1 TESALONICA 5 - Maung A Balita Biblia

Nepeg a Sipaparaan kayo no Onsabiy Katawan

¹ Ag la nakaukolan ya isulat mid sikayo, agagi, so nipaakar ed oras tan panaon,

² ta kabkabat yo a say isabiy Agew na Katawan et singa isabiy matakew no labi.

³ No ikuay totoo, “Mareen tan anggapoy kaatapan,” biglan onsabid sikaray kadederal. Ag ira makaliktar ta say isabi to et singa isabiy panagpasakit na biin magano lan mananak.

⁴ Balet sikayo, agagi, aliwa kayon walad bilonget, kanyan diad satan ya Agew, ag yo nepeg so nabiglaan a singa kabiglaad matakew.

⁵ Anak na liwawa tan anak na agew kayon amin. Aliwa tayon anak na bilonget o anak na labi.

⁶ Kanyan nakaukolan ya ag itayo nanaogip a singa saray arum; nepeg a sipaparaan tayo tan nakaukolan a lawas malinew so kanunotan tayo.

⁷ Labi so kakaogip da ray totoo, tan labi met so panagbuek da.

⁸ Balet lapud wala tayod agew, kanepegan a malinew so kanunotan tayo. Nepeg tayon isolung so pananisia tan aro a pinagkasamper na pagew tayo, tan say ilalo ed kilalaban a pinagkahilmit tayo.

⁹ Ta say Dios ag to itayo ingganan nadusa, no ag ingen nilaban, diad panamegley na Katawan tayon Jesu-Cristo,

¹⁰ ya inatey para sikatayo pian nakaiba tayo, inatey man o mabilay itayo.

¹¹ Kanyan ituloy yoy mansisimbawaan tan mantutulongan, a singa gagawaen yo natan.

Saray Kaonuran a Bilin tan Pabano

¹² Kerewen mid sikayo, agagi, a pagalangan yo ray kumikimey a kaiba yo, ta sikaray pinili na Katawan tan sikaray manangiwanwan tan managsimbawa yo.

¹³ Iter yod sikaray sankabalgan a panamagalang tan panangaro lapud kimey a gagawaen da. Gawa yon mareen so panoolup yo.

¹⁴ Agagi, ipurek mid sikayo a bilin yo ray mangiras, pabiskeg yo ray mabaing, tulongan yo ray makapoy, tan anosan yo ran amin.

¹⁵ Ag kayo ombabawid saray nanggaway maoges ed sikayo, no ag ingen manggawa kayo lawas na pankaabigay sakey tan sakey ed sikayo tan amin a katoowan.

¹⁶ Manliket kayo lawas.

¹⁷ Ag yo totondaay mampikasi.

¹⁸ Diad anggan anton kipapasen misalamat kayod Dios, ta sikato yay linawa to para sikayo, diad pambibilay yon kaolup yoy Cristo Jesus.

¹⁹ Ag yo sesebelay Ispiritu Santo.

²⁰ Ag yo babalawey antokaman a bangat a nanlapud Dios.

²¹ Subok yoy amin a bengatla tan pili yo ray maung.

²² Arawian yoy amin a klasiy kaogsan.

²³ Pasantosen kayon sigput komun na Dios a mangiiter na kareenan. Pansiansiaen to komun ya anggapoy pakabalawan so intiron inkatoo yo—say ispiritu, kamarerwa, tan say laman yo—anggad isabiy Katawan tayon Jesu-Cristo.

²⁴ Gawaen ya na anawag ed sikayo, ta sikato et matoor!

²⁵ Ipikasi yo kami pa met, agagi.

²⁶ Ibano yoy amin ya agagi, diad panamegley na inaagin angub.

²⁷ Ipupurek kod sikayo, diad pakayari na Katawan, ya ibasa yo yan sulat ed amin da ray agagi.

²⁸ Nawalaan kayo komuy bindision na Katawan tayon Jesu-Cristo.