1 Saray Awaran 26 - Maung A Balita Biblia

Saray Guardia ed Timplo

¹ Sikara yay kimey a nipabetang ed saray Levitan guardia ed Timplo. Manlapud boleg nen Core, walay Meselemias a lakin anak nen Core tan kabyangay pamilya nen Asaf.

² Pitoray lalakin anak nen Neselemias, manlapud sankapangulowanan ya anggad sankayogtanan: di Zacarias, Jediael, Zebadias, Jatniel,

³ Elam, Johanan, tan Elioenai.

⁴ Wala met si Obed-edom a binindisionan na Dios na waloran lalakin anak a di Semaya, Jozabad, Joah, Sacar, Nataniel,

⁵ Amiel, Isacar, tan Peulletai.

⁶ Say pangulowan ya anak nen Obed-edom a si Semaya et wala ray lalakin anak to a bibirbiren irad boleg da lapud mapalaloy pakapanyari ra.

⁷ Say kangaranan da et Otni, Refael, Obed, Elizabad, Eliu, tan Samakias. Nidoma-domay karunongan di Eliu tan Samakias.

⁸ Manlapud pamilya nen Obed-edom, wala ray anemaplo tan duan lalaki a manepeg ed sayan kimey.

⁹ Manlapud pamilya nen Meselemias wala ray labinwalon lalaki a manepeg ed sayan kimey.

¹⁰ Manlapud pamilya nen Merari walay Hosa ya lalakin anak to a di Simri, (si ama to ginawa ton pangulo anggaman ya aliwan sikatoy pangulowan),

¹¹ Hilcias, Tebalias, tan Zacarias. Manlapud pamilya nen Hosa labintalon amin so guardiay Timplo.

¹² Naapag-apag ed nandoroman olup iray Timplo onung ed nanlapwan dan pamilya, tan naitdan ira na saray kimey ed Timplo a singa saray arum a Levita.

¹³ Balang sakey a pamilya, baleg may melag, akipalaranan ira diad pangamta rad puirtan guardiaan da.

¹⁴ Si Selemias apalaran to so puirtad bokig, tan si lakin anak to a si Zacarias a maung lawas so isisimbawa to et apalaran to so puirtad baybay.

¹⁵ Si Obed-edom apalaran to so puirtad abalaten tan saray lalakin anak to apalaran da a guardiaan iray panagsinupan a kuarto.

¹⁶ Di Supim tan Hosa apalaran da so puirtad sagur tan say puirtan tatawagey Salleket diad niatagey a dalan. Walay oras a nipabetang ed saray guardia tan nantotombukan so oras na panagguardia ra.

¹⁷ Diad puirtad bokig anemiray nangguardian inagew-agew; diad baybay, apatira, tan diad abalaten, apatira met. Inagew-agew apatiray nangguardiad saray panagsinupan a kuarto, duara ed kapag sakey a panagsipunan.

¹⁸ Diad asingger ed nisagur a paalagey diad gilig na dalan apatiray guardia, tan diad dilin paalagey duaray guardia.

¹⁹ Sikara yay nipabetang a pangguardiaan na saray kabyangay pamilya nen Core tan saray kabyangay pamilya nen Merari.

Saray Arum a Kimey ed Timplo

²⁰ Saray arum a kapara ran Levita et makaoley irad pananginay kayamanan na Timplo tan saray kuarton panagsinupan na saray rigalon nisaklang ed Dios.

²¹ Si Ladan a kabyangay boleg nen Gerson et laki na pigaran olup na pamilya; sakey ed saraya so pamilya nen Jehiel ya anak to.

²² Saray duaran arum nin anak nen Ladan a di Zetam tan Joel et makaoley irad pananginay kayamanan na Timplo tan saray kuarton panagsinupan.

²³ Nipabetang met iray kimey ed saray kabyangay boleg di Amram, Izhar, Hebron, tan Uziel.

²⁴ Si Sebuel a kabyangay boleg nen Gersom a lakin anak nen Moises so manonan opisyal ed saray makaoley ed pananginay kayamanan na Timplo.

²⁵ Mankanayon si Sebuel tan si Zelomit diad panamegley nen Eliezer a lakin agi nen Gersom. Si Eliezer so ama nen Rehabias ya ama nen Jesaias. Si Jesaias so ama nen Joram ya ama nen Zicri. Si Zicri so ama nen Zelomit.

²⁶ Si Zelomit tan saray kabyangay pamilya to so makaoley ed amin da ray rigalon nisaklang ed Dios; saray angisaklang ed sarayan rigalo et di Ari David, saray pangulo da ray pamilya, saray pangulo da ray olup na boleg, tan saray opisyal da ray sondalo.

²⁷ Nanaala ra na pigara ed saray asamsamsam dad bakal, insan da ra insaklang ya ikana ed dalem na Timplo.

²⁸ Si Zelomit tan saray kabyangay pamilya to so makaoley ed saray amin a nisaklang ya ikana ed dalem na Timplo, pati saray rigalon inyaakar di propita Samuel, Ari Saul, Abner a lakin anak nen Ner, tan Joab a lakin anak nen Sarvia.

Saray Kimey na saray Arum a Levita

²⁹ Nipabetang ed saray kabyangay boleg nen Izhar, a si Kenanias tan saray lalakin anak to, so kimey a pangikorit na saray awaran tan panariglo ed saray kolkolan da ray totood Israel.

³⁰ Saray kimey a para Katawan tan saray kimey para gobirno diad sagur na Ilog na Jordan et nipabetang ed saray kabyangay boleg nen Hebron a si Hasabias tan saray sanlibo tan piton lasus a kakanayon ton matalonggaring.

³¹ Si Jerias so pangulo da ray kabyangay boleg nen Hebron. Nen kumaapataploy taon a panaari nen David agaway sakey ya impanoysoy ed saray mikanayon ed kinen Hebron, et arumog ed Jazer a sakop na dalin na Galaad iray pigaran matalonan sondalo a kabyangan na sayan boleg.

³² Amiliy Ari David na matalonan duan libo tan piton lasus a pangulo na saray pamilyan kakanayon nen Jerias, insan to ra impasen a makaoley ed kimey a para Dios tan saray kimey a para gobirno diad saray dalin na Ruben, Gad, tan kapalduay Manases.