1 Saray Awaran 24 - Maung A Balita Biblia

Say Kimey a Nipabetang ed saray Papari

¹ Sikara yay olup na totoon kabyangay boleg nen Aaron. Apatiray lalakin anak nen Aaron: di Nadab, Abiu, Eleazar, tan Itamar.

² Inatey ira di Nadab tan Abiu kasakbayan na impatey nen ama ra et anggapoy ataynan dan kabyangay boleg da, kanyan nagmaliw a papari ira di Eleazar tan Itamar ya agagi ra.

³ Tinogyup nen Ari David iray kabyangay boleg nen Aaron onung na saramay kimey da. Diad impanogyup nen David tinulongan nen Sadoc a kabyangay boleg nen Eleazar, tan si Ahimelec a kabyangay boleg nen Itamar.

⁴ Atogyup ed labinanem ya olup iray kabyangay boleg nen Eleazar tan waloran olup iray saray kabyangay boleg nen Itamar; onyay agawa lapud dakel ni ray lalakin pangulo na saray pamilyad kabyangay boleg nen Eleazar.

⁵ Nipabetang iray kimey diad panamegley pampapalaranan, lapud wala ray opisyal na Timplo tan wala ra met so maispiritun pangulo ed saray kabyangay boleg nen Eleazar tan Itamar.

⁶ Nansosoblayan a nampapalaranan iray kabyangay boleg nen Eleazar tan saray kabyangay boleg nen Itamar. Inlista ra nen Semaya, say sikritario na saray Levita tan sikatoy lakin anak nen Natanael. Saray tasi ed sayan impangilista et say ari, saray opisyal to, si Sadoc a pari, si Ahimelec a lakin anak nen Abiatar, saray pangulo na saray pamilya da ray papari tan saray pamilya da ray Levita.

^7-18 Saya so impantotombukan na saray duamplo tan apat ya olup na pamilya onung na pinawayay impanpapalaranan da: 1) Joyarib; 2) Jedayas; 3) Harim; 4) Seorim; 5) Malkias; 6) Mijamin; 7) Haccoz; 8) Abias; 9) Jesua; 10) Secanias; 11) Eliasib; 12) Jakim; 13) Hupa; 14) Jesebeab; 15) Bilga; 16) Imer; 17) Hezir; 18) Hapizez; 19) Petaya; 20) Jezekiel; 21) Jakin; 22) Gamul; 23) Delayas; 24) Maasias.

¹⁹ Nilista ra yan lalaki onung na saray kimey da ya onlad dalem na Timplo tan manggawa na saray kimey ya inletneg na laki ra a si Aaron diad impangonur tod saray ganggan na Katawan a Dios na Israel.

Say Listaan na saray Levita

²⁰ Sikara yay arum a pangulo na saray pamilyan kabyangay tribu nen Levi: Jehedias a kabyangay boleg nen Amram diad panamegley nen Subael;

²¹ Isias a kabyangay boleg nen Rehabias;

²² Jahat a kabyangay boleg nen Izhar diad panamegley nen Zelomit;

²³ Jerias, Amarias, Jehaziel, tan Jecameam ya anak nen Hebron manlapud sankapangulowan ya anggad sankayogtanan;

²⁴ Samir a kabyangay boleg nen Uziel diad panamegley nen Mica;

²⁵ Zacarias a kabyangay boleg nen Uziel diad panamegley nen Isias ya agi nen Mica;

²⁶ Mahli, Musi, tan Jaasias a kabyangan iray boleg nen Merari.

²⁷ Taloray lalakin anak nen Jaasias: di Soham, Zacur, tan Ibri.

^28-29 Duaray lalakin anak nen Mahli: di Eleazar tan Cis. Anggapoy lakin anak nen Eleazar, balet walay lakin anak nen Cis a si Jerameel.

³⁰ Taloray lalakin anak nen Musi: di Mahli, Eder, tan Jeremot. Sikara yay pamilya na saray Levita.

³¹ Say pangulo na balang pamilya tan say sakey ed saray yogtan ton lalaki so akipalaranan diad impangamta rad saray kimey da a singa ginagawa met na saray kakanayon dan papari a kabyangay boleg nen Aaron. Saray tasi ed sayan impanpapalaranan da et di Ari David, Sadoc, Ahimelec, tan saray pangulo na saray pamilya da ray papari tan saray pamilya da ray Levita.