1 Saray Awaran 7 - Maung A Balita Biblia

Saray Kabyangay Tribu nen Isacar

¹ Apatiray lalakin anak nen Isacar: di Tola, Pua, Jasub, tan Simron.

² Anemiray lalakin anak nen Tola: di Uzi, Refaya, Jeriel, Jahmai, Ibsam, tan Samuel. Pangulo ra na saray pamilya na boleg nen Tola tan bantug iran sondalo. Diad panaon nen Ari David duamplo tan duan libo tan anem a lasus so bilang na saray kabyangay boleg da.

³ Si Uzi walay sakey a lakin anak to a si Izrahias. Si Izrahias tan saray apatiran lalakin anak to a sikara di Micael, Obadias, Joel, tan Izias, so pangulo na saray pamilya.

⁴ Amayamay so kaasawaan da tan saray anak da, kanyan talomplo tan anem a libon lalaki so akapansondalo ed saray kabyangay boleg da.

⁵ Diad listaan na amin a pamilya na tribu nen Isacar walomplo tan piton libo so nayarin mansondalo.

Saray Kabyangay Tribu di Benjamin tan Dan

⁶ Taloray lalakin anak nen Benjamin: di Bela, Beker, tan Jediael.

⁷ Limaray lalakin anak nen Bela: di Esbon, Uzi, Uziel, Jerimot, tan Iri. Pangulo ra na saray pamilya na boleg tan bantug iran sondalo. Diad saray kabyangay boleg da duamplo tan duan libo tan talomplo tan apat so nayarin mansondalo.

⁸ Siamiray lalakin anak nen Beker: di Zemira, Joas, Eliezer, Elioenai, Emri, Jeremot, Abias, Anatot, tan Alemet.

⁹ Diad listaan na amin a pamilya ed boleg da duamplon libo tan duan lasus so nayarin mansondalo.

¹⁰ Si Jediael walay sakey a lakin anak to a si Bilhan. Pitoray lalakin anak nen Bilhan: di Jehus, Benjamin, Aod, Canaana, Zetan, Tarsis, tan Ahisahar.

¹¹ Pangulo ra na saray pamilya ed boleg tan bantug iran sondalo. Labin piton libo tan duanlasus a lalaki so nayarin mansondalo ed saray kabyangay boleg da.

¹² Di Supim tan Hupim kabyangan met na sayan tribu. Walay sakey a lakin anak nen Dan a si Husim.

Saray Kabyangay Tribu nen Neftali

¹³ Apatiray lalakin anak nen Neftali: di Jaziel, Guni, Jahzer, tan Sallum. (Kabyangay boleg nen Bilha ira ya.)

Saray Kabyangay Tribu nen Manases

¹⁴ Duaray lalakin anak nen Manases ed inyamung ton bii ya Aramea: di Asriel tan Makir. Si Makir so ama nen Galaad.

¹⁵ Si Makir inalaan to ra di Hupim tan Supim na sansakey ya asawa. Maaca so ngaran na bii ya agi nen Makir. Si Zelofehad a kumadwan lakin anak nen Makir, bibiin amin so anak to.

¹⁶ Nananak na duaran laki si Maaca ya asawa nen Makir. Inngaran da na Peres so sakey tan Seres so sakey. Duaray lalakin anak nen Peres a di Ulam tan Rekem.

¹⁷ Sakey so lakin anak nen Ulam tan manngaran na Bedan. Sikara yan amin so kabyangay boleg nen Galaad a lakin anak nen Makir tan apo nen Manases.

¹⁸ Say biin agi nen Galaad a si Hamolekit et walay taloran lalakin anak to a di Ishod, Abiezer, tan Mahla. (

¹⁹ Apatiray lalakin anak nen Semida: di Ahian, Sikem, Likhi, tan Aniam.)

Saray Kabyangay Tribu nen Efraim

²⁰ Sikara yay kabyangay boleg nen Efraim manlapud ama ya anggad anak: Efraim, Sutela, Bered, Tahat, Eleada, Tahat,

²¹ Zabad, Sutela. Wala niy duaran lalaki ya anak nen Efraim: di Ezer tan Elad. Apatey ira nen mantatakew iray bakan kayaryan na saray taga Gat.

²² Pigapigan agew so impanermen ed sikara nen Efraim ya ama ra, insan dinago na saray agagi ton lalaki, ta niligliwa ra.

²³ Kayari to ya, inakdulan nen Efraim so asawa to, kanyan nanlokun tan nananak na sakey a laki. Inngaran da na Berias lapud samay sinmabin gunigon ed pamilya ra.

²⁴ Walay biin anak nen Efraim a manngaran na Seera. Si Seera so angiletneg ed saray baley na Atagey tan Abeban Bet-horon, tan Uzen-seera.

²⁵ Wala niy lakin anak nen Efraim a manngaray Refa. Sikara yay kabyangay boleg nen Refa: Resef, Tela, Tahan,

²⁶ Ladan, Amihud, Elisama,

²⁷ Nun, tan Josue.

²⁸ Say dalin ya inala tan nanayaman da et sakop toy Betel tan saray kaliber-liber ton baley; diad bokig sakop toy anggad Naaran, tan diad sagur sakop toy anggad Gezer tan saray kaliber-liber ton baley. Sakop to met iray siudad na Sikem tan Ayya tan saray kaliber-liber dan baley.

²⁹ Sakop na saray kabyangay tribu nen Manases iray siudad na Bet-sean, Taanac, Megido, tan Dor, tan saray kaliber-liber dan baley. Sikara yay pasen a nanayaman na saray kabyangay tribu nen Jose a lakin anak nen Israel.

Saray Kabyangay Tribu nen Aser

³⁰ Sikara yay kabyangay tribu nen Aser. Apatiray lalakin anak to: di Imna, Isva, Isvi, tan Berias. Sakey so anak ton bii a si Sera.

³¹ Duaray lalakin anak nen Berias: di Heber tan Malkiel. (Si Malkiel so angiletneg ed siudad na Birzait.)

³² Taloray lalakin anak nen Heber: di Jaflet, Somer, tan Jotam. Sakey so anak ton bii a si Sua.

³³ Taloray lalakin anak nen Jaflet: di Pasac, Bimhal, tan Asvat.

³⁴ Taloray lalakin anak nen Somer a lakin agi nen Jaflet: di Roga, Jehuba, tan Aram.

³⁵ Apatiray lalakin anak nen Jotam: di Zofa, Imna, Seles, tan Amal.

³⁶ Sikara yay kabyangay boleg nen Zofa: di Suah, Harnefer, Sual, Beri, Imra,

³⁷ Bezer, Hod, Samma, Silsa, Itran, tan Beera.

³⁸ Sikara yay kabyangay boleg nen Jeter: di Jefone, Pispa, tan Ara.

³⁹ Sikara yay kabyangay boleg nen Ulla: di Ara, Haniel, tan Rizia.

⁴⁰ Kabyangan ira yan amin na tribu nen Aser. Pangulo ra na saray pamilya, masebeg tan maung iran mibakal, tan bantug iran pangulo. Duamplo tan anem a libon lalaki so nayarin mansondalo ed sikara.