2 CORINTO 2 - Maung A Balita Biblia

¹ Ninunot ko lan ag ak onlad tan lamet a mamaermen ed sikayo.

² Ta no paermenen ta kayo, siopa niy mamaliket ed siak? Sikayo met ni lamlamang a pinaermen ko!

³ Kanyan sinulat ta ki ni, ta ag la pigan napaermen ak na saray totoon nepeg a mamaliket ed siak. Ta manisia ak a say liket ko liket yo met ya amin.

⁴ Baleg so pagak tan ermen ko nen sinulat ta kayo. Managagos so luak nen gagawaen ko man a sulat. Sinulat ta kayo ya aliwan say pamaermen kod sikayo, no ag say pangipaaamtak no panoy kabaleg na panangarok ed sikayo.

Say Pamirdonad Nankasalanan

⁵ No walad sikayoy amaermen na siopaman, aliwan siak so pinaermen to no ag sikayo, o nayarin pigarad sikayo, ta ag ko labay a mapeget ak a maung ed sikato.

⁶ Balet duga la tay impanusa na karaklan ed sikayo ed satan a too.

⁷ Pirdona yo la laingen tan ligliwa yo, ta ag la pigan ompalaloy ermen to, et naekal so intiron ilalo to.

⁸ Kerewen ko sirin ya ipaamta yod sikato a tuan inaro yo.

⁹ Say sakey nin makasengeg no akin et sinulat ta kayo, say panubok kod sikayo tan say pangamtak no oonuren yo ray amin a bangabangat ko.

¹⁰ Siopamay toon pinirdona yo, pinirdonak met la. Say pinirdonak, no wala bilang, pinirdonak makasengeg ed sikayo, diad arap nen Cristo,

¹¹ pian ag itayo taloen nen Satanas; ta amta ti la ray getma to.

Mapagay Pablo nen walad Troas

¹² Nen linma ak ed Troas a mampulong na Maung a Balitan nipaakar ed Cristo, say Katawan initdan to ak na marakep a pankanawnawan mankimey diman.

¹³ Balet mapaga ak, ta ag ko naalmod may agi tayon Tito. Kanyan nampatanir ak la, tan tinmuloy ak ed Macedonia.

Say Pananalo diad Panamegley nen Cristo

¹⁴ Balet salamat ed Dios, ta lawas to kamin pipilaen ed paraday pananalo nen Cristo, lapud pikakasakey mid sikato. Tan diad panamegley mi, ikakayat na Dios ed amin a pasen so pikakabat nipaakar ed Cristo, a singa ikakayat na balingit.

¹⁵ Ta singa kami mansamyong a pabalingit ya isasaklang nen Cristo ed Dios, tan nasosongap na saray nilalaban tan saray nababalang.

¹⁶ Sayan balingit samal ed saray nababalang, balet ambalingit tan mangiiter na bilay ed saray nilalaban. Siopay makagawad sayan kimey?

¹⁷ Aliwa kamin singa saray amayamay a totoon panninigosioan day salitay Dios. Ingen, lapud imbaki kamiy Dios tan aripen kami nen Cristo, matoor kamin mansalita diad arap na Dios.