Gabaon, inabet ira nen Amasa. Akakawes na para bakal si Joab, tan akasalukbit ed balkes to so ispada ton walad kaluban. Diad inkurang to, pinmaway so ispada tan apattak.

⁹ Inkuanen Joab ed kinen Amasa, “Antoy bilay, kaaro?” insan to binembenan ed kawanan a lima to so balbas nen Amasa, ta anguban to.

¹⁰ Balet ag naimano nen Amasa so ispadan sankabembenan nen Joab ed sakey a lima to. Indoyuk nen Joab so ispada ed eges nen Amasa et abuyak ed dalin so pait to. Inatey a tampol, kanyan ag la pinidua nen Joab. Insan intuloy nen Joab tan si Abisai ya agi to so onosil ed kinen Seba.

¹¹ Nanalagey ed abay na bangkay nen Amasa so sakey ed saray totoo nen Joab tan ineyag to, “Siopamay migampid kinen Joab tan si David, ontombuk ed kinen Joab!”

¹² Walad pegley na dalan so bangkay nen Amasa a napnoy dala. Nen anengneng na samay too nen Joab ya ontotonday balang sakey, ginayugoy tod alog imay bangkay, insan to sinakbungan na oles.

¹³ Nen nakal lad dalan imay bangkay, tinmombuk so balang sakey ed kinen Joab diad iyosil tod kinen Seba ya anak nen Bicri.

¹⁴ Dinmalan si Seba ed saray pasen a kawalaan da ray amin a tribu na Israel, insan linma ed siudad na Abel-bet-maaca. Nantitipon iray amin a kabyangay boleg nen Bicri, insan da tinombuk ed siudad si Seba.

¹⁵ Nadngelan na saray totoo nen Joab a wadmay Seba, kanyan linma ra tan niliktub da may siudad. Nambonton iray dalin ed paway na padir tan ginapwan dan kotkotan so silong na padir, pian natumba.

¹⁶ Dimad dalem na siudad walay sakey a biin masilib; manlapud padir inmeyag, “Dengel kayo! Dengel kayo! Ibaga yod kinen Joab ya onasingger dia, ta labay koy mitongtong ed sikato.”

¹⁷ Linmay Joab, tan tinepet to may bii, “Sika si Joab?” “On,” ebat to. “Dengel mo ak,” inkuanto may bii. “Onderengel ak,” ebat nen Joab.

¹⁸ Inkuanto may bii, “Nen saman a panaon inkukuanda, ‘Laka yon mangipanon ed Abel et naebatan kayo’—et onyay ginagawa ra.

¹⁹ Sakey a manonan siudad so kawalaan mi, sakey ed saray sankareenan tan sankatooran a siudad ed Israel. Akin et labay mon deralen? Labay mo ta a bagbagen so kayaryan na Katawan?”

²⁰ “Andin balut!” ebat nen Joab. “Ag kon balut deralen o bagbagen so siudad yo!

²¹ Aliwan sikatoy getma mi. Walad tay sakey a lakin manngaray Seba ya anak nen Bicri tan taga nipokdul a pasen na Efraim; inggapo toy milaban ed Ari David. Ipalimam ed siak yan laki, et taynan ko lay siudad.” “Ibontuk mid tad biek na padir so olo to,” kuanto may bii.

²² Linmad saray totoo ed siudad tan tinanggoyur to ra, kanyan pinotut day olo nen Seba, insan da imbontuk ed kinen Joab diad biek na padir. Pinaknul toy trumpita a pamataynan tod saray totoo to, kanyan manlapud siudad sinmempet la ra. Pinmawil ed Jerusalem si Joab, insan linmad ari.

Saray Opisyal nen David

²³ Si Joab so pangulo na saray sondalod Israel; si Benaya a lakin anak nen Joiada so pangulo da ray bantay na ari;

²⁴ si Adoram so makaoley ed impasoot a kimey; si Josafat a lakin anak nen Ahilud so makaoley ed saray nepeg ya isulat;

²⁵ si Siva so sikritario na korti; di Sadoc tan Abiatar iray papari,

²⁶ tan si Ira a taga baley na Jair et sakey met ed saray papari nen David.