1 TESALONICA 4 - Maung A Balita Biblia

Say Bilay a Makapaliket ed Dios

¹ Kaonuran, peteg a mambibilay kayon makapaliket ed Dios onung na naaralan yod sikami. Natan balet, kerewen tan simbawaen mi kayo diad ngaran na Katawan a Jesus, a lalon mambilay kayon makapaliket ed Dios.

² Ta amta yo ray inter mid sikayon bangabangat a nanlapud Katawan a Jesus.

³ Say linawa na Dios et say pambilay yon masanto tan say iyarawi yod inmoralidad.

⁴ Sikayo ran lalaki, nepeg a masanto tan masimpit so pangyamung yod kaasawaan yo,

⁵ aliwan diad pangonur yo labat ed liket na laman, a singa gagawaen da ray Hintil ya ag makaamtad Dios.

⁶ Nipaakar ed saya sirin, nepeg ya anggapoy toon manggaway maoges o mansaol ed agi to. Pinasakbayan mi kayo lan maung nen saman, a say Katawan dusaen ton dusaen iray manggaway onya ran kaogsan.

⁷ Tinawag itayoy Dios pian mambilay itayod katonungan, aliwan diad karotakan.

⁸ Kanyan siopamay mangipolisay ed sayan bangat, aliwan say too so ipolisay to, no ag ingen say Dios a mangiiter ed sikayoy Ispiritu Santo to.

⁹ Nipaakar ed pangarod agagid pananisia, ag la nakaukolan ya isulat ed sikayo, ta imbangat lad sikayo na Dios no panoy panaarowan yo.

¹⁰ Tan onyan tuay gagawaen yod amin da ray agagid intiron Macedonia. Anggaman ontan, kekerewen mi nid sikayo, agagi, ya aruman yo niy panangaro yo.

¹¹ Gawa yoy anggaay nayarian yon mambilay a mareen. Arap yo labat so kimey yon bukor tan mananap kayoy pambilay yo, onung na ingganggan mi lad sikayo.

¹² Diad ontan, baingan da ki ray aliwan mananisia. Sakey ni, ag yod satan panilaloay arum ed pambilay yo.

Say Isabiy Katawan

¹³ Agagi, labay min naamtaan yoy katwaan nipaakar ed saray inaatey la, pian ag kayo manermen a singa saray anggapoy ilalo.

¹⁴ Manisia tayon inatey tan inmolid bilay si Jesus. Ontan met sirin a manisia tayon say Dios awiten ton kaiba nen Jesus iray inaatey a mananisiad sikato.

¹⁵ Say bangat na Katawan ya ibabaga mid sikayo, saya: diad agew na isabiy Katawan, sikatayon mabilay ni ag tayo naonaan iray inaatey la.

¹⁶ Diad satan ya agew, say dilin Katawan onakseb a manlapud tawen a kabansag toy sakey a nieyag a ganggan, bosis na arkanghil, tan say tanul na trumpitay Dios. Saray inaatey a mananisiad Cristo onona ran onolid bilay.

¹⁷ Insan sikatayon mabilay naala itayon mitipon ed sikara diad kaloreman, tan onabet itayod Katawan diad liwang. Diad ontan, kaiba tayo lawas so Katawan.

¹⁸ Kanyan manliligliwaan kayo diad panamegley na sayan bangat.