2 Samuel 18 - Maung A Balita Biblia

Atalo tan Apatey si Absalom

¹ Impantitipon nen David iray amin a totoo to, insan ginawa to ran pigaran grupo, na tonggal libo tan tonggal lasus, tan wala ray opisyal ya impasen ton mangipangulod balang grupo.

² Imbaki to ran taloran grupo; si Joab so panguloy sakey, si Abisai ya agi to so panguloy sakey, tan si Itai a taga Gat so panguloy sakey met. Inkuan na ari ed saray totoo to, “Mila ak ed sikayo.”

³ “Ag ka nepeg a milad sikami,” ebat da. “Anggapoy walad saray kalaban no bilang ombatik kamin amin, odino anggan napatey so kapalduad sikami; balet aliling moy samplon libo ed sikami. Kanyan magmaung ni no natilak ka diad siudad tan ipawit mo lay tulong ed sikami.”

⁴ Inmebat so ari, “Gawaen koy isisipen yo a sankaabigan.” Insan nanalagey ed abay na puirta, legan ya ompapaway iray totoo to a nanoolup ya asanlibo tan asanlasus.

⁵ Ingganggan tod kindi Joab, Abisai, tan Itai, “Makasengeg ed siak ag yo papasakitan so malangwer a lakin si Absalom.” Nadngel na amin a sondalo so impangibaga nen David ed sayan ganggan.

⁶ Linmad kaalogan iray sondalo nen David tan nilabanan dad Takel na Efraim iray Israelita.

⁷ Tinalo na saray totoo nen David iray Israelita; diad ontan lan inkatalo ra duamplon libod sikara so inatey ed saman ya agew.

⁸ Kinmayat so bakal ed intiron kaalogan, et dakel niy inatey ed dalem na takel nen say inatey ed bakalan.

⁹ Kabebekta nabet nen Absalom iray pigaran totoo nen David. Akakabayod sakey a mula si Absalom tan diad insilong tod sakey a baleg a kiew a robli, asagur ed saray sanga so olo to. Tuloy so batik na samay mula, kanyan atilak a mambitbitay si Absalom.

¹⁰ Anengneng na sakey ed saray totoo nen David, kanyan imbalita tod kinen Joab, “Anengneng koy Absalom a mambitbitay ed sakey a kiew a robli!”

¹¹ Inmebat si Joab, “No anengneng mo, akin et ag mo lan tampol pinatey diman? Anggan siak maliket ak komun a mangiter ed sikay samploran pilak tan sakey a balkes.”

¹² Balet inmebat imay too, “Anggan initdan yo ak na sanlibon pilak, ag ko diwiten so anak na ari. Nadngel min amin so ganggan na ari ed sika, si Abisai tan si Itai, ‘Makasengeg ed siak, ag yo papasakitan so malangwer a lakin si Absalom.’

¹³ No ag ko inonur so ganggan na ari et pinatey koy Absalom, andiduaruwan nadngelan na ari, ta narerengelan ton amin. Iyagel mo ak ed satan kasi?”

¹⁴ “Ag ko la darakey panaon kod sika,” kuanen Joab. Angalay taloran pika, insan to ra impika ed pagew nen Absalom, nen mabilay nin mambitbitay ed tagey na kiew a robli.

¹⁵ Insan samploran sondalo nen Joab so inmasingger tan nilaos dan pinatey.

¹⁶ Impapaknul nen Joab so trumpita a pamatonda to lad bakal, kanyan tinondaan la na saray sondalo so onosil ed saray Israelita tan amawil la ra.

¹⁷ Inala ray bangkay nen Absalom, impelag dad aralem a bobun ed takel, insan da tinabunan na saray bato. Amin ya Israelita batik ed kaabungan da.

¹⁸ Legan na impanbilay nen Absalom angipaalagey na monuminto to diad Patar na Ari, ta anggapoy anak ton laki a mangituloy na ngaran to. Ngaran ton dili so inngaran tod samay monuminto, et anggad sayan agew tatawagen na Monuminto nen Absalom.

Nibalitad kinen David so Impatey nen Absalom

¹⁹ Insan inkuanen Ahimaaz ya anak nen Sadoc ed kinen Joab, “Iyabuloy mo pan ombatik ak ed ari, ta ibagak ed sikatoy maung a balita ya inyagel na Katawan ed saray kalaban to.”

²⁰ Inkuanen Joab, “Andi! Ag mo iyaakar natan so maung a balita. Dia lad arum ya agew so pangyakar mo, aliwan natan, ta inatey so anak na ari.”

²¹ Insan to inkuan ed aripen ton Cusita, “Laka, ta ibagam ed ari so anengneng mo.” Dinmakmomo may aripen, insan la batik.

²² Inkuan lamet nen Ahimaaz, “Anggan antoy nagawa, ipangasim ya ibagak met so balita.” “Akin et labay mo tan a gawaen, anak ko, anta anggapo met lamlamang so tumang a nagamuran mo?” tepet nen Joab.

²³ Inkuan lamet nen Ahimaaz, “Anggan antoy nagawa, labay koy onla.” “Laka sirin,” inkuanen Joab. Batik tan dinmalan ed Patar na Jordan, insan to alabsanan imay aripen a Cusita.

²⁴ Manyodyorung si David ed nanleetan na puirtan walad paway tan say puirtan walad dalem na siudad. Kinmalab ed padir so bantay, insan tinmoon ed toktok na puirta; ninmengneng et abantag toy toon mambabatik a bukbukor.

²⁵ Tinmawag ed ari tan imbaga toy abantag to, et say ari kuanto, “No bukbukor to, maung a balitay awit to.” Manasingger imay mambabatik.

²⁶ Insan akanengneng lamet imay bantay na sakey a toon mambabatik a bukbukor. Inkulyaot tod bantay na puirta, “Nengneng mo! Wala niy sakey a toon mambabatik!” Inmebat so ari, “Maung met a balita so awit to tan.”

²⁷ Inkuan na bantay, “Nanenengneng kon say onaan et singa kababatik nen Ahimaaz.” Inkuan na ari, “Maung a too, kanyan sankaawit toy maung a balita.”

²⁸ Insan inkulyaot nen Ahimaaz ed ari, “Maung ya amin so agawa.” Tinmiblak ed dalin ed arap na ari, tan kuanto, “Nagalang komun so Katawan a Dios mo ya angiter ed sika na pananalo ed saray totoon sinmumpa ed sika, Kagalang kon Ari!”

²⁹ “Maung so kipapasen na malangwer a lakin si Absalom?” tepet na ari. Inmebat si Ahimaaz, “Nen imbaki to ak nen opisyal mon Joab, anengneng koy sakey a baleg ya aligewgewan, balet ag ko nibaga no anto man.”

³⁰ “Lakad man tan manalagey ka,” inkuan na ari ed sikato; kanyan linma tan nanalagey diman.

³¹ Insan sinmabi may aripen a Cusita tan kuantod ari, “Walay maung ya ibalitak ed sika, Kagalang kon Ari! Natad sayan agew initdan kay Katawan na pananalo ed amin da ray sinmumpad sika!”

³² “Maung so kipapasen na malangwer a lakin si Absalom?” tepet na ari. Inmebat imay aripen, “Maung komun a say agawad sikato et nagawa met ed amin da ray kalaban mo, tan amin ya onsumpad sika.”

³³ Agaylay ermen na ari. Linmad kuarton walad tagey na puirta. Legan ton oonla, manakakis tan kuanto, “O anak ko! Anak kon Absalom, anak ko! Siak la komuy inatey, aliwan sika, O anak ko! Absalom, anak ko!”