1 Saray Awaran 16 - Maung A Balita Biblia

¹ Inyakar da may Kaban na Sipanan ed tuldan imparaan nen David tan inyan dad dalem to. Insan angisaklang irad Dios na saray bagat a popoolan tan saray bagat a para kareenan.

² Kayariy impangibagat nen David, binindisionan tod ngaran na Katawan iray totoo,

³ tan binunogan to ran amin na kakanen. Initdan toy balang sakey a laki tan bii ed Israel na sakey a tinapay, sakey a tegteg ya inkalut a karni, tan pigaran pasas.

⁴ Tinoro nen David iray pigaran Levita a mangipanguloy pikakasi, pisasalamat, tan panangidayew ed Dios na Israel, diad arap na Kaban na Sipanan.

⁵ Si Asaf so atoron pangulo tan si Zacarias so onkumadwad sikato. Saray manogtog na saray arpa et di Jeiel, Semiramot, Jehiel, Matatias, Eliab, Benaya, Obed-edom, tan Jeiel. Si Asaf so mampaknul na piangpiang,

⁶ tan saray duaran pari a di Benaya tan Jahaziel so mampaknul ya inagew-agew na saray trumpita diad arap na Kaban na Sipanan.

⁷ Saman ya agew so onaan ya impanoro nen David ed kinen Asaf tan saray kapara ton Levita a mankanta ray pangidayew ed Katawan.

Say Kantan Pangidayew

⁸ Misalamat kayod Katawan, ibawag yoy pakapanyari to, tan ipaamta yod saray bansa iray ginagawa to.

⁹ Kantaan yoy dayew so Katawan; ibelyaw yoy amin a makapakelkelaw iran gawgawa to.

¹⁰ Manggayaga kayo, ta kayaryan to itayo; manliket komun ya amin iray mangigagalang ed Katawan!

¹¹ Laka yod Katawan tan kerew kayoy tulong to; tan igalang yo ed ando lan ando.

^12-13 Sikayo ran kabyangay boleg nen Israel ya aripen na Dios, sikayo ran kabyangay boleg nen Jacob a pinili na Dios nunot yo ray makapakelaw a milagron ginagawa to, tan saray sintinsian iniiter to.

¹⁴ Say Katawan so Dios tayo, para amin a katoowan iray ganggan to.

¹⁵ Ag yo lilingwanan ya anggan kapigan so impisipanan to, say impisipanan tod amin a kailalakan,

¹⁶ say impisipanan tod kinen Abraham, say sinambaan tod kinen Isaac.

¹⁷ Say Katawan akisipanan ed kinen Jacob, say andi-anggaan ya impisipanan tod kinen Israel.

¹⁸ “Iter kod sikay dalin na Canaan,” inkuanto. “Sikatoy tawiren mo.”

¹⁹ Pigpigara nen saman iray totoo na Dios, tan sangkaili rad dalin na Canaan.

²⁰ Nansosoblay so nanaayaman da ran bansa tan saray nanarian.

²¹ Balet ag inyabuloy na Dios a pairapen ira na anggan siopa, tan diad pangyagel tod sikara, pinapasakbayan to ray arari.

²² Inkuanto, “Ag yo didiwiten iray aripen kon pinilik; ag yo papasakitan iray propitak!”

²³ Kantaan yoy Katawan, amin yon katoowan ed tapew na dalin! Ibawag yon inagew-agew so maung a balita ya inlaban to itayo.

²⁴ Ibando yod saray bansa so kagalangan to, tan diad amin a katoowan iray makapakelaw a gawgawa to.

²⁵ Matalonggaring so Katawan, tan nepeg ya idaydayew; nepeg a lalon igalang nen saray amin a diriyos.

²⁶ Talintao labat ya amin iray diriyos da ray arum a bansa, balet say Katawan pinalsa to ray katawenan.

²⁷ Galang tan pakayari so walad kaliber-liber to; biskeg tan liket so walad dalem na Timplo to.

²⁸ Amin yon katoowan ed tapew na dalin, idayew yoy Katawan; idayew yoy kagalangan tan pakapanyari to.

²⁹ Idayew yoy mapagalang a ngaray Katawan; mangawit kayoy bagat tan loob kayod Timplo to. Dakmomo kayod arap na Masanton Katawan no omparontal;

³⁰ giwgiw kayod arap to, amin yon pinalsa! Malet so inkiletneg na mundo tan ag balut natenyeg.

³¹ Manliket kayo, sikayon dalin tan tawen! Ibawag yod amin a bansa, “Manaariy Katawan!”

³² Ongul kan dayat tan amin a pinalsa a manaayam ed sika manggayaga kayon kaalogan tan amin yon pinalsa a manaayam ed sikayo.

³³ Saray kakiewan mankanta rad liket diad arap na Katawan, no onsabin manoley ed sankamundoan so Katawan.

³⁴ Misalamat kayod Katawan, ta sikato et maung; andi-anggan so panangaro ton ag mangoman!

³⁵ Ikuanyod sikato, “Iyagel mo kami pa, O Dios a Manangilaban mi; pantitipon mo kami pa; iyagel mo kamid saray kalaban a bansa, pian misalamat kami tan idayew miy masanton ngaran mo.”

³⁶ Idayew yoy Katawan a Dios na Israel! Idayew yo natan tan anggad angga! Insan inkuan na amin a totoo, “Amen,” tan indayew day Katawan.

Say Panangigalang diad Jerusalem tan diad Gabaon

³⁷ Imbaga nen David ed kindi Asaf tan saray kapara ton Levita ya ituloy dan sikaray makaoley ed panangigalang a ginagawad pasen a kawalaay Kaban na Sipanan. Nepeg ya inagew-agew so panggawa rad saray kimey da.

³⁸ Tinmutulong ed sikara si Obed-edom a lakin anak nen Jedutun tan saray anemaplo tan walon lalaki a kakanayon to. Si Hosa tan si Obed-edom so makaoley ed pangguardiad saray puirta.

³⁹ Balet si Sadoc tan saray kapara ton papari so impasen ton makaoley ed panangigalang ed Katawan diad Gabaon.

⁴⁰ Kinabwasan tan kapag labi so nepeg a pangisaklang dad saray bagat a popoolan diad tapew na altar onung na amin a nisulat ed Ganggan ya inter na Katawan ed Israel.

⁴¹ Kaiba rad man si Heman tan si Jedutun tan saray arum a pinili tan intalaga a mankantay dayew ed Katawan lapud andi-anggaan a panangaro to.

⁴² Di Heman tan Jedutun met so makaoley ed saray trumpita, piangpiang, tan saray arum a kagawaan na musika a togtogen ira no kantaen iray imnon panangidayew. Saray kabyangay boleg nen Jedutun so makaoley ed panagguardiad saray puirta.

⁴³ Insan sinmempet lay balang sakey, tan sinmempet met lay David a mangilugay ed pamilya to.