1 Saray Awaran 27 - Maung A Balita Biblia

Saray Olupan da ray Sondalo tan saray Aliwan Sondalo

¹ Sikatoya so listaan na saray Israelitan pangulo da ray pamilya tan saray pangulo da ray boleg, tan saray opisyal dan angikurang ed saray kimey na nanarian. Duamplo tan apat a libon lalaki so walad balang olup ya ipapangulo na sakey a kapitan. Kapag bulan ed sakey taon sananey ya olupan so nanlingkur.

^2-15 Saray onggendan et saray kapitan ed kapag bulan: Ononan bulan: Jasobeam a lakin anak nen Zabdiel (sikatoy kabyangan na boleg nen Fares a kabyangay tribu nen Juda). Kumadwan bulan: Dedai a kabyangay boleg nen Ahohi (si Miklot so onkumadwad sikato ed betang) Kumatlon bulan: Benaya a lakin anak nen Joiada a pari; sikatoy pangulo na “Saray Talomplon” (say anak ton laki a si Amizabad so sinmalat ed sikaton pangulo na sayan olupan) Kumapat a bulan: Asael a lakin agi nen Joab (say lakin anak to a si Zebadias so sinmalat ed sikato) Kumaliman bulan: Samhut a kabyangay boleg nen Izhar Kumanem a bulan: Ira a lakin anak nen Ikes a taga Tecoa Kumapiton bulan: Helez ya Efraimita a taga Pelon Kumawalon bulan: Sibecai a taga Husa (sikatoy kabyangay boleg nen Zera, tan kabyangay tribu nen Juda) Kumasyam a bulan: Abiezer a taga Anatot a sakop na dalin na tribu nen Benjamin Kumaplon bulan: Maharai a taga Netofa (sikatoy kabyangay boleg nen Zera) Kumalabinsakey a bulan: Benaya a taga Piraton a sakop na dalin na tribu nen Efraim Kumalabinduan bulan: Heldai a taga Netopa (sikatoy kabyangay boleg nen Otniel)

Saray Pangulo na saray Tribu na Israel

^16-22 Sikato yay listaan na saray pangulo da ray tribu na Israel: Diad tribu nen Ruben si Eliezer a lakin anak nen Zicri Diad tribu nen Simeon si Sefatias a lakin anak nen Maaca Diad tribu nen Levi si Hasabias a lakin anak nen Kemuel Diad tribu nen Aaron si Sadoc Diad tribu nen Juda si Eliu, a sakey ed saray lalakin agagi nen Ari David Diad tribu nen Isacar si Omri a lakin anak nen Micael Diad tribu nen Zabulon si Ismaias a lakin anak nen Obadias Diad tribu nen Neftali si Jeremot a lakin anak nen Azriel Diad tribu nen Efraim si Oseas a lakin anak nen Azarias Diad tribu nen Kapalduay Manases si Joel a lakin anak nen Pedaya Diad tribu nen Kapalduay Manases si Iddo a lakin anak nen Zacarias Diad tribu nen Benjamin si Jaasiel a lakin anak nen Abner Diad tribu nen Dan si Azarel a lakin anak nen Jeroham

²³ Ag impabilang nen Ari David iray totoon onleksab ed duamplo so taon da, lapud samay sipan na Katawan a parakelen ton singa bitewen ed tawen iray totood Israel.

²⁴ Inggapo nen Joab a lakin anak nen Sarvia so impanbilang ed saray totoo, balet ag to sinumpal. Dinusa na Dios so Israel lapud sayan impanbilang ed saray totoo, kanyan ag nikorit ed awaran nen Ari David iray kaonuran a bilang.

Saray Makaoley ed saray Kayaryan na Ari

^25-31 Sikato yay listaan na saray makaoley ed saray kayaryan na ari: Saray kuarton panagsinupan: Azmavet a lakin anak nen Abdiel Saray kuarton panagsinupan diad luyag, diad saray siudad, diad saray bario, tan diad saray tori: Jonatan a lakin anak nen Uzias Say panagkimey ed kaalogan: Ezri a lakin anak nen Kelub Saray kaubasan: Simei a taga Rama Saray panagsinupan na alak: si Zabdi a taga Sefam Saray kiew ya oliba tan sikamoro (diad nisagur ya alusadsar na saray pokdul): Baal-hanan a taga Geder Say panagsinupan na larak na oliba: Joas Saray baka ed patar na Saron: Sitrai a taga Saron Saray baka ed saray patar: Safat a lakin anak nen Adlai Saray kamilyo: Obil ya Ismaelita Saray asno: si Jedeias a taga Meronot Saray karniro tan saray kanding: si Jaziz a taga Agar

Saray Sumisimbawa nen David

³² Si Jonatan a pangamaen nen Ari David et maung a sumisimbawa tan makabat. Sikato tan si Jehiel a lakin anak nen Hacmoni so makaoley ed impanaral da ray lalakin anak na ari.

³³ Si Ahitofel so sumisimbawa na ari, tan si Husai ya Arkita so malet a kaaro na ari.

³⁴ Kapatey nen Ahitofel sinalatan di Abiatar tan Joiada a lakin anak nen Benaya. Si Joab so manonan pangulo da ray sondalo na ari.