2 Samuel 1 - Maung A Balita Biblia

Akabatan nen David so Impatey nen Saul

¹ Kayariy impatey nen Saul, amawil si David kasumpal ton tinalo ray Amalecita tan nanayam ed Siclag na duay agew.

² Diad mikatlon agew sinmabiy sakey a balolakin nanlapud kampo nen Saul. Diad pangipanengneng toy ermen to pinipilat toy kawes to tan ininan toy dabuk so olo to. Linmad kinen David tan dinmakmomo ya anggad dalin a pamagalang to.

³ Tinepet nen David, “Nanlapwan mo?” “Akabatik ak manlapud kampo na Israel,” ebat to.

⁴ “Ibagam ed siak no antoy agawa,” kuanen David. “Imbatikan day bakal iray sondalo tayo,” ebat to, “tan amayamay so inatey ed saray totoo tayo. Inatey met si Saul tan si Jonatan ya anak to.”

⁵ “Panoy pakaamtam ya inatey si Saul tan si Jonatan?” tepet nen David.

⁶ Inmebat, “Nibanan wala ak ed palandey na Gilboa, tan anengneng koy Saul ya akasaral ed pika to, tan manasingger ed sikato ray karwahi tan saray akakabayon kalaban.

⁷ Linmingaw tan anengneng to ak, insan to ak tinawag. Inmebat ak, ‘Wadya ak,’

⁸ Tinepet to no siopa ak, et imbagak ed sikaton sakey ak ya Amalecita.

⁹ Insan inkuanto, ‘Gala dia ta patey mo ak! Mapalaloy inkasugat ko tan ompapatey ak la.’

¹⁰ Kanyan dinagok tan pinatey ko, ta amtak ya ompatey met lamlamang diad katumba to. Insan ko inalay koronad olo to tan say pulsira ed taklay to tan inawit ko diad sika, katawan ko.”

¹¹ Diad ermen nen David pinilat toy kawes to, tan onya met so ginawa na saray totoo to.

¹² Nanermen tan nanakis ira, tan nanayuno ra ya anggad labi para si Saul tan si Jonatan, tan para saray Israelita a totoo na Katawan, ta amayamay ed sikaray inatey ed bakal.

¹³ Tinepet nen David ed samay balolakin angibalita, “Taga ka iner?” Inmebat, “Sakey ak ya Amalecita, balet manaayam ak ed bansam.”

¹⁴ Tinepet nen David ed sikato, “Akin et atepelan mon pinatey so lakin pinili na Katawan a manari?”

¹⁵ Insan to tinawag so sakey ed saray totoo to tan kuanto, “Patey mo!” Kinabil to tan pinatey to may Amalecita.

¹⁶ Insan inkuanen David ed samay Amalecita, “Sikan diliy amasabid laman mo na sayan agawad sika. Sinintinsiaan moy dusa so sikan dili diad impangibagam a pinatey moy lakin pinili na Katawan a manari.”

Say Impanermen nen David ed kindi Saul tan Jonatan

¹⁷ Kinanta nen David yan kantay ermen para kinen Saul tan si anak ton Jonatan,

¹⁸ tan ingganggan ton ibangat ed saray totood Juda. (Nisulat ya ed Libro nen Jaser.)

¹⁹ “Diad saray pokdul na Israel inatey iray pangulo tayo! Atumba iray sankasebegan a sondalo tayo!

²⁰ Ag yo ya ibabalita ed Gat odino diad saray dalan na Askelon. Ag yo panliliketen iray bibiin taga Filistia; ag yo panggagayagaen iray bibiin anak na saray pagano.

²¹ “Anggapo komuy ompelag ya oran o linaew ed saray pokdul na Gilboa; anggapo lawas komun so antokaman ya ontobo ed saray alog to. Ta saray samper na masesebeg kitongilang irad man a nakalay kagalangan; say samper nen Saul wadman ya ag la nalalarakan.

²² Nen saman makapatey so pana nen Jonatan, andi-panangasiy ispada nen Saul; saray nakena ran makapanyari natumba ra, tan saray nakena ran kalaban ompatey ira.

²³ “Saul tan Jonatan, pinabli tan inararo; sankaibad bilay, sankaibad patey. Maples ira nen saray agila, mabiskeg ira nen saray lion.

²⁴ “Bibiid Israel, panermenan yoy Saul! Kinawesan to kayo ray balibalin ambalangan kawes, tan pineketan to ray kawes yo na alahas iran balituk.

²⁵ “Atumba ray masesebeg a sondalo, inatey irad bakal. Wadman ya inatey ed kapokdulan si Jonatan.

²⁶ “Panermenan ta ka, agik a Jonatan; pinabpabli ta ka! Makapakelaw so panangarom ed siak, pinalabsanan toy anggan say panangaro na saray bibii.

²⁷ “Atumba la ray masesebeg a sondalo, andi-kana la ray armas da.”