2 CORINTO 12 - Maung A Balita Biblia

Saray Nipayawar tan saray Nipuyan ed kinen Pablo

¹ Nakaukolan a mampasirayew ak, anggaman ya anggapo lamlamang so iter to yan kamaungan. Balet say salitaen ko natan et nipaakar ed saray impayawar tan saray impaamta ed siak na Katawan.

² Walay kabat kon sakey a Cristiano a niakar ed kumatlon tawen; labinapat lan taon so apalabas. (Ag ko amta no silalaman odino andi; say Dios so makaamta.)

³ Oliten ko, amtak a niakar yan too ed Paraiso. (Oliten ko, ag ko amta no silalaman odino andi; say Dios so makaamta.)

⁴ Akadngel diman na saray bengatlan ag nayarin iritratoy salita tan bitlaey siopaman.

⁵ Ipasirayew ko yan too, balet ag ko nipasirayew so siak a dili likud labat ed saray kakapoyan ko.

⁶ No siak so mampasirayew ag ak ompaway a makulang-kulang, ta katwaay salitaen ko. Balet ag ak mampasirayew, ta ag ko labay ya atagtagey so pangipasey totoo ed siak nen say nanenengneng dan gagawaen ko tan narerengel dan sasalitaen ko.

⁷ Balet pian ag ak lalon mampaatagey lapud saray impuyan ed siak na Dios a makapakelaw iran bengatla, naitdan ak na sakit a liliknaey laman ko, a pinagkalewet nen Satanas a pamairap tod siak, pian ag ak magmaliw a mapaatagey.

⁸ Amitlok ya impikasid Katawan ya ekalen to yan sakit,

⁹ balet onyay ebat to: “Say baleg a panangarok labat so nakaukolan mo, ta say pakayarik et sankabiskegan ya ontulong no makapoy ka.” Malikeliket ak sirin a mangipasirayew ed saray kakapoyan ko, pian naliknak so panangyagel ed siak na pakayari nen Cristo.

¹⁰ Kanyan no say makasengeg et si Cristo andi balin makapoy ak, napabaingan, napaermen, napasegsegang, tan napairap ak. Ta no kapigan a makapoy ak, diman ak mabiskeg.

Say Panagabagey nen Pablo ed saray taga Corinto

¹¹ Nagmaliw ak a singa makulang-kulang, balet sikayoy amasoot ed siak ya onyay gawaen ko. Sikayoy manepeg ya ononan mangidayew ed siak. Ta anggaman ya anggapoy kakanaan ko, ag ak natilak ed saratan a mamaung ya “apostol”.

¹² Inanosan kon pinaneknekan ed sikayo, diad panamegley na saray tanda, pakelaw, tan milagro, a petepeteg ak ya apostol.

¹³ Anto ta so ataloan yod arum ya iglisia? Anggapo, likud labat ed ag ko inkerew na tulong ed sikayo. Itepel yo ak ed saman a kakulangan ko!

¹⁴ Kumatlo la yan akaparaan ak ya onlad tan, balet ag ak mialay antokaman ed sikayo. Sikayoy nakaukolan ko, aliwan saray kuarta yo. Saray atateng so manlegpet ed saray anak da, aliwan saray anak so manlegpet ed saray atateng da.

¹⁵ Maliket ak a mangiter na amin a kayaryan ko, anggan say bilay ko, no onkanad pankaabigan yo. Melag labat so pangaro yod siak, anta inararo ta kayo?

¹⁶ Amta yon ag ak akapabelat ed sikayo. Balet ibabagay arum a masilib ak tan sasaolen ta kayo.

¹⁷ Akin, inanamut ko tay kaabigan yo diad panamegley na anggan siopan imbakik ditan?

¹⁸ Kinerew kod kinen Tito ya onlad tan a kaiba to may sakey ya agi. Inanamut ta nen Tito so kaabigan yo? Ag ta namparay prinsipio na panagbilay tan kagagawa mi?

¹⁹ Abaloan yo lagi, nanlapud gapo ya anggad natan, iyaagel miy sikamin dili ed arap yo. Andi! Mansasalita kami diad arap na Dios onung ed labay nen Cristo. Amin a gagawaen mi, inararon agagi, et pankaabigan yo.

²⁰ Mapaga ak, ta ag la pigan no onla ak ditan, et narumog kon nidoma kayod labay kon kipapasen yo tan nidoma ak ed labay yon kipapasen ko. Ompano narumog kon walay pankokolkolan, paniimonan, pampepetangay olo, pansisibletan, pampapaogesan, pantatalabutoban, pampapaatageyan, tan panggogolowan.

²¹ Mapaga ak, ta ompan diad ontombuk ya iyakar kod tan et say Dios ko paabebaen to ak ed arap yo, tan pannangisan kod satay impankasalanan na saray dakel ya ag da ni nagbabawian iray ginagawa ran karotakan, saray ginagawa ran inmoralidad tan pilalawanan.