2 Samuel 12 - Maung A Balita Biblia

Say Imbaga nen Natan tan say Impagbabawi nen David

¹ Imbaki na Katawan si propita Natan ed kinen David. Linmay Natan ed sikato tan kuanto, “Walay duaran laki a manaayam ed saksakey a baley; mayaman so sakey tan mairap-bilay so sakey.

² Samay mayaman amayamay so baka tan karniro to.

³ Samay mairap-bilay saksakey so kordiro to, a sinaliw to. Inasikaso to, tan binmaleg a kaiba na saray anak to. Initdan toy dilin kakanen to, pinapinom tod dilin kupa to, tan inakakwal to. Singa to dilin anak a bii.

⁴ Aminsan ya agew walay sinmabin sangkaili na samay mayaman a laki. Ag labay na samay lakin mayaman so mamatas na dilin ayep to a panagkaili to; ingen, inala to may kordiro na samay mairap-bilay tan sikatoy impanangkaili to.”

⁵ Pinmetang a maung so olo nen David ed samay mayaman a too. Inkuanto, “Isipan kod mabilay a Katawan a nepeg ya ompatey iman a nanggawad saya!

⁶ Nepeg ton bayaran na mamipat a karakel so inala to, lapud sayan andi-panangasin ginawa to.”

⁷ “Sika man a too,” inkuanen Natan ed kinen David. “Onyay kuan na Katawan a Dios na Israel: ‘Ginawa ta kan ari na Israel tan inyagel ta kad kinen Saul.

⁸ Inter kod sikay nanarian to tan saray asawa to; ginawa ta kan ari na Israel tan Juda. No kinmulang ni ya, initdan ta ka ni komun na singa karakel na inter ko lad sika.

⁹ Akin sirin et ag mo inonur iray ganggan ko? Akin et ginawam yan kaogsan? Impapatey mod bakal si Urias; inabuloyan mon pinatey na saray Ammonita, insan mo inasaway asawa to!

¹⁰ Natan sirin diad balang kailalakan, pigaran kabyangay boleg mo so napatey diad panamegley na ispada, lapud ag mo ak inonur tan inasawam so asawa nen Urias.

¹¹ Tandaan mo, dagdagen ko a manngunigon ed sika so sakey a kabyangay pamilyam. Naimatunan mo ya, no alaen ko ray asawam insan ko ra iter ed sakey a laki; akdulan to ra ya anggan agew.

¹² Maamut so impankasalanan mo, balet abuloyan ko yan nagawa ed agew, pian naimatunan na intiron Israel!’”

¹³ “Nankasalanan ak ed Katawan,” kuanen David ed kinen Natan. Inmebat si Natan, “Pinirdona ka na Katawan; ag ka ompatey.

¹⁴ Balet lapud sinumpam so Katawan diad impanggawam ed sayan kaogsan; ompatey so anak mo.”

¹⁵ Insan sinmempet lay Natan. Impaninagem na Katawan so ogaw ya anak nen David ed asawa nen Urias.

Inatey so Lakin Anak nen David

¹⁶ Nampikasiy David a paabigen na Dios komun imay ogaw. Ag mangan si David; labi-labin onloob ed kuarto to tan mandokul ed datal.

¹⁷ Laen na saray opisyal na palasio a bangonen, balet ag to, tan ag mangan a kaiba to ra.

¹⁸ Kalabas na sakey simba, inatey so ogaw; antakot iray opisyal nen David a mangibalitad sikato. Inkuanda, “Nen mabilay ni may ogaw, ag itayo inebatan nen David nen akitongtong itayod sikato. Panoy pangibaga tayod sikaton inatey so anak to? Ompan manggaway maoges ed sikaton dili?”

¹⁹ Nen naimano nen David a maneesaesan ira, atalusan ton inatey lay ogaw. Kanyan tinepet tod sikara, “Inatey lay ogaw?” “On, inatey la,” ebat da.

²⁰ Binmangon ed datal si David, nanames, nansagaysay, tan nampales. Insan linman angigalang ed abung na Katawan. Nen pinmawil ed palasio, kinmerew na nakan, tan kapangisaklang da, angan.

²¹ “Ag mi ya natalusan,” kuan na saray opisyal to ed sikato. “Nen mabilay ni may ogaw, ineerman mo tan ag ka mangan; balet kapatey to, binmangon ka tan angan ka!”

²² “On,” ebat nen David. “Nanayuno tan nanermen ak legan a mabilay ni. Abaloan kon kasian ak na Katawan tan ag to abuloyan ya ompatey so ogaw.

²³ Balet natan ta inatey la, akin et manayuno ak? Napabilay ko ta ni? Onsabiy agew ya onla ak ed pasen a kawalaan to, balet ag to lan balut makapawil ed siak.”

Nianak si Solomon

²⁴ Niligliwa nen David si asawa ton Bat-seba tan inakdulan to. Nananak na sakey a laki si Bat-seba. Solomon so inngaran nen David ed ogaw. Inaro na Katawan so ogaw,

²⁵ tan ingganggan toy Natan a ngaranan toy ogaw na Jedidia, ta inaro na Katawan.

Adakep nen David so Rabba

²⁶ Intuloy nen Joab so impibakal tod Rabba, say manonan siudad na Ammon. Nen ngalngali to la nadakep,

²⁷ angibaki na saray totoon mangibalitad kinen David: “Dinogpaan koy Rabba tan nalak lay dipositoy danum na siudad.

²⁸ Tipon mo ray arum a sondalom, dogpaan yoy siudad tan sikan diliy manakep. Ag ko labay a siak so napagalangan ed pakadakep ed siudad.”

²⁹ Kanyan tinipon nen David iray sondalo to, linmad Rabba, dinogpaan to tan adakep to.

³⁰ Say talintaoy dios na saray Ammonita a si Milcom et walay balituk a korona to a mambelat na sakey a talomplo tan apat a kilo, walay mablin bato ed samay korona. Inala nen David imay bato, insan to inyan ed korona to. Amayamay met ni ray nala ton bengatla ed siudad,

³¹ tan impankikimey to ray totood man diad panamegley na saray ligari, buka, balatyang, tan wasay a balatyang. Pinapasoot to ran impanggagaway ankakabaleg a laryo. Onya met so ginagawa tod saray totood arum a baley na Ammon. Insan pinmawil ed Jerusalem a kaiba to ray totoo to.